Ayaw Pagduhaduha!

¹ Sa dihang kita andam na sa pamalaybalay nga pagsangyaw, ang labing dakong babag nga atong mahibalag hayan mao ang atong kaugalingon. Ang mga pagbati nga di-takos basin magpaduhaduha kanato sa paggula aron isulti ang kamatuoran ngadto sa “tanang matang sa mga tawo.” (1 Tim. 2:4) Apan kinahanglan nga kita dili magpanuko sa pagsangyaw sa maayong balita. Nganong dili?

² Kini Iya ni Jehova nga Mensahe: Gipadangat ni Jehova ang iyang pulong pinaagi sa Bibliya. Sa dihang atong dad-on kini nga mensahe ngadto sa uban, atong gipahayag ang iyang mga hunahuna, dili ang atoa. (Roma 10:13-15) Sa dihang isalikway sa mga tawo ang mensahe sa Gingharian, sila gayod nagsalikway kang Jehova. Bisan pa niana, dili kita maluya. Kita masaligon nga kini nga mensahe magpahinabog paborableng sanong niadtong nagtinguhag kausaban sa mga kahimtang sa kalibotan ug kinsa mahunahunaon sa ilang espirituwal nga panginahanglan.​—Ezeq. 9:4; Mat. 5:​3, 6.

³ Si Jehova Nagkabig sa mga Tawo: Ang tawo nga midumili sa pagpaminaw kanato sa nangagi tingali karon madinawaton na tungod kay ang iyang mga sirkumstansiya nausab na ug ang kahimtang sa iyang kasingkasing nalukmay na. Hayan ipahayag ni Jehova karon ang iyang maayong kabubut-on ngadto sa maong tawo ug “magkabig kaniya.” (Juan 6:​44, 65) Sa dihang kini mahitabo, buot natong magmaandam nga gamiton ni Jehova ug magpasakop sa pagtultol sa manulonda sa pagpangita sa maong mga tawo.​—Pin. 14:6.

⁴ Ang Diyos Naghatag Kanato sa Iyang Espiritu: Ang balaang espiritu magpaarang kanato sa pagsulti “uban ang kaisog pinaagi sa awtoridad ni Jehova.” (Buh. 14:1-3) Kay nahinumdom nga kita aduna niining gamhanang pagpaluyo sa atong ministeryo, kita dili mag-ukon-ukon sa pagsulti sa kamatuoran ngadto sa mga silingan, mga isigkatrabahante, mga klasmet, mga paryente, o edukado kaayo o adunahan nga mga tawo.

⁵ Si Jesus Nagtudlo Kanato sa Paagi: Si Jesus migamit ug makapukaw-sa-hunahuna nga mga pangutana, praktikal nga mga ilustrasyon, ug Kasulatanhong pangatarongan. Iyang gipatin-aw ang kamatuoran diha sa yano, madanihong paagi, gikan sa iyang kasingkasing. Kini gihapon ang labing maayong mga pamaagi karong adlawa. (1 Cor. 4:17) Ang mga kahimtang sa atong ginasangyawan tingali nag-usab-usab, apan ang gamhanang mensahe sa Gingharian nagpabiling wala mausab.

⁶ Kita nakapribilehiyo nga magamit ni Jehova sa pagtabang sa mga tawo diha sa linain ug hinungdanong paagi. Dili kita magduhaduha! Hinaot nga kita magmaisogon ug tugotan si Jehova sa ‘pagbukas sa usa ka pultahan sa pagpamulong alang kanato’ aron makasulti kita sa maayong balita ngadto sa uban.​—Col. 4:2-4.