Bag-ong Programa sa Sirkitong Asembliya

Sa unsang paagi kita makabarog nga malig-on batok sa mapintasong mga magsusupak sa matuod nga pagsimba? Sa unsang paagi atong madaog ang way-puas nga mga paningkamot ni Satanas sa pagtental kanato nga mobalik ngadto sa dili-diyosnon nga kalibotan? Ang programa sa sirkitong asembliya sa 2009 magtubag niining hinungdanong mga pangutana. Kini adunay tema nga “Padayong Daoga ang Daotan Pinaagi sa Maayo.” (Roma 12:21) Tagda kon unsay atong madahom sa programa.

Ang magtatan-aw sa distrito maghatag sa mga pakigpulong nga nag-ulohang “Gipalig-on Aron Madaog ang Daotan Pinaagi sa Maayo,” “Pagbantay Batok sa Sobrang Pagsalig sa Kaugalingon!,” “Ang Pagkadaotan Hapit Nang Taposon!,” ug “Palig-ona ang Imong Pagtuo Aron Madaog ang Kalibotan.” Hisgotan sa magtatan-aw sa sirkito ang temang “Pabiling Magmata!,” nga gipasukad sa Roma 13:11-13, ug “Ayawg Kaluya sa Adlaw sa Kasakit,” nga gipasukad sa Proverbio 24:10. Kita naghinamhinam usab sa bahin sa magtatan-aw sa sirkito nga nag-ulohang “Pagtagad sa mga Panginahanglan sa Sirkito.” Ang lain pang makapadasig kaayo nga bahin nag-ulohang “Imo Bang ‘Tumanon Kini nga Ministeryo’​—Pinaagi sa Pagpayunir?” Ang una sa duha ka simposyum nag-ulohang “Barog nga Malig-on Batok sa Malipatlipatong mga Kaugdahan sa Yawa.” Kini motabang kanato sa pag-ila ug pagsalikway sa malipatlipatong mga kaugdahan sa Yawa diha sa natad sa teknolohiya, kalingawan, ug edukasyon. Ang simposyum nga nag-ulohang “Pagbaton ug Gahom sa Pagsukol Kang Satanas Niining Daotang Panahon” magpakita kon sa unsang paagi bug-os natong mapadapat ang tambag sa Efeso 6:10-18.

Adunay direktang kalangkitan tali sa pagdaog sa tinubdan sa pagkadaotan ug sa pagsangyaw sa mensahe sa Gingharian. (Pin. 12:17) Dili ikatingala nga si Satanas padayon gayong nag-atake sa mga Saksi ni Jehova! (Isa. 43:10, 12) Apan mapakyas lamang ang Yawa tungod kay kita determinado nga ‘padayong daogon ang daotan pinaagi sa maayo.’ Paghimo ug tinong mga kahikayan aron ikaw makabenepisyo gayod sa tanang upat ka sesyon sa sirkitong asembliya.