Pangutana

◼ Haom ba nga ang usa ka Saksi ni Jehova magpaospital o mopuyo sa usa ka nursing home nga gidumala sa usa ka relihiyosong organisasyon?

Daghang relihiyosong mga organisasyon ang nagdumala ug mga ospital o nursing home. Sa katibuk-an, ang tumong sa pagtukod niini nga mga pasilidad dili mao ang pagpalambo sa Dakong Babilonya. (Pin. 18:2, 4) Kini gitukod tingali sa usa ka relihiyosong organisasyon aron sila mokitag kuwarta. Ang pipila ka ospital karon relihiyoso lamang sa ngalan, samtang ang ubang ospital adunay mga kawani nga mga lider sa relihiyon.

Kon ang usa ka Saksi ni Jehova kinahanglang magpaospital o mopuyo sa nursing home, siya ang modesisyon kon moadto ba siya sa usa ka pasilidad nga lagmit konektado sa relihiyon. Basin motugot ra ang tanlag sa usa sa pagbuhat niana, apan ang tanlag sa uban basin supak niana. (1 Tim. 1:5) Adunay mga kahimtang nga lagmit makaapektar sa desisyon sa usa, ug maayong tagdon niya kini.

Pananglitan, basin walay laing ospital o nursing home sa usa ka dapit gawas lamang nianang usa nga morag konektado sa relihiyon. O kon aduna may laing pasilidad sa duol, basin dili pod kini maayog serbisyo. Basin ang ospital nga konektado sa relihiyon mao lamang ang makatagana sa gikinahanglang pagtambal, o basin dinhi lamang ang imong doktor o siruhano gitugotan sa pagtrabaho. Dugang pa, may mga panahon nga ang ospital nga konektado sa relihiyon motahod sa imong Kristohanong baroganan bahin sa paggamit ug dugo, samtang ang ubang pribado ug publiko nga mga ospital dili motahod niana. Busa maayong tagdon nimo kining mga butanga sa dihang ikaw maghimog desisyon kon asa ka magpaospital.

Lagmit makadesisyon ka nga magpaospital o mopuyo sa usa ka nursing home nga konektado sa relihiyon. Bisan pag relihiyosong organisasyon ang nagpadagan niini, ikaw lagmit maghunahuna nga dili kini pagsuportar sa bakak nga relihiyon tungod kay ang imong tuyo mao lamang ang ilang serbisyo. Igo lamang nimong bayran ang usa ka produkto o serbisyo.

Siyempre, isip usa ka Kristohanon, kinahanglan nimong tinoon nga dili ka makigbahin sa bisan unsang buhat sa bakak nga pagsimba. Dili ka usab mogamit ug relihiyoso nga mga titulo, sama sa “Padre” o “Sister,” sa pagtawag sa mga kawani sa ospital o sa mga moduaw sa pasilidad. (Mat. 23:9) Kinahanglang imong seguroon nga ang imong pagpatambal o pagdawat ug serbisyo maoy tungod sa negosyo lamang, ug nga wala silay laing tuyo gawas niana.

Sa dihang ikaw magpaospital, mas maayo nga imong isulti nga usa ka sa mga Saksi ni Jehova ug nga gusto nimong magpaduaw sa mga ansiyano sa inyong kongregasyon. Pinaagi niini, imong maseguro nga ikaw makadawat ug tabang sa mga ansiyano.​—1 Tes. 5:14.

Ang magtutuo nga mga membro sa pamilya, mga ansiyano, ug ang mga igsoon sa kongregasyon kinahanglang moatiman sa espirituwal nga panginahanglan sa tigulang nga mga igsoon nga nagpuyo sa mga nursing home, ilabina kon kana gidumala sa usa ka relihiyosong organisasyon. Kon kita maningkamot sa pagbuhat niini, mapalig-on gayod nato ang tigulang nga mga igsoon ug malikayan nga sila malangkit sa relihiyoso nga mga serbisyo, selebrasyon, ug uban pang relihiyosong mga kalihokan sa maong mga pasilidad.

Kinahanglang pamalandongon sa matag usa kining mga butanga ug ang uban pang mga kahimtang nga nalangkit sa dili pa siya modesisyon kon asa nga ospital o nursing home siya moadto.​—Gal. 6:5.