Ang Pagpugas nga Madagayaon Magpatunghag Dagayang mga Panalangin
1 Kitang tanan nagalaom sa katumanan sa dagkong mga saad nga anaa sa Pulong sa Diyos. Bisan karon, gitagana ni Jehova ang daghang panalangin nga makadugang ug kalipay sa atong kinabuhi. Apan, ang gidak-on sa kaayohan nga atong madawat sa personal nga paagi nagdepende gayod sa paningkamot nga atong himoon. Sama sa giingon ni apostol Pablo, “siya nga nagapugas nga madagayaon magaani usab nga madagayaon.” (2 Cor. 9:6) Tagda ang duha ka bahin diin mapadapat kining prinsipyoha.
2 Atong Personal nga Ministeryo: Ang pagpaambit sa maayong balita ngadto sa mga tawo sa panahong atong maarangan sa pagpamatuod magdalag daghang panalangin. (Prov. 3:27, 28) Nga dalayegon, daghan ang nagpugas nga madagayaon pinaagi sa pagpalapad sa ilang pakig-ambit diha sa ministeryo, nga naglakip sa oksilyare o regular nga pagpayunir. Kitang tanan makapugas nga madagayaon pinaagi sa matanlagong pagbalik aron ugmaron ang interes nga nakaplagan ug pinaagi sa pagtanyag ug pagtuon sa Bibliya sa dihang ang higayon angay niana. (Roma 12:11) Ang pagpanikaysikay sa atong kaugalingon niining mga paagiha moresulta sa makapadasig nga mga eksperyensiya ug dugang kalipay diha sa atong ministeryo.
3 Pagpaluyo sa Intereses sa Gingharian: Si Pablo nagkomento bahin sa ‘pagpugas nga madagayaon’ maylabot sa materyal nga pagpanghatag. (2 Cor. 9:6, 7, 11, 13) Karong panahona, daghan ang atong mahimo sa pisikal ug materyal nga paagi sa pagpaluyo sa intereses sa Gingharian. Makabulig kita sa pagpanukod ug mga Kingdom Hall ug mga Assembly Hall. Makaboluntaryo usab kita sa pagpakig-ambit sa paglimpiyo ug pagmentinar niining mga sentro sa matuod nga pagsimba. Dugang pa, makaamot kita sa pinansiyal nga paagi alang sa lokal nga mga galastohan sa kongregasyon maingon man sa tibuok-kalibotang buluhaton sa pagsangyaw sa Gingharian ug paghimog tinun-an. Samtang buhaton natong tanan ang atong bahin, pagkamalipayon natong makita ang dagayang panalangin ni Jehova niining gisugo-sa-Diyos nga buluhaton!—Mal. 3:10; Luc. 6:38.
4 Ang Pulong sa Diyos nagtambag kanato nga “magbuhat sa maayo, nga magmadato sa maayong mga buhat, nga magmahinatagon, andam sa pagpaambit.” Samtang atong tumanon ang maong tambag, atong matagamtam ang dagayang mga panalangin karon. Sa samang panahon, kita “maampingong magtipig alang sa [atong] kaugalingon ug usa ka maayong patukoranan alang sa umalabot [ug] sa tinuod nga kinabuhi” nga umaabot.—1 Tim. 6:18, 19.