Usa ka Pagpamatuod Bisag Walay Gisulti
1 Bisag walay gibungat nga mga pulong, ang pisikal nga kalalangan ni Jehova daghag gikasulti bahin sa iyang dili-makita nga mga hiyas. (Sal. 19:1-3; Roma 1:20) Sa samang paagi, ang atong maayong panggawi, Kristohanong mga hiyas, ug makasaranganong panagway maghatag ug pamatuod bisag walay gisulti. (1 Ped. 2:12; 3:1-4) Kinahanglang tinguhaon natong tanan nga ‘madayandayanan ang pagtulon-an sa atong Manluluwas, ang Diyos, sa tanang butang’ pinaagi sa atong panggawi.—Tito 2:10.
2 Madugangan ba sa dili-hingpit nga mga tawo ang kamadanihon sa mga pagtulon-an sa Bibliya? Mahimo kini pinaagi lamang sa giya sa Pulong sa Diyos ug sa gahom sa balaang espiritu. (Sal. 119:105; 143:10) Ang pulong sa Diyos maoy “buhi ug gamhanan ug mahait pa kay sa espada nga duhay-sulab.” (Heb. 4:12) Kini modulot sa atong kahiladman ug maghatag kanatog katakos sa pagsul-ob sa bag-ong pagkatawo. (Col. 3:9, 10) Ang balaang espiritu magpatungha ug tilinguhaong mga hiyas diha kanato, sama sa kalulot, pagkamaayo, kaaghop, ug pagpugong-sa-kaugalingon. (Gal. 5:22, 23) Ato bang gitugotan ang pulong ug espiritu sa Diyos sa pag-impluwensiya sa atong tagsatagsa ka kinabuhi?—Efe. 4:30; 1 Tes. 2:13.
3 Makamatikod ang Uban: Sa dihang kita magkinabuhi sumala sa mga sukdanan ni Jehova ug maningkamot sa pagbanaag sa iyang mga hiyas, mamatikdan kini sa uban. Tagda pananglitan ang usa ka lalaki nga gibiaybiay sa iyang mga kauban sa trabaho tungod kay siya putot. Usa ka sister nga nagtrabaho sa samang opisina matinahorong nagtratar kaniya uban ang dignidad. Kini nakatukmod kaniya sa pagpangutana sa sister kon nganong siya lahi. Mipatin-aw ang sister nga ang iyang matinahorong panggawi maoy resulta sa pagpadapat niya sa mga prinsipyo sa Bibliya diha sa iyang kinabuhi. Gipaambit usab niya sa maong lalaki ang kahibulongang paglaom sa Gingharian. Ang maong lalaki misugod sa pagtuon sa Bibliya ug sa ngadtongadto nabawtismohan. Sa dihang mibalik ang maong lalaki sa iyang yutang natawhan, nahingangha ang iyang mga paryente sa iyang maayong panggawi, ug ubay-ubay kanila ang midawat usab sa kamatuoran.
4 Diha man sa trabahoan, sa eskuylahan, o sa pagpakiglabot sa mga paryente ug mga silingan, pinaagi sa atong maayong panggawi ug sa atong pagsangyaw, kita makatukmod sa uban sa paghimaya sa Diyos.—Mat. 5:16.