“Ako Nagmalig-on! Ako Nagmalig-on! Ako Nagmalig-on!”
1 Kanang mga pulonga sa usa ka matinumanong Kristohanon nga naluwas sa Holocaust nagpalanog sa determinasyon sa libolibong mga Saksi—buhi man ug patay—kinsa determinado sa ilang mga gituohan bisan pa sa kabangis sa Nazi. (Efe. 6:11, 13) Ang ilang makapahinam nga kasaysayan sa kaisog ug kadaogan giasoy diha sa makapukaw-kasingkasing nga video nga Jehovah’s Witnesses Stand Firm Against Nazi Assault. Ang tanan diha sa kongregasyon giagda sa pagtan-aw niana ug ipaambit ang ilang mga hunahuna ug pagbati sa usag usa.
2 Tugoting palihokon ang imong panghunahuna niining mga pangutanaha: (1) Tungod sa unsang mga hinungdan nga ang mga Saksi ni Jehova maisogong mibarog batok sa mga Nazi? (2a) Unsang nagkasumpaking mga hunahuna ang naglungtad maylabot sa pagtimbaya, ug ngano? (2b) Sa unsang paagi kini nag-apektar sa mga pamilyang Saksi? (3) Pila ka Saksi ang gipadala ngadto sa mga kampong konsentrasyon, sa unsang paagi sila nailhan didto, ug giunsa sila pagtratar sa mga Gestapo? (4) Unsa ang wala isakripisyo sa atong mga igsoon ingong bugti sa kagawasan? (5a) Sa unsang paagi ug kanus-a maisogong mipahayag ang mga Saksi ni Jehova batok sa mga kapintasan sa rehimen ni Hitler? (5b) Sa unsang paagi misanong si Hitler? (6) Sa unsang paagi ang panaghiusa sa katawhan ni Jehova napamatud-ang nagaluwas-ug-kinabuhi alang kanila ug sa uban, sa pisikal ug espirituwal nga paagi? (7) Unsang awit sa Gingharian ang gisulat diha sa kampong konsentrasyon? (8) Unsang mga panig-ingnan sa matinumanong mga lalaki, babaye, ug mga batan-on ang nakadasig kanimo aron padayong huptan ang imong integridad kang Jehova, bisan unsa pay mahitabo kanato? (Tan-awa usab ang 1999 Yearbook, mga panid 144-7.) (9) Ingong usa sa mga Saksi ni Jehova, unsay gipabati niini nga video kanimo maylabot sa pagkadi-bahin sa kalibotan?
3 Ang maisogon ug makapadasig nga panig-ingnan sa mga Saksi ni Jehova nga gipasundayag diha sa video nga Stand Firm makatabang sa mga batan-on, bisan niadtong dili mga Saksi, sa pag-atubang nianang hinungdanong mga isyu sama sa pagkadi-matugoton, pagpit-os sa isigkaingon, ug tanlag. Kon ikaw usa ka batan-on nga nagtungha sa hayskul, mahimo bang hatagan nimo ang imong mga magtutudlo ug kahigayonan aron magamit kining materyala sa klase? Hayan ikatanyag mo kanila ang usa ka kopya sa video ug hubiton kana ingong usa ka makasaysayanhong asoy o ingong dokumentaryo nga may moral nga leksiyon.
4 Ang videong Stand Firm maoy ekselenteng himan aron ipakita kon sa unsang paagi ang diyosnong pagtudlo maghatag kanatog espirituwal nga kalig-on sa pagpahimuot sa Diyos pinaagi sa pagpabiling lig-on kon unsay husto. (1 Cor. 16:13) Ipaambit kini sa tanan nga may interes sa kamatuoran.