Pangutana

◼ Kanus-a mahimong haom ang pagporma ug dugang grupo sa Pagtuon sa Libro sa Kongregasyon?

Ang pagporma ug bag-ong grupo angayng konsiderahon kon gikinahanglan aron mamentinar ang gidaghanon sa tumatambong nga mga 15 o menos pa sa matag usa sa mga dapit sa pagtuon sa libro, lakip sa Kingdom Hall. Nganong girekomendar kini?

Kon magpabiling gagmay ang mga grupo sa Pagtuon sa Libro sa Kongregasyon, ang tagdumala mas makaarang sa paghatag ug pagtagad sa matag usa nga motambong. Dugang pa, ang tanan adunay igong kahigayonan sa pagkomento diha sa kahimtang nga makaamot sa paghimog publikong kapahayagan sa ilang pagtuo. (Heb. 10:​23; 13:15) Ang pagbaton ug mas gagmayng mga grupo sa lainlaing mga dapit sa tibuok teritoryo sa kongregasyon maghimong mas kombenyente sa pagtambong sa Pagtuon sa Libro sa Kongregasyon ug sa mga tigom sa dayon nang pagsangyaw. Nakaplagan sa mga kongregasyon nga nagdugang sa gidaghanon sa mga dapit sa pagtuon nga miuswag usab ang gidaghanon sa kinatibuk-ang tumatambong sa pagtuon sa libro.

Hayan adunay linaing mga kahimtang nga maghimo niining makaayo ang pagporma ug laing grupo, bisan kon kini gamay ra. Kini mahimong tinuod diha sa usa ka nahilit nga dapit o diin ang presenteng mga dapit naghuot na o kulang sa igong lingkoranan. Kon gikinahanglan, ang usa ka grupo mahimong pormahon nga magtigom sa maadlaw alang sa kaayohan sa mga tigulang, mga trabahante sa magabii, o mga igsoong babaye nga di-Saksi ang mga bana.

Ang matag grupo sa pagtuon sa libro angayng adunay pipila ka lig-on sa espirituwal ug aktibong mga magmamantala nga naasayn maingon man usa ka kuwalipikadong tagdumala ug magbabasa. Ang mga igsoong lalaki angayng magapangab-ot aron matagan-an kining mga panginahanglana sa kongregasyon.

Ang mga ansiyano makapalambo sa kauswagan sa kongregasyon pinaagi sa pagseguro nga ang mga grupo sa pagtuon sa libro sa kongregasyon maoy makataronganon ang gidak-on ug maatiman pag-ayo sa espirituwal nga paagi ug nga sila magtigom diha sa kombenyente nga mga dapit. Sa dihang praktikal, ang bag-ong mga grupo angayng pormahon aron ang tanan makakuhag bug-os nga mga kaayohan niining talagsaong espirituwal nga kahikayan. Ikatanyag ba nimo ang imong balay ingong dapit sa pagtuon sa libro? Daghan nga mihimo sa ingon nakasinatig espirituwal nga mga panalangin.