Pangandam sa Pagtuon sa Tagna ni Isaias!
1 “Ang matinumanong mga magsisimba makasalig nga si Jehova . . . dili motugot nga ang kalibotan ni Satanas molungtad ug usa ka adlaw pa kay sa gipangayo sa hustisya.” Pagkamakapadasig nga pahayag! Diin gikan kini gikutlo? Tagna ni Isaias—Kahayag Alang sa Tanang Katawhan I (panid 309 par. 15) Ang tagna ba ni Isaias naghatag kanatog katarongan sa pagbaton nianang makapalig-ong konklusyon? Oo! Diha nianang basahona sa Bibliya, ang tema bahin sa kaluwasan kusganon ug tin-awng gipasiugda. (Isa. 25:9) Kana ang hinungdan nga mahimong dakong pagdasig alang kanato ang pagtuon niining bahina sa Pulong sa Diyos diha sa Pagtuon sa Libro sa Kongregasyon. Atua ba kita didto aron magpahimulos niini sa matag semana? Nganong motambong gayod kita?
2 Sa Isaias 30:20, si Jehova gitawag nga atong “Dakong Instruktor.” Ang matag Kristohanon angayng maminaw pag-ayo samtang si Jehova nagatudlo kanato pinaagi sa iyang Pulong ug pinaagi sa pinasukad-sa-Bibliya nga mga publikasyon nga gitagana sa “matinumanon ug maalamong ulipon.” (Mat. 24:45; Isa. 48:17, 18) Tinuod gayod kini bahin sa librong Tagna ni Isaias I. Sa unsang paagi makapahimulos ka sa labing maayo gikan sa pagtuon niini?
3 Pangandam Aron Makig-ambit: Paggahin ug igong panahon matag semana sa pagpangandam sa pagtuon sa libro. Basaha ang natudlong materyal parapo por parapo. Hunahunaa ang matag usa sa pinatik nga mga pangutana. Markahi ang mga tubag diha sa imong libro. Ang mga bersikulo nga gikutlo gikan sa Isaias gipatik sa tataw nga letra. Basaha kinig maayo. Bahin sa ubang mga teksto nga gisitar, susiha kini aron masabtan kon sa unsang paagi kini nalangkit sa materyal. Pamalandonga ang imong nakat-onan. Dayon ipakig-ambit ang mga resulta sa imong pagpangandam diha sa inyong grupo sa pagtuon sa libro.
4 Kinahanglang tabangan sa igsoong lalaki nga nagdumala sa pagtuon sa libro ang tanang nanambong sa paggamit ug maayo sa Bibliya ug sa pag-ila sa praktikal nga bili sa materyal nga gikobrehan. Kon una ka nga gipakomento, ihatag ang yano, deretsong tubag. Kon ang usa nakahimo na niana, mahimo nimong dugang ibatbat ang punto nga ginahisgotan. Lagmit mahimo nimong ipakita kon sa unsang paagi ang yawing teksto nagpalig-on sa tema. Paningkamot nga magkomento sa imong kaugalingong mga pulong, ug pahimusli ang kalipay sa pagsalmot sa panaghisgot.
5 Maikagon natong susihon sa tingob ang bililhong mensahe diha sa basahon ni Isaias. Magdasig kini kanato sa pagkinabuhi sa matag adlaw diha sa malipayong pagpaabot sa kaluwasan nga iya ni Jehova!—Isa. 30:18.