Kon Unsaon Pagkab-ot ang Imong Espirituwal nga mga Tumong
1. Unsay espirituwal nga mga tumong sa daghang batan-ong mga Kristohanon?
1 Ingon nga usa ka batan-ong Kristohanon, sa walay duhaduha ang imong mga tumong sa kinabuhi naimpluwensiyahan sa imong gugma kang Jehova ug sa mga pulong ni Jesus ngadto sa tanang Kristohanon nga ‘pangitaon una ang gingharian.’ (Mat. 6:33) Ang imong tumong tingali mao ang pagpalapad sa imong ministeryo pinaagi sa pagpayunir o pag-alagad diin adunay mas dakong panginahanglan alang sa mga magmamantala sa Gingharian. Ang uban mahimong naghunahuna nga moboluntaryo sa pagpanukod ug mga Kingdom Hall, pag-alagad sa Bethel, o pag-alagad ingong misyonaryo. Pagkamakapatagbaw ug pagkadalayegon ang maong mga tumong!
2. Unsay makatabang kanimo sa pagkab-ot sa imong espirituwal nga mga tumong?
2 Ang usa ka tabang aron makab-ot ang imong espirituwal nga mga tumong mao ang pagsulat niana. Ang Hulyo 15, 2004, Bantayanang Torre miingon: “Ang usa ka hanap nga ideya mahimong tin-aw ug klaro sa dihang ato kanang ipadayag pinaagig mga pulong. Busa basin buot [nimong] isulat sa papel ang [imong] mga tumong ug ang paagi sa pagkab-ot niana.” Dugang pa, ang dili-tagdugay nga mga tumong makatabang nimo sa pagtimbangtimbang sa imong pag-uswag ug pagpadayon sa imong direksiyon samtang imong gipangagpas ang tagdugay nga tumong.
3. Nganli ang pipila ka dili-tagdugay nga mga tumong nga makatabang aron mahimong kuwalipikado ang usa ka tawo sa bawtismo?
3 Dili-Tagdugay nga mga Tumong: Kon dili ka pa bawtismado, tagda kon unsay kinahanglan nimong himoon sa pagkab-ot sa maong tumong. Basin kinahanglang mas masabtan nimo ang paninugdang mga pagtulon-an sa Bibliya. Kon maohon, himoang tumong ang mabug-osong pagtuon sa librong Gitudlo sa Bibliya, nga basahon ang tanang gisitar nga mga teksto. (1 Tim. 4:15) Himoang tumong usab ang pagbasa sa tibuok Bibliya gikan sa Genesis hangtod sa Pinadayag, ingon nga kana giobligar sa mga Bethelite ug mga estudyante sa Gilead. Human niana, ipadayon ang regular nga programa sa pagbasag Bibliya kada adlaw. (Sal. 1:2, 3) Pagkadakong tabang kana aron motubo ka sa espirituwal! Buksi ug tiklopi ang matag yugto sa pagbasa ug pagtuon sa Bibliya pinaagig kinasingkasing nga pag-ampo, ug tinguhaa kanunay ang pagpadapat sa imong nakat-onan.—San. 1:25.
4. Unsang dili-tagdugay nga mga tumong ang mahimong ibutang sa usa ka Kristohanong adunay tagdugay nga tumong sa pag-alagad sa Bethel o pagkamisyonaryo?
4 Kon bawtismado ka na, unsang dugang nga mga tumong ang mahimo nimong pangagpason? Kinahanglan bang pauswagon ang imong mga kahanas sa pagsangyaw? Pananglitan, himoon ba nimong tumong nga mas mahanas ka sa paggamit sa Pulong sa Diyos diha sa ministeryo sa kanataran? (2 Tim. 2:15) Sa unsang paagi mapalapad nimo ang imong ministeryo? Pagbutang ug espesipikong dili-tagdugay nga mga tumong nga nahiuyon sa imong edad ug mga kahimtang ug makatabang kanimo sa pagkab-ot sa imong tagdugay nga mga tumong.
5. Sa unsang paagi ang pagbutang ug dili-tagdugay nga mga tumong nakatabang sa usa ka brader sa pagkab-ot sa iyang tumong nga mag-alagad sa Bethel?
5 Usa ka Estorya Bahin sa Kalamposan: Sa dihang ang 19-anyos nga si Tony miduaw sa usa ka sangang buhatan sa mga Saksi ni Jehova, napukaw sa iyang kahiladman ang tinguha nga mag-alagad sa Bethel. Ugaling, masupilon ang iyang pagkinabuhi, ug wala pa gani siya makapahinungod sa Diyos. Gihukom ni Tony nga ipahiuyon ang iyang kinabuhi sa mga paagi ni Jehova ug gihimo niyang tumong nga mahimong kuwalipikado sa bawtismo. Human siya mabawtismohi, iyang gihimong tumong ang pag-oksilyare payunir ug dayon ang pagregular payunir, nga gisulat sa iyang kalendaryo ang mga petsa nga gusto niyang mosugod. Hunahunaa lang ang iyang kalipay sa dihang human makapayunir ug taastaas nga panahon, siya gidapit nga mag-alagad sa Bethel!
6. Unsay makatabang kanimo sa pagkab-ot sa imong espirituwal nga mga tumong?
6 Ikaw makakab-ot usab sa imong espirituwal nga mga tumong samtang imong pangitaon pag-una ang intereses sa Gingharian. Ibutang ang “imong mga buhat” sa atubangan ni Jehova diha sa pag-ampo ug magkugi aron makab-ot nimo kana.—Prov. 16:3; 21:5.