Unsa ka Hinungdanon ang Kristohanong Panag-ubanay?
1 “Walay tawong mabuhi nga bug-os nahibulag sa ubang mga tawo.” Kanang pahayaga sa usa ka ika-17ng-siglong magbabalak nagpalanog lamang sa giingon sa Bibliya bahin sa paninugdang gikinahanglan sa tawo—panag-ubanay. (Prov. 18:1) Ang atong Kristohanong panag-ubanay nagtagbaw niini nga panginahanglan. Diha sa unsang mapuslanong mga paagi?
2 Diha sa Ministeryo: Usa sa pangunang mga benepisyo mao ang paagi sa atong mga igsoon sa paglig-on ug pagpaluyo kanato diha sa publikong ministeryo. Gipadala ni Jesus ang iyang mga tinun-an nga “tinagurha” aron magsangyaw. (Mar. 6:7; Luc. 10:1) Subay niini nga sumbanan, kon kita mobuhat duyog sa uban diha sa pag-alagad sa kanataran, atong masinati ang katinuoran sa Ecclesiastes 4:9, 10. Samtang duyog natong tumanon ang atong ministeryo, ang pagtuo, pagkamasinugtanon, ug gugma sa atong mga kauban maghatag kanatog kaisog ug magpalagsik sa atong kasibot.
3 Alang sa Personal nga Tabang: Ang atong panag-igsoonay maoy tuboran usab sa pagdasig ug paggiya sa pagsagubang sa mga pagpit-os ug pagsukol sa mga tentasyon. Ang atong Kristohanong mga kauban tingali magpatagad kanato sa mga kasulatan nga magpunting sa atong personal nga mga gikabalak-an. Sila hayan moampo alang kanato, sama sa atong buhaton alang kanila. (2 Cor. 1:11) Ug dayag nga ang ilang maayong panig-ingnan magpalihok kanato sa maayong mga buhat ug magpalig-on kanato.
4 Diha sa mga Tigom: Ang panalangin sa Kristohanong panag-ubanay matagamtam kon kita regular nga motambong sa mga tigom sa kongregasyon. (Heb. 10:24, 25) Ang programa dagaya sa espirituwal nga instruksiyon, ug ang atong presensiya sa mga tigom magpasuod kanato sa atong mga isigkamagtutuo. Kini nga mga panagkatigom maghatag kanato ug kahigayonan nga madungog ang atong mga igsoong lalaki ug babaye nga magpahayag sa ilang pagtuo, gikan man sa plataporma o sa mga mamiminaw. (Roma 1:12) Ang atong bugkos sa panag-ubanay magkalalom samtang makighinabi kita sa dili pa ug human sa mga tigom. Ang maong mga okasyon maghatag kanatog kahigayonan sa pag-asoy sa ato mismong makapalig-ong mga kasinatian. Ang atong mga personalidad maapektohan sa mapuslanong paagi sa dihang kita dili magpanuko nga makig-uban niadtong nahigugma kang Jehova, sa iyang Pulong, sa iyang buluhaton, ug sa iyang katawhan.—Filip. 2:1, 2.
5 Gikinahanglan nato ang atong Kristohanong mga kauban. Kon wala sila, ang paglakaw sa sigpit nga dalan nga motultol sa kinabuhi mahimong mas malisod. Apan, pinaagi sa ilang gugma ug pagdasig kita makapadayon ngadto sa matarong nga bag-ong kalibotan ni Jehova.—Mat. 7:14.