“Palamdaga ang Inyong Kahayag”

¹ Ang kalibotan sa atong palibot anaa sa kangitngit sa moral ug espirituwal. Ang kahayag sa kamatuoran nagyagyag sa “dili-mabungahong mga buhat” sa kangitngit aron kining makamatay nga mga kapandolan mahimong malikayan. Busa, ang apostol nga si Pablo nag-awhag sa mga Kristohanon: “Padayon sa paglakaw ingon nga mga anak sa kahayag.”​—Efe. 5:​8, 11.

² Ang “mga bunga sa kahayag” sukwahi kaayo sa kangitngit sa kalibotan. (Efe. 5:9) Aron makapatungha niini nga mga bunga nagkinahanglan nga kita mahimong talagsaong mga panig-ingnan sa Kristohanong pagkinabuhi, ang matang sa mga tawo nga giuyonan ni Jesus. Kinahanglang ipakita usab nato ang maong mga hiyas sama sa pagkabug-os-kasingkasing, pagkasinsero, ug pagkamadasigon dapig sa kamatuoran. Kini nga mga bunga kinahanglang ipakita diha sa atong adlaw-adlawng kinabuhi ug diha sa atong ministeryo.

³ Palamdaga sa Tanang Higayon: Gisultihan ni Jesus ang iyang mga tinun-an: “Palamdaga ang inyong kahayag atubangan sa mga tawo.” (Mat. 5:16) Sa pagsundog kang Jesus, atong gipabanaag ang kahayag ni Jehova pinaagi sa pagsangyaw bahin sa Gingharian sa Diyos ug sa iyang mga katuyoan. Kita nagalamdag ingong mga kahayag sa dihang atong duawon ang mga balay sa mga tawo ug sa dihang atong ipakaylap ang kamatuoran sa trabahoan, sa eskuylahan, taliwala sa atong mga silingan, o bisan asa nga kita adunay kahigayonan.​—Filip. 2:15.

⁴ Si Jesus miingon nga dumtan sa pipila ang kahayag. (Juan 3:20) Busa dili kita maluya sa dihang ang kadaghanan modumili nga ipalamdag ang “banwag sa mahimayaong maayong balita bahin sa Kristo” nganha kanila. (2 Cor. 4:4) Mabasa ni Jehova ang kasingkasing sa mga tawo ug dili buot nga ang mga nagabuhat sa pagkadili-matarong mahilakip sa iyang katawhan.

⁵ Sa dihang atong tumanon ang mga paagi ni Jehova ug pahimuslan ang espirituwal nga kahayag, atong ikapabanaag kini ngadto sa uban. Kon ilang mailhan pinaagi sa atong panggawi nga kita ‘nakabaton sa kahayag sa kinabuhi,’ nan sila usab tingali matukmod sa paghimog gikinahanglang mga kausaban aron mahimong mga tigdala sa kahayag.​—Juan 8:12.

⁶ Pinaagi sa pagpalamdag sa atong kahayag, atong gidayeg ang atong Maglalalang ug gitabangan ang sinserong mga tawo nga makaila kaniya ug maangkon ang paglaom sa kinabuhing walay kataposan. (1 Ped. 2:12) Sanglit nabatonan nato ang kahayag, gamiton nato kini sa pagtabang sa uban nga makalingkawas sa espirituwal nga kangitngit ug magpatunghag mga buhat nga iya sa kahayag.