Gamita ang Atong Binase-sa-Bibliya nga mga Literatura sa Maalamong Paagi
1, 2. Unsay gibati sa daghang tawo bahin sa atong mga literatura, ug unsang pangutana ang gipatungha niini?
1 “Tigbasa na ako sa inyong mga publikasyon sukad pa sa 1965. Akong susihon ang Bibliya samtang magbasa, ug ang tanang gihisgotan sa inyong mga basahon nahiuyon sa Bibliya. Nagtinguha gayod ako nga mahibalo sa kamatuoran mahitungod sa Diyos ug kang Jesus, ug sa kamatinud-anon ako makaingon nga nakaplagan ko ang tinuod nga mga tubag pinaagi sa inyong mga basahon ug sa Bibliya.” Mao kanay gisulat sa usa ka lalaki ngadto sa hedkuwarter sa mga Saksi ni Jehova. Sa mao ra gihapong sulat, siya mihangyog pagtuon sa Bibliya.
2 Sama sa maong mapasalamatong lalaki, milyonmilyong katawhan sa tibuok kalibotan ang mapasalamaton sa mga tabang sa pagtuon sa Bibliya nga gitagana sa “matinumanon ug maalamong ulipon.” (Mat. 24:45) Matag tuig, daghan kaayong literatura ang ginapatik aron sa pagtabang sa matinud-anog-kasingkasing nga mga tawo nga “makadangat sa tukmang kahibalo sa kamatuoran.” (1 Tim. 2:4) Sa unsang paagi atong magamit ang atong binase-sa-Bibliya nga mga literatura sa maalamong paagi?
3. Sa unsang paagi malikayan nato nga dili mausik ang atong mga literatura?
3 Ayaw Pag-usik-usik: Sulod sa dugayng panahon, makatigom kitag daghang literatura kay sa aktuwal natong magamit. Unsay atong mahimo aron dili mausik ang atong bililhong mga publikasyon? Kinahanglang magmakataronganon kita sa dihang magkuhag mga literatura nga atong gamiton sa ministeryo. Imbes magkuhag daghang kopya sa usa ka publikasyon nga atong itanyag, mas maayong magkuha lang una kitag usa o duha ka kopya ug mokuhag dugang kon mapahimutang na kana. Pinaagi niini dili magtipun-og ang daghang suplay sa literatura sa atong mga balay. Sa samang paagi, kon duna kitay daghang suplay sa mga magasin nga wala mapahimutang, haom gayod ang pagpakunhod sa gidaghanon nga atong orderon.
4. Unsay mahimo kon ang kongregasyon dunay daghang napondo nga mga publikasyon?
4 Daghang Publikasyon nga Napondo: Kon ang kongregasyon adunay daghang pondo sa pipila ka publikasyon, maayong susihon sa koordinetor sa literatura ang ubang kasikbit nga mga kongregasyon kon magamit ba nila ang ekstrang mga literatura. Ang mga magmamantala makatanyag sa daandaang mga publikasyon ngadto sa dili-magtutuong mga membro sa pamilya, mga ginatun-an sa Bibliya, ug sa uban pa. Kadtong bag-ong nakig-uban sa kongregasyon gusto tingaling makabaton niining daandaang mga publikasyon para sa ilang personal nga teokratikanhong librarya.
5. Sa unsang paagi atong ikapasundayag ang atong pagpabili sa atong mga literatura?
5 Buot nato nga ang atong mga literatura magamit gayod sumala sa katuyoan niini, nga mao, ang pagtabang sa sinserong mga tawo nga makakat-on pag dugang bahin sa kahibulongang mga katuyoan ni Jehova. Maingon nga wala usiki ni Jesus ang salin nga pagkaon human niya pakan-a sa milagrosong paagi ang panon sa katawhan, ang atong tumong angayng mao ang paggamit pag-ayo sa gitaganang bililhong mga literatura nga gibase sa Bibliya. (Juan 6:11-13) Ang nagaluwas-ug-kinabuhing mensahe nga anaa sa atong mga publikasyon dili makatandog sa kasingkasing sa mga tawo nga nakiling sa pagkamatarong kon kini magpabilin diha sa mga estante o diha sa atong mga bag. Busa, angay kitang magmakataronganon sa pagkuhag mga literatura alang sa ministeryo ug gamiton nato kini sa maalamong paagi aron makabenepisyo ang uban.—Filip. 4:5.