Mabatonan Nimo ang mga Bahandi!
1. Nganong angayng pamalandongon ang pagregular payunir?
1 Nagtinguha ka ba nga mahimong mas malipayon ug matagbawon ang imong kinabuhi? Mao ba usab kanay imong bation sa dihang ikaw magtabang sa uban? Nagtinguha ka ba nga mouswag diha sa pag-alagad kang Jehova? Kon oo ang imong tubag sa bisan hain niining mga pangutanaha, nan angay nimong pamalandongon ang pagregular payunir. Siyempre, angay usab nga pagatagdon ang mga kaakohan sa pamilya ug uban pang Kasulatanhong mga responsibilidad, lakip na ang kahimtang sa panglawas.
2. Unsa ang pipila ka espirituwal nga bahandi nga nabatonan sa mga regular payunir?
2 Diha sa iyang inspiradong sulat, gilangkit ni Solomon ang panalangin ni Jehova sa materyal nga mga bahandi. (Prov. 10:22) Sa atong panahon, mabatonan ang panalangin ni Jehova sa espirituwal nga paagi. Dagaya kining nabatonan sa mga regular payunir. Pananglitan, sila nakasinatig mas dakong kalipay sa paghatag sa uban samtang ilang ‘gipalit ang panahon’ gikan sa ilang personal nga mga buluhaton. (Col. 4:5; Buh. 20:35) Ang ilang kakugi tungod sa ilang gugma nakita ug gipabilhan ni Jehova. Dili gayod moubos ang bili sa maong ‘mga bahandi sa langit.’ (Mat. 6:20; Heb. 6:10) Dugang pa, samtang gihuptan sa mga payunir ang ‘yanong mata’ ug misalig kang Jehova sa pagtagana sa ilang mga panginahanglan, sila mas masuod kaniya.—Mat. 6:22, 25, 32; Heb. 13:5, 6.
3. Unsay kalainan tali sa pagpangagpas sa espirituwal ug sa pagpangagpas sa materyal nga mga bahandi?
3 Ang pagpangagpas sa materyal nga bahandi sagad mosangpot sa “daghang binuang ug makadaot nga mga tinguha.” (1 Tim. 6:9, 10; Sant. 5:1-3) Dili gayod ingon niana ang panalangin ni Jehova. Ang paggugol sa mga regular payunir ug daghang panahon sa pagsangyaw nakatabang kanila aron mahimong balanse sa espirituwal ug mahatagan nilag dakong pagtagad ang labing hinungdanong mga butang. (Filip. 1:10) Usa ka brader miundang sa iyang makahurot-ug-panahon nga trabaho ingong inhenyero ug nagpayunir. Siya miingon: “Mapit-oson kaayo ang akong trabaho. Apan dili ingon niana ang pagpayunir. Karon nagtabang ako sa mga tawo ug nagtudlo kanila sa kamatuoran. Kini mas makapatagbaw ug makaiikag gayod nga buluhaton.”
4. Sa unsang paagi gipanalanginan ang mga regular payunir samtang sila nagsangyaw ngadto sa uban?
4 Panalangin Ngadto sa Uban: Karon, ang matag usa nagkinabuhi sa “makuyaw nga mga panahong lisod sagubangon.” (2 Tim. 3:1) Ang mga tawo sa daghang dapit nawad-ag paglaom. Malipay gayod ang mga magwawali sa Gingharian sa pagkakita sa maong mga tawo nga makabatog paglaom ingong resulta sa ilang pagsanong sa maayong balita. Dako gayod ang kalipay sa mga regular payunir nga migugol ug kapin sa 800 ka oras matag tuig niining nagaluwas-kinabuhi nga buluhaton!—1 Tim. 4:16.
5, 6. Unsay makatabang kanimo aron ka makaregular payunir?
5 Imo na bang gipamalandong pag-ayo ang pagregular payunir? Tingali nagkinahanglan kinig ‘pagpalit sa nahiangayng panahon’ gikan sa dili kaayo importanteng mga butang. (Efe. 5:15, 16) Daghan ang naghimo niini ug nagpayano sa ilang kinabuhi pinaagi sa pagkunhod sa panahong ilang gigugol sa pagtrabaho aron madugangan ang ilang panahon diha sa buluhaton sa Gingharian. Makahimo ka ba usab niana?
6 Iampo kang Jehova ang kaalam aron makahimo kag praktikal nga eskedyul. (Sant. 1:5) Unsang mga panalangin ang imong mabatonan sa paghimo niini? Dagayang espirituwal nga mga bahandi! Si Jehova magtagana usab sa imong materyal nga panginahanglan. (Mat. 6:33) Kadtong magahimo niini alang kang Jehova makabaton gayod ug “panalangin hangtod nga wala nay panginahanglan.”—Mal. 3:10.