Kana ba Babag sa Pagsangyaw?
1 Ang kadaghanang tawo nagakinabuhi nga puliki. Ang mga Saksi ni Jehova apil sa mga labing puliki—nagtuon sa Pulong sa Diyos, nagtambong sa mga tigom sa kongregasyon, ug nakig-ambit sa pag-alagad sa kanataran. Dugang pa, kita puliki sa pag-atiman sa sekular nga trabaho, buluhaton sa balay o eskuylahan, ug daghan pang ubang mga responsabilidad, nga ang tanan nagkinahanglag panahon. Kini makapalisod ilabina alang sa mga ulo sa pamilya.
2 Tungod sa dili maayong mga kahimtang sa ekonomiya sa lainlaing dapit, ang mga ulo sa mga panimalay tingali kinahanglang motrabaho sa daghang oras ug manlimbasog aron makabaton ug pangabuhian. Sa dihang ang mapugsanong sekular nga mga trabaho mokuha sa kadaghanan sa ilang panahon ug kusog, diyutay na lamang ang mahibilin kanila alang sa buluhatong pagsangyaw. Sanglit sila adunay obligasyon sa pagtagana sa materyal nga paagi sa ilang mga pamilya, tingali bation sa pipila nga mahimong limitado lamang ang ilang pagpakig-ambit diha sa ministeryo. (1 Tim. 5:8) Dili ikalimod, karong adlawa adunay daghang pagpit-os may kalabotan sa pagbaton sa mga kinahanglanon sa kinabuhi. Apan ang sekular nga trabaho sa usa angayng dili mahimong babag sa pagsangyaw sa maayong balita. (Mar. 13:10) Busa, kinahanglang susihon nato ang atong tinuod nga kahimtang.
3 Tungod kay ang talan-awon sa kalibotan kanunayng nagausab-usab, ang ulo sa pamilya hayan makiling sa paggugol ug daghan kaayong panahon sa trabaho, nga anaa sa hunahuna ang pagpadako pa sa iyang pinansiyal nga mga pondo alang sa wala damhang mga katalagman. (1 Cor. 7:31) Bisan kon ang dugang sekular nga trabaho maorag magtaganag ekstrang materyal nga mga butang o dugang mga kahigayonan para sa lulinghayaw ug kalingawan, kini ba maghimo sa pamilya nga mas malipayon ug mas kontento kon kini gihimo pinaagig pagsakripisyo sa panahon sa espirituwal nga mga pangagpas ug regular nga pagtambong sa tigom? Buot gayod natong likayan ang bisan unsa nga magpameligro sa atong espirituwalidad. Ang pagsunod sa tambag ni Jesus sa ‘pagtigom ug mga bahandi sa langit’ ug mahimong “dato ngadto sa Diyos” mao ang maalamong dalan.—Mat. 6:19-21; Luc. 12:15-21.
4 Unaha Pagpangita ang Intereses sa Gingharian: Gitudloan ni Jesus ang iyang mga sumusunod sa pagkab-ot sa espirituwal nga mga butang nga una sa tanang butang. Giagda niya sila: “Ayaw gayod pagkabalaka, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’” Nganong misulti siya niana? Siya misaysay: “Kay ang inyong langitnong Amahan nahibalo nga gikinahanglan ninyo kining tanang butanga.” Kon kita kombinsido gayod niana, walay mahimong babag nga mopugong kanato sa pagbuhat kon unsay sunod nga giingon ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang [kinahanglanong materyal] butang igadugang ra kaninyo.” Tinoon gayod sa Diyos nga atong mabatonan kining kinahanglanong mga butang! (Mat. 6:31-33) Dayag nga dili kini ang panahon nga magpalinga sa dili angayng kabalaka sa pangabuhian o sa tinguha nga makabaton ug haruhay nga kahimtang diha sa sistema sa mga butang nga mahanaw sa dili madugay.—1 Ped. 5:7; 1 Juan 2:15-17.
5 Ang pangunang katuyoan sa sekular nga trabaho mao ang pagtagana sa materyal nga mga panginahanglan sa usa. Apan unsa ka daghan ang atong gikinahanglan? Ang apostol nga si Pablo misulat: “Kon kita adunay makaon ug ikabesti, kita magmakontento na niining mga butanga.” Kita ba naningkamot nga makabaton ug labaw pa niana? Kon mao, mahimo natong anihon ang mga sangpotanan nga gipasidaan ni Pablo: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” (1 Tim. 6:8, 9; Mat. 6:24; Luc. 14:33) Unsaon nato sa pagtino kon kita ba nababagan gumikan sa hinobrang mga tinguha?
6 Kon tungod sa atong sekular nga mga pangagpas ang atong pagpakig-ambit sa pag-alagad sa kanataran namenosan o napakyas sa pagkaamgo sa panginahanglan sa paghimog mga sakripisyo alang sa maayong balita, nan adunay panginahanglan sa pagpasibo sa atong mga unahonon. (Heb. 13:15, 16) Ang mas kasarangang estilo sa kinabuhi makatabang pag-ayo sa pagwagtang niini nga babag sa atong pagsangyaw. Ang intereses sa Gingharian kinahanglan kanunayng panguna maylabot sa paggamit sa atong panahon ug kusog.
7 Ang Paghago nga Dili Makawang: Ang mga pulong ni Pablo nagdasig kanato nga kanunayng “puliki diha sa buluhaton sa Ginoo, nga nahibalo nga ang [atong] paghago dili makawang may kalabotan sa Ginoo.” (1 Cor. 15:58) Ang pangunang “buluhaton sa Ginoo” mao ang pagsangyaw sa Gingharian ug paghimog-tinun-an nga buluhaton. (Mat. 24:14; 28:19, 20) Aron makapakig-ambit sa bug-os kutob sa maarangan, kinahanglang mag-eskedyul kitag panahon alang sa pag-alagad sa kanataran matag semana ug maningkamot nga dili gamiton kana nga panahon alang sa bisan unsang ubang pangagpas. (Efe. 5:15-17) Nan, dili ang sekular nga trabaho ni bisan unsa pa man ang mahimong babag sa atong ministeryo.
8 Sa dihang atong itanyag ang atong kaugalingon sa pagpakig-ambit sa mga kamatuoran sa Bibliya ngadto sa uban, atong matagamtam ang mas dakong kalipay nga nagsumikad sa paghatag. (Buh. 20:35) Pinaagig pagpangagpas sa buluhatong pagsangyaw sa Gingharian, kita makalantaw sa umaabot nga may pagsalig, “kay ang Diyos dili kay dili-matarong nga kalimtan ang [atong] buhat ug ang gugma nga [atong] gipakita alang sa iyang ngalan.”—Heb. 6:10.