Ipakita ang Personal nga Interes—Pinaagi sa Pagdayeg
1 Ang sinsero nga pagdayeg makapadasig sa mga tawo, makatukmod kanila sa paglihok, ug makapalipay kanila. Nadiskobrehan sa daghang magmamantala nga ang mga tawo mamati sa atong pagsangyaw ingong resulta sa bisan gamay nga sinserong pagdayeg. Sa unsang paagi makadayeg kita sa mga tawo samtang maningkamot kita sa pagpaambit sa maayong balita kanila?
2 Magmapaniiron: Ang hinimayang si Jesu-Kristo nagmatikod sa maayong mga binuhatan sa pito ka kongregasyon sa Asia Minor. (Pin. 2:2, 3, 13, 19; 3:8) Sa susamang paagi, ang pagbaton ug tinuod nga interes sa mga tawong atong mahibalag diha sa atong ministeryo motukmod kanato sa pagpangitag mga kahigayonan sa pagdayeg. Pananglitan, ang hinlo ug hapsay nga tugkaran, usa ka ginikanang nagpadayag ug pagmahal sa iyang mga anak, o ang mahigalaong pahiyom ug pagtimbaya sa tagbalay mohatag kanatog mga kahigayonan sa pagdayeg kanila. Dali ka bang makapaniid ug mopahimulos sa maong mga kahigayonan?
3 Magpatalinghog Pag-ayo: Sa dihang magsangyaw sa uban, dasiga sila sa pagkomento pinaagi sa pagsuknag haom nga mga pangutana. Hatagi silag pasidungog pinaagi sa pagpatalinghog pag-ayo sa ilang isulti. (Roma 12:10) Lagmit duna silay isulti diin ikaw sinserong makadayeg ug unya ikapadayon mo ang panaghisgot nga gipasukad sa butang nga inyong giuyonan.
4 Gamita ang Katakos sa Pag-ila: Unsay angay nimong buhaton kon ang tagbalay adunay isulti nga dili uyon sa kamatuoran sa Bibliya? Imbes supakon ang dili-hustong gisulti, pasalamati ang mga pulong sa tagbalay ug ipadayon ang panaghisgot pinaagi sa pagsulti nga “Nasabtan ko nga imong gipalandong pag-ayo kining ulohana.” (Col. 4:6) Bisan pag malalison ang usa ka tawo, kita kasagarang makadayeg kaniya tungod sa iyang tinuod nga interes sa maong ulohan. Ang maong malumong panggawi makapalukmay sa tawong masupakon kaayo sa maayong balita.—Prov. 25:15.
5 Aron mahimong makapadasig, kinahanglang sinsero ang atong pagdayeg. Ang paggamit sa maong makapalig-ong sinultihan makapasidungog kang Jehova ug makadani sa uban aron magpatalinghog sa mensahe sa Gingharian.