Branch Letter

Minahal nga mga Magmamantala sa Gingharian:

Didto sa tibuok-kalibotang hedkuwarter, ang usa ka dakong bahin nga gidugang sa imprentahan sa Wallkill, New York nahuman na ug gigamit na karon. Gipahiluna na ang duha ka bag-ong imprentahan nga makapatik ug gidaghanong 90,000 ka magasin kada oras, maingon man ang bag-ong himan nga makahimog 120 ka gahig-hapin nga mga libro kada minuto. Tungod kay gibalhin man ang imprentahan ngadto sa Wallkill, gibaligya ang tinukod sa 360 Furman Street sa Brooklyn. Puliki na kaayo karon ang mga igsoon sa pag-ayo sa mga tinukod sa 117 Adams Street aron mapahiluna ang mga departamento nga mamalhin gikan sa 360 Furman Street.

Tungod sa pagbalhin sa imprentahan, kinahanglang mobalhin usab ang mga 300 ka igsoong lalaki ug babaye gikan sa Bethel sa Brooklyn ngadto sa Wallkill. Dugang pa, ang duolag 100 ka boluntaryo nga nag-atiman sa mga panginahanglan sa kompiyuter ug pagprograma niana sa sanga gibalhin gikan sa Wallkill ngadto sa Brooklyn, nga mao na karon ang dapit sa pangunang mga kalihokan alang sa Information Systems Department.

Dinhi sa Pilipinas, ang panahon sa Memoryal maoy panahon sa masibotong kalihokan. Sa Abril, ang mga oksilyare payunir mikabat ug 16,271, ug nakab-ot ang bag-ong kinatas-ang ihap nga 120,074 ka pagtuon sa Bibliya. Ang usa ka bag-ong kinatas-ang ihap nga 438,418 mitambong sa pagsaulog sa Panihapon sa Ginoo.

Uban kaninyo, kami nagalantaw sa unahan nga “puliki diha sa buluhaton sa Ginoo” samtang mosugod kita sa 2005 nga tuig sa pag-alagad.​—1 Cor. 15:58.

Inyong mga igsoon,

Sangang Buhatan sa Pilipinas