Pakig-ambit nga Bug-os sa Pagpangani
1 Ang mga manalagna ni Jehova sa kakaraanan maingon man si Jesu-Kristo mismo naghisgot bahin sa buluhatong pagpanigom. (Isa. 56:8; Ezeq. 34:11; Juan 10:16) Ang maong buluhaton ginahimo na karon samtang ang maayong balita sa Gingharian ginasangyaw sa tibuok kalibotan. (Mat. 24:14) Ang kalainan tali niadtong nag-alagad sa Diyos ug niadtong wala mag-alagad kaniya nadayag pag-ayo. (Mal. 3:18) Unsay gipasabot niini alang kanato?
2 Personal nga Responsabilidad: Makakat-on kita gikan sa panig-ingnan ni Pablo, kinsa bug-os nga nalangkit sa pagpanguna sa Kristohanong ministeryo. Gibati niya ang obligasyon sa pagsangyaw aron ang tanang tawo makabaton ug higayon nga makadungog sa maayong balita ug maluwas. Nagtukmod kini kaniya sa paghago nga walay hunong alang sa ilang kaayohan. (Roma 1:14-17) Tungod sa makuyaw nga kahimtang nga giatubang sa katawhan karon, dili ba kita aduna gayod ing mas dakong responsabilidad sa pagsangyaw ngadto kanilang anaa sa atong natudlong teritoryo?—1 Cor. 9:16.
3 Panahon sa Dinaliang Paglihok: Ang buluhatong pagsangyaw ikatandi sa pagpangita-ug-pagluwas nga buluhaton. Kinahanglang makaplagan ang mga tawo ug matabangan ngadto sa kaluwasan sa dili pa ulahi kaayo. Limitado ang panahon. Nameligro ang mga kinabuhi! Dili ikahibulong nga giagda ni Jesus ang iyang mga tinun-an nga ‘mangamuyo sa Agalon sa anihon nga magpadalag mga mamumuo ngadto sa iyang anihon.’—Mat. 9:38.
4 Kay giila ang kadinalian sa panahon karon, daghang mamumuo sa Gingharian ang nagpauswag sa ilang pagpakig-ambit niining nagaluwas-kinabuhing kalihokan. Usa ka tin-edyer nga ginganlag Hirohisa uban sa upat ka manghod nga mga igsoong lalaki ug babaye, nagpuyo diha sa panimalay nga inahan ra ang ginikanan. Gisuportaran niya ang iyang pamilya pinaagi sa pagbangon sa alas tres sa kaadlawon aron ihatod ang mga mantalaan. Bisan pa niana, buot ni Hirohisa nga mobuhat ug mas pa diha sa ministeryo, busa misugod siya sa pagregular payunir. Aduna bay mga paagi nga ikaw makaambit nga mas bug-os pa niining di-na-masubli nga buluhaton?
5 “Ang panahong nabilin mubo na.” (1 Cor. 7:29) Busa, hinaot nga buhaton nato ang tanan tang maarangan diha sa labing hinungdanong buluhaton nga ginatuman sa yuta karon—pagsangyaw sa maayong balita sa Gingharian ug paghimog mga tinun-an. Gipakasama ni Jesus kini nga ministeryo sa buluhatong pagpangani. (Mat. 9:35-38) Pinaagi sa atong bug-os nga pagpakig-ambit sa pagpangani, ang mga bunga sa atong paghago mahimong maglakip sa pagtabang sa usa nga mahimong bahin sa dakong panon sa mga magsisimba nga gihubit sa Pinadayag 7:9, 10.