Abota ang Kasingkasing sa Imong Estudyante
1 Una pa mokayab paingon sa langit, gisultihan ni Jesus ang iyang mga tinun-an nga tudloan ang uban sa “pagtuman” sa tanang butang nga iyang gisugo. (Mat. 28:19, 20) Kon ang usa ka tawo ‘motuman’ man sa mga sugo ni Kristo, ang impormasyon kinahanglang makaabot sa iyang kasingkasing. (Sal. 119:112) Sa unsang paagi imong mapalihok ang kasingkasing sa usa nga imong ginatun-an sa Bibliya?
2 Pag-ampo sa Pagtultol ni Jehova: Ang paghimog mga tinun-an maoy buluhaton nga iya sa Diyos. Ang iyang panalangin, dili ang atong mga katakos, mao ang kinahanglanon alang sa kalamposan. (Buh. 16:14; 1 Cor. 3:7) Busa, ang pag-ampo sa tabang ni Jehova sa pagtudlo sa kamatuoran ngadto sa uban gikinahanglan.—Isa. 50:4.
3 Sabta Kon Unsay mga Gituohan sa Estudyante: Ang pagkahibalo kon unsay gituohan sa mga tawo ug kon nganong nagtuo sila niana makahatag kanatog lalom nga pagsabot kon unsay atong isulti aron maabot ang ilang kasingkasing. Nganong nakaplagan sa estudyante ang partikular nga pagtulon-an nga madanihon? Unsay nakapakombinsir kaniya nga kana katuohan? Kanang kahibaloa makatabang kanato sa pagsulti nga may pagsabot.—Buh. 17:22, 23.
4 Paghimog Lohiko, Kasulatanhong Argumento: Ang kamatuoran kinahanglan makitang makataronganon ngadto sa estudyante. (Buh. 17:24-31) Kinahanglan natong ihatag ang maayong katarongan alang sa atong paglaom. (1 Ped. 3:15) Apan, kanunayng buhaton ang ingon diha sa mabination, mapailobong paagi.
5 Palig-ona ang Atong Pagtudlo Ginamit ang mga Ilustrasyon: Dili lamang magpasayon ang mga ilustrasyon sa pagsabot sa estudyante kondili magpapukaw usab kana sa mga emosyon. Ang mga ilustrasyon mag-apektar sa hunahuna ug kasingkasing. Si Jesus sagad nga migamit niana. (Mar. 4:33, 34) Siyempre, aron mahimong epektibo, ang gamitong ilustrasyon kinahanglang mohaom sa puntong ginahisgotan, ug kinahanglan kanang maglambigit sa kinabuhi sa estudyante.
6 Ipakita ang mga Kaayohan sa Pagdawat sa Kamatuoran: Ang mga tawo gustong mahibalo sa mga kaayohan sa pagpadapat sa ilang nakat-onan. Tabangi ang imong estudyante nga masabtan ang kaalam sa mga pulong ni Pablo sa 2 Timoteo 3:14-17.
7 Ayawg kaluya kon ang uban dili mosanong sa imong pagpanudlo. Dili tanang kasingkasing madinawaton. (Mat. 13:15) Bisan pa niana, ang ubang mga indibiduwal nahimo mang mga magtutuo. (Buh. 17:32-34) Hinaot nga ang imong mga paningkamot sa pag-abot sa mga kasingkasing pinaagi sa maayong balita makatabang sa daghan pa nga modawat ug ‘motuman’ sa gisugo ni Jesus.