Dayega si Jehova Diha sa Dako nga Kongregasyon
1, 2. Unsang kahigayonan ang gihatag kanato sa distritong kombensiyon, ug unsa ang usa ka paagi nga atong mahimo kini?
1 Ang atong distritong mga kombensiyon matag tuig maghatag kanato ug talagsaong kahigayonan sa paghimaya kang Jehova. Bation nato ang sama sa gibati ni David, kinsa miawit: “Pagadayegon ko ikaw diha sa dako nga kongregasyon; pagadayegon ko ikaw taliwala sa daghang katawhan.” (Sal. 35:18) Sa umaabot nga “Diyosnong Pagkamasinugtanon” nga Distritong Kombensiyon, sa unsang paagi atong maseguro nga madayeg nato si Jehova ingong nahiusa nga katawhan?
2 Ang usa ka paagi nga atong mahimo kana maoy pinaagi sa atong panggawi. Ang nagdumala sa usa ka pasilidad sa kombensiyon miingon: “Binase sa inyong mga kombensiyon, among giingnan ang ubang relihiyosong mga grupo nga gustong moabang sa pasilidad sa pagtambong ug pagtan-aw kon giunsa paghikay sa mga Saksi ni Jehova ang kombensiyon, tungod kay sila adunay maayo kaayong kahikayan.” Pinaagi sa atong panagway, kooperasyon, ug panggawi, ang matag usa makaamot sa pagpahayag nianang maanindot nga pagdayeg nga angayng ihatag sa atong Diyos.—1 Ped. 2:12.
3, 4. Sa unsang paagi ang pagkamakasaranganon motabang kanato sa pagpamesti nga nahiangay sa Kristohanong mga ministro, diha man sa kombensiyon ug pagkahuman sa mga sesyon?
3 Personal nga Panagway: Ang pagpamesti ug pagpanghindik nga makahatag ug kadayeganan kang Jehova nagkinahanglag pagkamakasaranganon. (1 Tim. 2:9) Ang librong Tunghaan sa Ministeryo, panid 132, nag-ingon: “Ang usa ka makasaranganong tawo mahunahunaon nga dili makapasilo sa uban ug dili modanig sobrang pagtagad sa iyang kaugalingon.” Sa daghang kayutaan, ang dili-makasaranganong sinina ordinaryo na lang. Apan, pabilhan ni Jehova ang paningkamot nga atong pagahimoon sa paghawas kaniya sa hustong paagi. (Buh. 15:14) Bisan tuod ang kombensiyon himoon tingali diha sa usa ka dulaanan o lulinghayawanan nga pasilidad, ang maong panagkatigom mahimong atong “dakong kongregasyon” sulod sa tulo ka adlaw nga kombensiyon. Busa, samtang magkatigom kita atubangan kang Jehova, kita angayng mamesti nga may kaligdong nga takos sa labing halangdong Persona sa uniberso.—1 Cron. 29:11.
4 Angay usab natong tagdon ang atong panagway inigkahuman sa paniklop nga sesyon sa matag adlaw. Bisan tuod gusto tingali natong magsul-ob ug komportableng mga sinina sa dihang maglulinghayaw o sa dihang mangaon sa restawran, hinungdanon nga ang atong pagpamesti ug pagpanghindik haom gihapon alang niadtong “nagpaila nga masimbahon sa Diyos.” (1 Tim. 2:10) Ang dalawatong sinina dili matino pinaagi sa kon unsay popular diha sa kalibotan. (1 Juan 2:16, 17) Ang atong Kristohanong mga publikasyon naghatag ug mapuslanong mga ilustrasyon bahin sa makasaranganon ug hapsay nga sinina alang sa mga lalaki ug mga babaye diha sa nagkalainlaing mga kahimtang. Ang pagtaod sa atong mga badge card samtang anaa sa siyudad nga giasembliyahan magsilbing pahinumdom nga kita Kristohanong mga ministro sa tanang panahon.—2 Cor. 6:3, 4.
