Ang Pagkayano Maoy Epektibo Kaayo
1 Nganong sagad nakuha sa batan-ong mga magmamantala ang pagtagad niadtong ilang gipakig-ambitan sa mensahe sa Gingharian? Ang usa ka katarongan mao nga ang ilang mga pulong maoy yano. Ang pipila ka magmamantala tingali mobati nga gikinahanglan ang larinong presentasyon aron makapamatuod nga epektibo. Apan, ang kasinatian nagpakita nga ang yano ug tin-awng presentasyon maoy epektibo kaayo.
2 Gimantala ni Jesus ang Gingharian sa Diyos diha sa yano, deretso nga paagi ug gibansay ang iyang mga tinun-an sa pagbuhat sa ingon. (Mat. 4:17; 10:5-7; Luc. 10:1, 9) Gigamit niya ang yanong mga introduksiyon, mga pangutana, ug mga ilustrasyon aron madakop ang pagtagad sa iyang mga tigpaminaw ug maabot ang ilang mga kasingkasing. (Juan 4:7-14) Maayong atong sundogon ang iyang panig-ingnan ug ihatag ang mga presentasyon nga daling masabtan.
3 Ang “maayong balita sa gingharian” mao ang mensahe nga atong imantala. (Mat. 24:14) Ang paggamit sa Gingharian ingong imong pasukaranang tema motabang sa imong presentasyon nga kanunayng yano. Hisgoti ang mga butang nga hinungdanon sa imong mga mamiminaw. Ang mga babaye sagad mas interesado sa ilang pamilya kay sa mga ulohang politikanhon. Ang hatagag pangunang pagtagad sa usa ka amahan mao ang iyang trabaho ug ang kasegurohan sa iyang pamilya. Ang mga batan-on interesado sa ilang kaugmaon; ang tigulang nga mga tawo, sa mas maayong panglawas ug ilang seguridad. Ang mga tawo sagad mas interesado bahin sa lokal nga mga hitabo kay sa kon unsay nahitabo sa halayong mga nasod. Human maghisgot bahin sa mga butang nga may samang interes, itumong ang pagtagad ngadto sa mga panalangin nga tagamtamon sa masinugtanong katawhan ilalom sa pagmando sa Gingharian sa Diyos. Ang pipila ka yano, maayong-pagkapili nga mga pulong nga ilambigit sa usa ka kasulatan mahimong ang epektibo kaayong paagi sa pagpalihok sa interes sa imong tigpaminaw.
4 Makasugod ka sa panaghisgot pinaagi sa pag-ingon:
◼ “Sa walay duhaduha mouyon ka nga ang katawhan gihampak sa daghang walay-pagkaayo nga mga sakit. Apan nahibalo ka ba nga ang Diyos misaad nga sa dili madugay iyang hanawon ang tanang matang sa sakit, maingon man ang kamatayon?” Tugoting motubag, ug dayon basaha ang Pinadayag 21:3, 4.
5 Pinaagig tin-aw ug yanong mga presentasyon, hinaot nga imong maabot ang mga hunahuna ug kasingkasing sa mas daghang tawo sa imong teritoryo, nga magbulig kanila sa pagkakat-on bahin kang Jehova ug sa palaaboton nga makapahimulos ug kinabuhing walay kataposan.—Juan 17:3.