Ugmara ang Interes Pinaagig Ruta sa Magasin
1. Sa unsang paagi atong magamit ang ruta sa magasin sa pag-ugmad sa interes?
1 Daghang tawo nga atong mahibalag diha sa ministeryo ang maabiabihon sa atong mga pagduaw ug malipayong modawat sa atong mga literatura apan magpanuko nga modawat ug regular nga pagtuon sa Bibliya. Ang usa ka paagi sa pag-ugmad sa ilang interes maoy pinaagig ruta sa magasin. Sa dihang makapahimutang kag mga magasin, irekord ang ngalan ug adres sa maong tawo, ang petsa sa pagduaw, ang mga gula nga napahimutang, ug ang teksto nga nahisgotan, uban sa bisan unsang mga butang nga imong namatikdan nga mahimong magpaila sa mga gikaikagan sa maong tawo. Sa dihang moabot ang bag-ong mga gula sa mga magasin, pangitag mga punto nga makapadani sa imong ruta, ug ipasiugda kana sa dihang imong duawon siya. (1 Cor. 9:19-23) Sa ngadtongadto, aduna tingali silay mabasahan gikan sa atong mga magasin nga makapainteres kanila ug magtukmod kanila sa pagkat-on pag dugang.
2. Nganong dinalian alang sa mga tawo ang pagpangita kang Jehova karon, ug unsa pay atong dugang mahimo aron matabangan sila?
2 Ugaling lang, atong namatikdan nga kadaghanan sa mga tawo dili mahimong mga alagad ni Jehova pinaagi lamang sa pagbasa sa mga magasin sa ilang kaugalingon. Sanglit dinalian gayod alang sa mga tawo ang pagpangita kang Jehova karon, unsa pay atong dugang mahimo aron matabangan sila? (Sof. 2:2, 3; Pin. 14:6, 7) Atong maugmad ang ilang interes pinaagi sa pagbasa kanila sa maayong pagkapili nga teksto sa matag higayon nga atong ihatod ang mga magasin.
3. (a) Sa unsang paagi atong maandam ang serye sa usa-ka-teksto nga mga panaghisgot? (b) Unsang mga ulohana ang gikabalak-an pag-ayo sa mga tawo sa inyong teritoryo?
3 Usa-ka-Teksto nga mga Panaghisgot: Hunahunaa kadtong imong ruta sa magasin, ug pag-andam ug serye sa usa-ka-teksto nga mga panaghisgot alang sa matag espesipikong panginahanglan sa maong tawo. (Filip. 2:4) Pananglitan, kon ang usa bag-o lang namatyan ug minahal, tingali mohimo kag ubay-ubayng balikduaw aron mahisgotan kon unsay gisulti sa Bibliya bahin sa kahimtang sa mga patay ug sa paglaom sa pagkabanhaw. Ang impormasyon diha sa librong Nangatarongan ubos sa mga ulohang “Kamatayon” ug “Pagkabanhaw” mahimong gamiton sa pagpangandam niining usa-ka-teksto nga mga panaghisgot. Ang dugang mga panaghisgot sa nalangkit nga mga ulohan, sama sa kon sa unsang paagi ang sakit, pagkatigulang, ug kamatayon bug-os hanawon, hayan dali rang isunod. Ang tumong mao ang pagpangita ug usa ka ulohan nga makapainteres sa maong tawo ug anam-anam nga ipakita kaniya kon unsay giingon sa Bibliya bahin niana.
4. Nganong hinungdanon nga ipaambit ang pagsabot sa dihang gamiton ta ang Kasulatan, ug sa unsang paagi atong himoon kini?
4 Ipaambit ang Pagsabot: Bisan tuod kasagarang labing maayo nga huptan ang maong mga panaghisgot nga yano ug mubo, labaw pa ang gikinahanglan kay sa pagbasa lamang sa piniling teksto. Gibutaan ni Satanas ang mga hunahuna sa mga tawo labot sa maayong balita. (2 Cor. 4:3, 4) Bisan kadtong sinati sa Bibliya nanginahanglan ug tabang sa pagsabot niana. (Buh. 8:30, 31) Busa, paggahin ug panahon sa pagpatin-aw ug pag-ilustrar sa teksto, sama sa imong buhaton diha sa usa ka pakigpulong sa Teokratikanhong Tunghaan sa Ministeryo. (Buh. 17:3) Paneguroa nga masabtan sa maong tawo ang praktikal nga bili sa Pulong sa Diyos diha sa iyang kaugalingong kinabuhi.
5. Sa unsang paagi ang usa ka duaw sa ruta sa magasin mahimong pagtuon sa Bibliya?
5 Kon ang maong tawo malingaw sa iyang nakat-onan, anam-anam nga palugwaya ang maong mga panaghisgot nga maglakip ug duha o tulo ka teksto sa Bibliya matag duaw. Pangitag kahigayonan nga ikatanyag ang brosyur nga Gikinahanglan o ang librong Kahibalo. Pinaagi niini, ang usa ka duaw sa ruta sa magasin basin mahimong pagtuon sa Bibliya sa ngadtongadto.