Pagkinabuhi nga Naghunahuna sa Adlaw ni Jehova
1 “Ang dakong adlaw ni Jehova haduol na. Kini haduol na, ug nagadali sa hilabihan.” (Sof. 1:14) Si Sofonias ug ang uban nga giingong 11 ka Gagmay nga Manalagna nagkinabuhi nga naghunahuna sa adlaw ni Jehova. Ang pagtuon sa ilang inspiradong mga sinulat diha atong Pagtuon sa Libro sa Kongregasyon sa librong Pagkinabuhi nga Naghunahuna sa Adlaw ni Jehova motabang kanato sa pagpangandam alang nianang makalilisang nga adlaw.—Sof. 2:2, 3.
2 Talagsaong mga Bahin: Inay hisgotan ang simbolikong mga kahulogan o bersikulo por bersikulo nga pagpatin-aw niining 12 ka matagnaong mga basahon, gipatin-aw sa librong Adlaw ni Jehova kon sa unsang paagi kining inspiradong mga sinulat mapadapat sa tinuod-kinabuhing mga kahimtang nga giatubang nato adlaw-adlaw. Kini nagpasiugda nga angay natong hunahunaon nga duol na gayod ang adlaw ni Jehova ug kon sa unsang paagi kini makaapektar sa atong mga desisyon ug panggawi. Ang mga butang bahin sa pamilyahanong kinabuhi, relasyon sa isigkamagtutuo, pagpilig kalingawan, atong pagsangyaw, ug pagpilig karera maoy hisgotan niining libroha.
3 Atong masayran sa seksiyon 1 niining libroha ang bahin sa 12 ka manalagna ug sa ilang mga sinulat. Kinsa sila? Unsang managsamang situwasyon ang giatubang nato karon ug nila kaniadto? Ang seksiyon 2 nagpasiugda bahin kang Jehova ug sa iyang mga hiyas. Unsay ilang ikatudlo bahin kang Jehova ug sa iyang personalidad? Ang seksiyon 3 nagtagad pag-ayo sa ato mismong panggawi ug mga pagpakiglabot sa uban. Unsaon nato pagpahimuot ang Diyos adlaw-adlaw diha sa praktikal nga mga paagi? Ang seksiyon 4 nagpatin-aw kon sa unsang paagi magkinabuhi kita nga malipayon samtang nagpaabot sa adlaw ni Jehova.
4 Pagplano na Aron Makapahimulos: Pahimusli gayod ang pagtuon sa librong Adlaw ni Jehova, nga magsugod sa semana sa Agosto 4, 2008! Paningkamoti nga makatambong ka sa pagtuon kada semana. Tun-i pag-ayo ang matag leksiyon, basaha ang mga teksto aron imong masabtan kon sa unsang paagi kini nalangkit sa materyal nga gihisgotan. Palandonga ang impormasyon pinaagi sa pagpangutana sa kaugalingon, ‘Unsaon ko pagpadapat kining impormasyona diha sa panimalay, eskuylahan, trabahoan, sa akong pagsangyaw, ug sa akong pagpakiglabot sa akong mga igsoon sa pagtuo?’ Tambong nga andam sa pagkomento aron madasig ka ug makadasig usab sa uban—Roma 1:12.
5 Hinaot ang atong pagtuon sa librong Adlaw ni Jehova mag-andam kanato karon aron “makasugakod” kita sa “dako ug makalilisang kaayo” nga adlaw ni Jehova. Haduol na gayod kana!—Joel 2:11.