Espesyal nga Kampanya Aron Iapod-apod ang Bag-ong Brosyur
1 Daghang tawo karon ang nabalaka sa mga kahimtang sa kalibotan, apan pipila lang ang nakasabot kon nganong ingon niini ang kahimtang, kon unsay anaa sa umaabot, ug kon unsay kinahanglan nilang buhaton aron makalabang-buhi sa umaabot nga paghukom. (Ezeq. 9:4) Aron matabangan sila nga makasabot sa kahinungdanon sa atong mga panahon, usa ka espesyal nga kampanya sa pag-apod-apod sa bag-ong brosyur nga Padayon sa Pagbantay! pagahimoon sa tibuok nasod sugod sa Lunes, Marso 21, hangtod sa Dominggo, Abril 17.
2 Ang brosyur mahimong itanyag sa dihang mamalaybalay, magbalikduaw, magsangyaw sa di-pormal nga paagi, o sa dihang anaa sa publikong mga dapit. Apan, ang Padayon sa Pagbantay! dili gayod iapod-apod sa walay pili nga paagi. Hinunoa, ang mga brosyur ipahimutang lamang niadtong magpakitag interes sa giingon sa Bibliya bahin sa kahulogan sa mga panghitabo sa kalibotan. Kadtong dili interesado sa mensahe mahimong hatagan na lang ug usa ka tract.
3 Hayan makuha nimo ang pagtagad sa usa ka tawo pinaagi sa pag-ingon:
◼ “Daghang tawo ang nabalaka bahin sa seryosong mga problema ug makapakurat nga mga hitabo nga subsob mahitabo karon. [Paghatag ug pananglitan nga nahibaloan sa lokal.] Nahibalo ka ba nga ang maong mga butang gitagna diha sa Bibliya? [Tugoting motubag. Dayon basaha ang teksto sa Bibliya nga haom sa gihatag nga pananglitan, sama sa Mateo 24:3, 7, 8; Lucas 21:7, 10, 11; o 2 Timoteo 3:1-5.] Ang Bibliya nagbutyag sa kahulogan sa atong mga panahon ug kon unsay anaa sa umaabot alang sa katawhan. Gusto ba nimong masayod ug dugang pa? [Tugoting motubag. Itanyag ang brosyur kon adunay gipakitang interes.] Ang brosyur mabatonan nga walay bayad. Kon gusto nimong mohatag ug gamayng donasyon para sa among tibuok-kalibotang buluhaton, malipay kami sa pagdawat niana.”
4 O hayan makaplagan nimo kining paagiha nga epektibo:
◼ “Daghan karon ang naguol tungod sa makapakurat nga mga hitabo o tungod sa grabeng personal nga trahedya. Nahibulong ang uban kon nganong wala mangilabot ang Diyos aron masanta kining mga butanga. Ang Bibliya nagpasalig kanato nga ang Diyos molihok sa dili madugay aron hanawon ang pag-antos sa katawhan. Matikdi ang mga kaayohan nga dad-on sa Diyos ngadto sa katawhan. [Basaha ang Salmo 37:10, 11.] Gusto ba nimong masayod ug dugang pa?” Taposa sama sa gilaraw sa ibabaw.
5 Paningkamoting makuha ang ngalan ug adres sa matag tawo nga modawat ug kopya sa brosyur, ug hikaya nga mobalik aron sa pag-ugmad sa interes. Ang mga sugyot kon sa unsang paagi himoon kini makita diha sa Abril 2005 nga gula sa Atong Ministeryo sa Gingharian. Kon ang tawo nagpakitag tinuod nga interes sa unang duaw, mahimong sugdan gilayon nimo ang pagtuon sa Bibliya ginamit ang Padayon sa Pagbantay! o laing publikasyon, sama sa brosyur nga Gikinahanglan.
6 Ang mga kopya sa bag-ong brosyur mabatonan human sa Tigom sa Pag-alagad sa dihang hisgotan kining artikuloha. Gisugyot nga ang mga magmamantala ug mga payunir magkuha una ug igoigo lang nga ilang ikaapod-apod sa unang pipila ka adlaw sa kampanya. Hinaot panalanginan ni Jehova kining espesyal nga kalihokan alang sa iyang kadayeganan ug alang sa kaayohan sa matinud-anog-kasingkasing nga mga tawo bisan asa.—Sal. 90:17.