Sunda ang Panig-ingnan ni Jesus
1. Unsang panig-ingnan ang gihatag ni Jesus?
1 Sa dihang makigbahin kita sa buluhatong paghimog tinun-an, angay natong hinumdoman nga ang atong panig-ingnan makaimpluwensiyag dako niadtong mga nag-obserbar kanato. Si Jesus nagtudlo pinaagi sa pulong ug sa buhat. Kadtong nag-obserbar kaniya nakamatikod sa iyang kasibot, sa iyang gugma alang sa mga tawo, sa iyang hugot nga tinguha sa pagbalaan sa ngalan sa iyang Amahan, ug sa iyang determinasyon sa pagbuhat sa kabubut-on sa iyang Amahan hangtod kini matapos.—1 Ped. 2:21.
2. Sa unsang mga paagi makaimpluwensiya ang atong panig-ingnan niadtong nakig-uban kanato sa ministeryo?
2 Samtang Mamalaybalay: Sama sa kahimtang ni Jesus, ang atong panig-ingnan makaimpluwensiya niadtong nakig-uban kanato sa ministeryo. Ang mga bag-ohan ug wala pa kaayoy kasinatian nga mga magmamantala nga makakita kanato nga masibotong nagsangyaw makapamalandong bahin sa kalidad sa ilang pagpakigbahin sa buluhatong pagsangyaw. Sa dihang ilang makita ang atong kalipay ug ang atong tiunay nga interes sa uban, sila mapahinumdoman sa kahinungdanon sa pagpasundayag sa maong mga hiyas diha sa ilang ministeryo. Sa dihang ilang mamatikdan nga kita kanunayng naggamit sa Kasulatan, nagbalikduaw, ug nagdumalag mga pagtuon sa Bibliya, sila madasig sa paghimo usab niana.
3. Sa unsang paagi ang atong panig-ingnan mahimong makatudlo sa mga gitun-an sa Bibliya, ug unsay lagmit nga ilang makat-onan?
3 Samtang Nagdumalag mga Pagtuon sa Bibliya: Ang atong mga gitun-an sa Bibliya ilabinang mag-obserbar sa atong panggawi. Pananglitan, bisan tuod mahimo natong ipasiugda kanila ang kahinungdanon sa pagpangandam alang sa pagtuon, pagbasa sa mga teksto, ug pagbadlis sa pangunang mga punto, sila makamatikod kon kita nangandam ba gayod. (Roma 2:21) Kon kita untop nga moabot sa gikasabotang pagtuon uban nila, lagmit dili na sila mohimog uban pang mga kalihokan nga makabalda sa ilang pagtuon sa Bibliya. Sila usab makamatikod gayod sa atong kaandam nga mosakripisyo alang sa ministeryo ug sa atong lig-ong pagtuo. Dili ikatingala nga ang mga gitun-an niadtong nagsunod pag-ayo sa panig-ingnan ni Jesus kasagarang nahimong masiboton ug mabungahon usab nga mga magwawali.
4. Unsa may ikatudlo sa atong panig-ingnan sa dihang nagtambong kita sa mga tigom sa kongregasyon?
4 Samtang Nagtambong sa mga Tigom sa Kongregasyon: Ang tanang sakop sa Kristohanong kongregasyon makatudlo pinaagi sa ilang panig-ingnan diha sa mga tigom sa kongregasyon. Ang mga interesado nga nagsugod na sa pagtambong sa mga tigom makabenepisyo gikan sa maayong panig-ingnan nga ilang maobserbahan diha sa kongregasyon. Ilang mamatikdan ang mainitong panag-igsoonay, Kristohanong panaghiusa, ug makasaranganong pagpamesti ug pagpanghindik. (Sal. 133:1) Mamatikdan usab nila ang atong panig-ingnan sa regular nga pagtambong sa mga tigom sa kongregasyon ug ang atong pagpahayag sa dayag sa atong pagtuo. Namatikdan sa usa ka bisita diha sa usa sa atong mga tigom nga dali ra kaayong nakit-an sa usa ka batang babaye ang gisitar nga teksto diha sa iyang Bibliya ug gisundan pag-ayo ang pagbasa. Ang panig-ingnan sa maong batang babaye nakadasig kaniya sa paghangyog usa ka pagtuon sa Bibliya.
5. Nganong dili nato angayng pakamenoson ang kahinungdanon sa atong panig-ingnan?
5 Ang Kasulatan nagdasig kanato sa pagsundog sa maayong panig-ingnan sa usag usa. (Filip. 3:17; Heb. 13:7) Busa, angay natong hinumdoman nga kon sundon nato pag-ayo ang panig-ingnan ni Jesus, kini mamatikdan sa uban ug makaimpluwensiya kini kanila sa positibong paagi. Tungod niini, hinaot atong ipadapat ang giingon sa 1 Timoteo 4:16: “Tagda kanunay ang imong kaugalingon ug ang imong pagpanudlo.”—1 Tim. 4:16.