Ipahayag ang Himaya ni Jehova
1 Ang salmista miawhag: “Pag-awit kang Jehova, kamong tibuok nga katawhan sa yuta. . . . Ipahayag sa taliwala sa kanasoran ang iyang himaya, ang iyang katingalahang mga buhat sa taliwala sa tanang mga katawhan.” Samtang atong palandongon ang nabuhat, ginabuhat, ug pagabuhaton ni Jehova alang kanato, mapukaw ang atong kasingkasing sa pagpahayag sa iyang himaya!—Sal. 96:1, 3.
2 Pinaagi sa Atong Ministeryo: Dakong dungog alang sa mga Saksi ni Jehova ang pagdala sa ngalan sa Diyos ug pagdayeg niana sa dayag sa tibuok yuta. (Mal. 1:11) Pagkalahi kaayo sa klero sa Kakristiyanohan, kinsa mapangahasong nagtangtang sa ngalan sa Diyos gikan sa ilang mga hubad sa Bibliya! Ang buluhaton sa pagpaila sa ngalan sa Diyos maoy dinalian, sanglit ang mga tawo kinahanglang motawag nianang ngalana nga may pagtuo aron maluwas sa umaabot nga dakong kasakitan. (Roma 10:13-15) Dugang pa, ang kalinaw sa uniberso, lakip na ang kalinaw taliwala sa mga molupyo dinhi sa yuta, nagdepende sa pagbalaan sa ngalan sa Diyos. Ang tanang mga buhat sa Diyos nalangkit gayod sa iyang ngalan.
3 “Si Jehova dako ug dalayegon uyamot.” Apan aron ‘ikapahinungod sa mga tawo kang Jehova ang himaya nga alang sa iyang ngalan,’ kinahanglang mahibalo sila sa kamatuoran bahin kaniya. (Sal. 96:4, 8) Ugaling lang, ang pipila wala magtuo nga adunay Diyos. (Sal. 14:1) Daoton pa gani siya sa uban ingong walay gahom, o sila moingon nga dili siya interesado sa kalihokan sa mga tawo. Samtang atong tabangan ang matinud-anog-kasingkasing nga mga tawo nga makabaton ug tukmang kahibalo bahin sa atong Maglalalang, sa iyang mga katuyoan, ug sa iyang makapadaning mga hiyas, atong ginahimaya si Jehova.
4 Pinaagi sa Atong Panggawi: Ang pagkinabuhi nga kaharmonya sa matarong nga mga sukdanan ni Jehova makapasidungog kaniya. Ang atong maayong panggawi mamatikdan gayod. (1 Ped. 2:12) Pananglitan, ang atong hinlo ug hapsay nga panagway mahimong dayegon sa ubang tawo, nga maghatag kanato ug kahigayonan sa pagpakigsulti kanila bahin sa mga kaayohan sa pagkinabuhi uyon sa mga prinsipyo nga makaplagan diha sa Pulong sa Diyos. (1 Tim. 2:9, 10) Dako gayod ang atong kalipay kon ang uban ‘makakita sa atong maayong mga buhat ug maghimaya sa atong Amahan nga anaa sa mga langit’!—Mat. 5:16.
5 Pinaagi sa pulong ug sa buhat, dayegon nato ang atong halangdon nga Diyos matag adlaw, ingon nga pagsanong nato sa malipayong pag-awhag: “Pag-awit kamo kang Jehova, dayega ang iyang ngalan. Sa matag adlaw imantala ang maayong balita sa iyang pagluwas.”—Sal. 96:2.