5. Unsang maayong panig-ingnan ang gihatag sa katawhan sa adlaw ni Esdras?
5 Tahora ang Lamesa ni Jehova: Sa mga adlaw ni Esdras sa dihang nangandam siya sa pagbasa sa Kasulatan, ‘ang katawhan mitindog’ agig pagtahod ug kahinangop sa instruksiyon nga hapit na nilang dawaton. Samtang si Esdras nagpadayon sa pagbasa, ‘ang tibuok katawhan nagpatalinghog.’ (Neh. 8:3, 5, 6) Nasabtan nila nga si Jehova maoy nagsulti kanila, ug kini nagtukmod kanila sa pagsanong pinaagi sa matinahorong pagpatalinghog. Ingon ba usab niana ang atong pagsanong panahon sa atong mga kombensiyon?
6, 7. Sa unsang paagi atong ikapakita ang atong pagtahod sa espirituwal nga lamesa ni Jehova?
6 Ang Soberanong Ginoo sa uniberso naghikay ug dakong bangkete sa atong atubangan. (Isa. 25:6; 1 Cor. 10:21) Kon ato gayong gipabilhan ang atong luna diha sa espirituwal nga lamesa ni Jehova, ang atong tumong mao ang pagtambong sa bug-os tulo ka adlaw sa kombensiyon. Nakahikay ka na ba sa imong kasak-an, transportasyon, ug bakasyon gikan sa sekular nga trabaho? Nakagahin ka na bag igong panahon sa pagpangandam ug pagbiyahe aron sayo kang makaabot sa asembliyahanan aron makapangitag kalingkoran, makig-uban sa atong kaigsoonan, ug makigduyog kanila sa pagdayeg kang Jehova sa pangbukas nga awit ug pag-ampo?—Sal. 147:1.
7 Ang pagtahod sa lamesa ni Jehova motukmod kanato sa pagpatalinghog pag-ayo sa programa ug sa dili pagpakig-estorya sa uban, pagkaonkaon, o paglakawlakaw diha sa mga pasilyo samtang nagpadayon pa ang programa. Pinaagi sa matinumanon ug maalamong ulipon nga matang, si Jehova nagtaganag espirituwal nga pagkaon nga atong gikinahanglan karon. (Mat. 24:45) Dili nato angayng sipyaton kini. Ang mga ginikanan angayng molingkod tapad sa ilang mga anak ug tabangan sila nga makapahimulos sa bug-os.—Deut. 31:12.
8. Unsay gisugyot kanato nga buhaton panahon sa tingpaniudto, ug ngano?
8 Gisugyot nga magdala kitag paniudto imbes mobiya sa giasembliyahan aron maniudto sa gawas. Dalayegon nga kadaghanan sa mga nanambong nagsunod gayod ning maong sugyot panahon sa kombensiyon sa miaging tuig. Dalayegon gayod kon ingon usab niini ang himoon sa tanan niining tuiga! (Heb. 13:17) Kining kahikayana naghatag ug maayong kahigayonan sa pagpahimulos sa makapalig-ong panag-ubanay sa atong mga igsoon ug makaamot sa panaghiusa ug pakigdait nga makapasidungog kang Jehova.—Sal. 133:1.
9, 10. Unsang dugang kahigayonan sa pagdayeg kang Jehova ang atong mahimo panahon sa kombensiyon?
9 Di-Pormal nga Pagsangyaw: Samtang magbiyahe sa pagpaingon ug pagbalik gikan sa kombensiyon, kita adunay daghang kahigayonan sa pagdayeg kang Jehova pinaagi sa atong mga ngabil. (Heb. 13:15) Nangaon man kita diha sa restawran o nakig-estorya sa mga kawani sa hotel, mangita kitag kahigayonan nga makasangyaw. Ang atong hunahuna ug kasingkasing mapunog espirituwal nga impormasyon. Atong ipaambit kining maayong mga butang ngadto sa atong mahimamat sa di-pormal nga paagi.—1 Ped. 3:15.
10 Mahinamon kaayo kitang nagapaabot ning maong kahigayonan sa pagdayeg kang Jehova “taliwala sa mga nagkatigom nga panon.” (Sal. 26:12) Hinaot magkahiusa kita sa pagdayeg kang Jehova sa “Diyosnong Pagkamasinugtanon” nga Distritong Kombensiyon.
