Ikaw “Talan-awon sa Teatro”!
1 Ang apostol nga si Pablo misulat: “Kami nahimong talan-awon sa teatro sa kalibotan, ug sa mga manulonda, ug sa mga tawo.” (1 Cor. 4:9) Unsay ipasabot niini, ug sa unsang paagi kini makaapekto kanato sa atong ministeryo karon?
2 Alang sa usa ka taga-Corinto, ang ekspresyong “talan-awon sa teatro” lagmit nagpahinumdom sa paniklop nga hitabo sa Romanhong sangka sa gladyador, diin ang hinukmang mga tawo iparada atubangan sa libolibong mga tumatan-aw sa dili pa patyon sa linuog nga paagi. Sa susama, ang bagang tumatan-aw—mga tawo ug mga manulonda—naglantaw sa mga pag-antos nga naagoman sa unang-siglong mga Kristohanon tungod sa pagpamatuod sa Gingharian. (Heb. 10:32, 33) Ang ilang nagahupot-ug-integridad nga dalan nakaapekto sa daghang tumatan-aw, sama nga ang atong paglahutay nakaapekto sa modernong-adlaw nga dulaanan. Alang kang kinsa kita mga talan-awon?
3 Sa Kalibotan ug sa mga Tawo: Usahay ang palaumagian sa balita nagpatik ug mga taho bahin sa mga kalihokan sa katawhan ni Jehova. Samtang atong pasalamatan ang maayong mga taho nga tinuod ug way-gidapigan sa pagpakiglabot sa atong buluhaton, kita makadahom usab ug daotang mga taho nga ipakaylap sa atong mga kaaway sa popanahon. Bisan pa niana, kita kinahanglang mopadayon sa pagrekomendar sa atong kaugalingon ingong mga ministro sa Diyos “pinaagi sa daotang taho ug sa maayong taho.” (2 Cor. 6:4, 8) Matin-aw ngadto sa matinud-anog-kasingkasing nga mga tigpaniid nga kita maoy tinuod nga mga tinun-an ni Jesu-Kristo.
4 Sa mga Manulonda: Ang espiritung mga linalang nagapaniid usab kanato. Ang Yawa ug ang iyang mga demonyo nagalantaw—apan may “dakong kasuko,” nga nagtinguha nga pugngan ang “buluhaton sa pagpamatuod bahin kang Jesus.” (Pin. 12:9, 12, 17) Ang matinumanong mga manulonda sa Diyos naglantaw ug nagmaya sa dihang ang usa ka makasasala maghinulsol. (Luc. 15:10) Kini angayng magpalig-on kanato sa pagkahibalo nga ang mga manulonda naglantaw sa atong ministeryo ingong ang labing dinalian, mapuslanong buluhaton nga ginahimo ibabaw sa yuta karong adlawa!—Pin. 14:6, 7.
5 Sa dihang imong mahibalag ang pagsupak o maghunahuna nga ang imong ministeryo dili mabungahon, hinumdomi nga ikaw ang sentro sa unibersohanong pagtagad. Ang imong malahutayong pagkamatinumanon nagpadayag ug dako bahin sa imong integridad. Ngadtongadto, ang imong “maayong pakigbugno sa pagtuo” magpaarang kanimo sa ‘pagpangupot pag-ayo sa kinabuhing walay kataposan.’—1 Tim. 6:12.