Sila Naghatag ug Panig-ingnan sa Pagkamatinumanon
1 Sa tuig 1954, gisugdan ang usa ka bag-ong bahin sa bug-os-panahong pag-alagad dinhi sa Pilipinas—ang espesyal payunir nga kalihokan. Ang takos nga mga lalaki ug babaye, nga eksperyensiyado sa Kristohanong ministeryo, malipayong midawat ug mga asaynment aron sa pag-alagad bisan asa sila ipadala sa organisasyon. Karon, daghang dekada sa ulahi, ang mga espesyal payunir nagpadayon sa paghatag ug panig-ingnan sa pagkamatinumanon nga takos sundon.—Heb. 6:12.
2 Sila ang Nanguna: Sa sinugdan, ang mga espesyal payunir maoy nanguna sa pagsangyaw diha sa mga teritoryo diin walay mga Saksi, ilabina sa Kabisay-an ug Mindanao. Sila nagpaloap sa tanang interes ug nagdumalag mga pagtuon sa Bibliya. Tungod sa ilang makugihong mga paningkamot, daghang bag-ong mga kongregasyon ang natukod. Ang ilang makugihong pagsangyaw sa maayong balita nakaamot sa dakong pag-uswag sa organisasyon nga atong nakita karon. (Isa. 60:22) Ang mga espesyal payunir padayong adunay hinungdanong papel sa pagsangyaw sa maayong balita “sa tibuok kalalangan ilalom sa langit.”—Col. 1:23.
3 Takos Pagasundon: Ang pipila ka espesyal payunir nag-alagad diha sa bug-os-panahong ministeryo sulod na sa daghang katuigan. Latas sa katuigan, ang pagtuo niining maunongong mga lalaki ug babaye nalunsay ilalom sa nagkalainlaing mga kahimtang. (1 Ped. 1:6, 7) Sila andam sa pagsakripisyo sa materyal nga kahamugaway aron makaalagad sa mga dapit nga adunay linaing panginahanglan. Ang uban kanila karon tigulang na ug luya nag panglawas, o nag-atubang ug lain pang malisod nga mga kahimtang. (2 Cor. 4:16, 17) Bisan pa niana, sila ‘nagpadayon pa gihapon sa paglipang panahon sa ilang pagkaubanon.’ (Sal. 92:14) Sila nagsalig sa bug-os kang Jehova ug nakapahimulos sa iyang panalangin.—Sal. 34:8; Prov. 10:22.
4 Ang mga espesyal payunir takos gayod sa atong mainitong pagdayeg. Kon kamo nakapribilehiyo nga adunay mga espesyal payunir nga giasayn sa inyong kongregasyon, pahimusli ang mga kahigayonan sa pagpakig-uban kanila ug pagkuhag kaayohan gikan sa ilang mga kasinatian. Ipakita ang inyong pagpabili sa ilang pag-alagad ingong matinumanong mga magmamantala sa Gingharian. Madasig sa ilang pagkamaunongon. Ang tanang nagsundog sa ilang pagtuo makatagamtam usab sa pabor ug panalangin ni Jehova tungod kay “kadtong nagmatinumanon makapahimuot kaniya.”—Prov. 12:22.