[Kahon sa panid 5]
Mga Pahinumdom sa Distritong Kombensiyon
◼ Mga Oras sa Programa: Ang programa magsugod sa alas 8:30 s.b. sa Biyernes ug Sabado, ug alas 9:00 s.b. sa Dominggo. Pipila ka minutos sa dili pa magsugod ang sesyon, ang tsirman molingkod sa plataporma samtang patokaron ang pasiunang musika sa Gingharian. Kitang tanan angayng manglingkod na nianang higayona aron ang programa magsugod sa maligdong nga paagi. Ang programa matapos sa alas 4:35 s.h. sa Biyernes ug Sabado ug alas 4:10 s.h. sa Dominggo.
◼ Parkinganan: Diha sa tanang dapit sa kombensiyon, maningkamot kami sa paghimog mga kahikayan alang sa parkinganan. Ang tanang may sakyanan angayng mosunod sa direksiyon sa mga atendant sa parkinganan aron dili malisdan ang uban. Tungod kay kasagarang limitado ra man ang parkinganan diha sa atong mga giasembliyahan, labing maayo kon mag-uban na lang sa usa ka sakyanan imbes usa o duha lang ka tawo sa kada sakyanan.
◼ Pagreserba ug mga Lingkoranan: Ang mga lingkoranan mahimong ireserba lamang alang niadtong nagbiyahe uban kanimo sa samang sakyanan o kauban nimo sa balay.
◼ Mga Donasyon: Dakong kantidad ang magasto sa paghikay ug distritong kombensiyon. Ikapakita nato ang atong pagpabili pinaagi sa paghatag ug boluntaryong mga amot ngadto sa tibuok-kalibotang buluhaton diha sa atong Kingdom Hall o sa kombensiyon. Ang bisan unsang tseke nga iamot diha sa kombensiyon kinahanglang himoong payable to “Watch Tower.”
◼ Paniudto: Palihog pagdalag balon imbes mobiya sa giasembliyahan aron sa pagpalit ug pagkaon diha sa restawran o sa mga namaligyag pagkaon panahon sa tingpaniudto. Ang usa ka gamayng sudlanan nga ikabutang ra sa ilalom sa lingkoranan mahimong gamiton. Ang dagkong mga sudlanan alang sa pamilya, mabuak nga mga sudlanan, ug mga alkoholikong ilimnon dili angayng dad-on ngadto sa kombensiyon.
◼ Pagrekord: Ang bisan unsang matang sa mga rekorder dili angayng ikonektar sa elektrikal o sound system sa pasilidad ug mahimong gamiton lamang nga dili makabalda sa uban.
◼ Bawtismo: Ang mga kandidato sa bawtismo kinahanglang manglingkod na diha sa gigahin nga luna sa dili pa magsugod ang programa sa Sabado sa buntag. Ang matag usa kinahanglang magdala ug kasarangang sinina nga humdonon ug tualya. Aron maseguro nga ang ilang isul-ob maoy haom sa okasyon, ang mga ansiyano nga morepaso sa mga pangutana diha sa librong Organisado uban sa mga kandidato sa bawtismo angayng maglakip niini sa ilang panaghisgot.
◼ Mga Badge Card: Palihog itaod ang badge card sa tanang panahon samtang anaa sa kombensiyon ug samtang nagbiyahe sa pagpaingon ug pagpauli gikan didto. Mabatonan kini diha sa inyong kongregasyon. Pangayo dayon ug mga badge card para sa imong pamilya mentras layo pa ang kombensiyon.
◼ Pagkuhag mga Letrato: Kon duna kay gustong letratohan, palihog ayaw paggamit ug flash panahon sa mga sesyon.
◼ Mga Pager ug mga Cell Phone: Angay kining patyon o ibutang sa silent mode panahon sa sesyon aron dili makabalda.
◼ Mga Aksidente ug Emerhensiya: Kon dunay motunghang emerhensiya diha sa kombensiyon, palihog kontaka ang atendant nga anaa sa imong duol, nga maoy mopahibalo gilayon sa First Aid Department aron masuta sa atong takos nga mga igsoon sa first-aid ang kaseryoso sa kahimtang ug makahatag sa gikinahanglang ayuda.