Si Jehova Takos Gayod nga Pagadayegon
Ang Panihapon sa Ginoo Saulogon sa Abril 16
1 Mosamot pa gayod ang atong kahinam samtang nagakaduol ang Abril 16, 2003. Nianang gabhiona atong saulogon ang kamatayon ni Jesus, duyog sa minilyong isigkamagsisimba sa tibuok kalibotan nga nagahimaya sa ngalan ni Jehova. Si Jehova takos sa tanan natong pagdayeg tungod sa kahibulongang tagana nga lukat. Pinaagi sa lukat, ihatag niya ang talagsaong mga panalangin sa tanang masinugtanong katawhan. Tibuok kasingkasing kitang moduyog sa salmista sa pag-ingon: “Si Jehova dako ug takos gayod nga pagadayegon.”—Sal. 145:3.
2 Ang Memoryal maoy panahon sa pagpalandong sa pagkamaayo sa Diyos ug sa utang kabubut-on nato kang Jehova tungod sa pagpadala sa “iyang bugtong nga Anak nganhi sa kalibotan aron kita makabaton ug kinabuhi pinaagi kaniya.” (1 Juan 4:9, 10) Pinaagi sa masinugtanong pagsaulog sa Panihapon sa Ginoo matisok sa atong kasingkasing nga “si Jehova mapuangoron ug maluluy-on . . . ug dako sa mahigugmaong-kalulot.” (Sal. 145:8) Sa pagkatinuod, ang lukat mao ang kinadak-ang kapahayagan sa gugma ni Jehova alang sa tanang katawhan. (Juan 3:16) Sa dihang tagdon nato ang gugma sa Diyos ug palandongon ang matinumanong dalan sa integridad ni Jesus, kita matukmod sa pagdayeg kang Jehova. Hangtod sa kahangtoran, kita magadayeg kaniya tungod sa iyang walay-kinutobang gugma nga gipakita aron mabatonan nato ang kinabuhing walay kataposan.—Sal. 145:1, 2.
3 Tabangi ang Uban sa Pagdayeg Kang Jehova: Ang pagpabili sa kinalabwang gasa sa Diyos nga lukat magtukmod kanato sa pagdapit sa uban nga moduyog kanato sa pagdayeg kang Jehova. Ang salmista giinspirar sa pagsulat: “Sa paghisgot sa madagayaon nimong pagkamaayo sila madasigong magaasoy, ug tungod sa imong pagkamatarong sila magahugyaw sa kalipay.” (Sal. 145:7) Sa miaging tuig lamang, ang mga Saksi ni Jehova sa tibuok kalibotan migugol ug kapin sa usa ka bilyong oras sa buluhatong pagsangyaw. Unsay resulta sa ilang mga panikaysikay? Matag semana, may aberids nga kapin sa 5,100 ka tawo ang nabawtismohan agig simbolo sa ilang pahinungod kang Jehova. Uban sa total nga 15,597,746 nga mitambong sa Memoryal, lakip sa kapin sa 9 ka milyon nga wala pa makasugod sa pagdayeg kang Jehova ingong mga magmamantala sa maayong balita, dunay dakong posibilidad alang sa dugang pag-uswag! Ingong mga magmamantala sa Gingharian, gimahal nato ang atong pribilehiyo sa pagmantala sa maayong balita ug sa pagliso sa kasingkasing sa uban ngadto kang Jehova, sa iyang Anak, ug sa Gingharian.
4 Ang usa ka maayong paagi sa pagdasig sa uban sa pagpasidungog kang Jehova mao ang pagdapit kanila sa pagduyog kanato sa pagsaulog sa Panihapon sa Ginoo. Nalista na ba nimo ang gusto mong imbitahon maingon man ang uban nga kinahanglang pahinumdoman sa maong adlaw ug oras? Nahatagan na ba nimog imbitasyon ang tanang anaa sa imong listahan? Kon wala pa, paningkamoting madapit sila sa nahibiling panahon. Tabangi sila nga mapabilhan ang katuyoan sa maong kasaulogan. Panahon sa kasaulogan, magmaalisto sa pagtimbaya sa mga bisita. Abiabiha sila, ipailaila sila sa uban, ug dayega sila nga nakatambong.
5 Pinaagi sa pagtambong sa Memoryal madasig ang mga bag-ohan sa paghimog espirituwal nga pag-uswag. Usa ka estudyante sa Bibliya nga nag-antos gumikan sa post-traumatic stress disorder, nga nakapalisod pag-ayo kaniya sa paggawas diha sa publiko, mitambong sa Memoryal. Sa dihang gipangutana siya bahin sa maong tigom, siya miingon: “Kadto maoy labing balaan nga gabii, ug didto ako.” Sukad niadto, misugod na siya sa pagtambong sa mga tigom.
6 Human sa Memoryal: Unsay mahimo aron matabangan ang maong mga interesado nga mahimong mga magdadayeg ni Jehova? Matikdan sa mga ansiyano ang mga bag-ohan nga anaa sa Memoryal ug mohimog mga kahikayan alang sa kuwalipikadong mga magmamantala sa pagduaw dayon kanila human sa Memoryal aron marepaso ang makapadasig nga mga punto nga ilang nakat-onan ug namatikdan. Ang uban hayan gustong makabaton ug pagtuon sa Bibliya sa balay. Angay usab silang dapiton nga motambong sa tanang senemanang mga tigom sa kongregasyon, tungod kay ang regular nga pagtambong makapauswag sa ilang kahibalo sa Bibliya.
7 Ang mga kahikayan ginahimo aron madasig ang tanang di-regular ug mga di-aktibo nga makanunayong motambong sa mga tigom. Kon hangyoon ka sa mga ansiyano sa pag-abag ug usa nga nahimong di-aktibo aron makapakig-ambit pag-usab sa pag-alagad sa kanataran, dawata kana nga mahinangpon. Ang pagpakita sa maong mahigugmaong kahingawa alang sa atong mga igsoon maoy uyon sa awhag ni apostol Pablo: “Samtang kita may kahigayonan alang niini, buhaton nato ang maayo ngadto sa tanan, apan ilabina kanila nga atong kabanay sa pagtuo.”—Gal. 6:10.
8 Hinaot kitang tanan mohimog linaing panikaysikay nga makatambong sa Memoryal sa Abril 16. Dili gayod nato sipyaton kining labing balaan nga okasyon sa pagdayeg kang Jehova. Oo, karon ug hangtod sa kahangtoran, dayegon nato si Jehova tungod sa iyang dagkong mga buhat!—Sal. 145:21.