Eskedyul sa Pamilya—Ang Pagtuon sa Pamilya
1 Ang kinadak-ang gasa nga imong ikapaambit ingong Kristohanong ginikanan ngadto sa imong mga anak mao ang imong gugma kang Jehova. Ang hinungdanong panahon nga buhaton kini maoy ‘sa dihang maglingkod ka sa inyong balay’ alang sa senemanang pagtuon sa Bibliya sa pamilya. (Deut. 6:5-7) Aduna ka man ing magtutuong kapikas, nagpuyo sa usa ka panimalay nga nabahin sa relihiyon, o nag-inusarang ginikanan, imong matabangan ang imong mga anak nga masuod kanimo ug kang Jehova pinaagi sa pagbaton ug regular nga pagtuon sa pamilya.
2 Pagsugod sa Pagtuon sa Pamilya: Ang unang tikang mao ang pagbatasan sa pagtuon ingong pamilya. Kon dili ka makaseguro kon kanus-a himoon ang maong pagtuon, nganong dili hisgotan kini ingong pamilya? (Prov. 15:22) Kon ikaw adunay mas bata pang mga anak, palabihon tingali nimong mohimog ubay-ubayng mugbo nga mga panagtuon sa tibuok semana. Tinoa kon unsay labing epektibo para sa imong pamilya. Pagtakda ug espesipikong oras alang sa pagtuon diha sa inyong eskedyul sa pamilya, ug sunda gayod kana.
3 Unsay mahimo ninyong tun-an? Ang pipila nagtuon sa leksiyon nga pagakonsiderahon sa umaabot nga Pagtuon sa Libro sa Kongregasyon o Pagtuon sa Bantayanang Torre. Ang uban nagtuon sa materyal nga gidisenyo ilabina alang sa mga batan-on. Ang amahan sa usa ka batang lalaki ug babaye miingon: “Ang usa ka butang nga naghimo sa among pagtuon nga kahinangpan pag-ayo sa semana alang sa mga bata mao nga dramahon namo ang mga esena gikan sa Akong Basahon sa mga Estorya sa Bibliya. Ang lalom nga pagkatisok ug pagsabot nga moresulta mas importante kay sa kon pila ka mga parapo ang among mahisgotan.”
4 Pagtuon Matag Semana: Ang pagtuon sa pamilya kinahanglang himoon sa regular nga paagi ug kahinaman pag-ayo sa tanang membro sa pamilya. Mahimong ipasibo ang adlaw ug oras sa pagdumala sa wala-damhang mga situwasyon. Adunay mga okasyon usab nga kinahanglang ipasibo ang ulohan nga hisgotan. Apan ang bisan unsang gikinahanglang mga pagpasibo angayng dili makapausab sa naandan na nga eskedyul sa pagtuon sa pamilya. Diha sa usa ka panimalay, ang anak nga babaye miingon: “Kon ang oras sa among pagtuon kinahanglang usbon, ipaskin kanunay ni Papa ang bag-ong oras diha sa repridyeretor aron kaming tanan masayod kon kanus-a kana himoon.” Pagkadalayegon ang maong mga panikaysikay aron mahuptang regular ang pagtuon sa pamilya! Samtang magpadayon ka sa pagmatuto sa imong mga anak “sa disiplina ug sa pagdumala-sa-kaisipan ni Jehova,” imong gipasundayag ang imong gugma kanila ug sa atong langitnong Amahan.—Efe. 6:4.