Bag-ong Programa sa Espesyal nga Asembliya
Ang espesyal nga asembliya sa 2009 adunay tema nga “Bantayi Kanunay ang Ministeryo . . . , nga Imong Matuman Kini,” nga gipasukad sa Colosas 4:17. Ingong mga Kristohanon, buot gayod natong tumanon kana nga awhag. Ang atong tumong mao ang pagtuman gayod sa atong ministeryo sama sa gihimo ni Jesus. (Juan 17:14) Si apostol Pablo usab naghatag kanato ug maayong panig-ingnan bahin niini. Determinado siya sa pagtuman sa iyang ministeryo.—Buh. 20:24.
Ang bahin sa magtatan-aw sa sirkito magpakita kon sa unsang paagi nasagubang sa pipila ka magmamantala ang mga kalisdanan sa ilang ministeryo. Dayon ang pakigpulong nga nag-ulohang “Ugmara ang Ilang Interes” magpasiugda kon sa unsang paagi ato gayong matabangan ang mga tawo nga “hustong nakiling alang sa kinabuhing walay kataposan.” (Buh. 13:48) Bersikulo-por-bersikulo nga hisgotan sa nagaduawng mamumulong ang 2 Corinto 6:1-10 sa pakigpulong nga nag-ulohang “Kon sa Unsang Paagi Kita Nagrekomendar sa Atong Kaugalingon Ingong mga Ministro.” Sa hapon, siya magsaysay sa tema nga “Pabilhi Gayod ang Imong Ministeryo.” Ikaw seguradong mapalig-on sa mga bahin nga nag-ulohang “Bata ug Tigulang Malipayong Nakigbahin sa Ministeryo” ug “Mga Batan-on nga Nagtuman sa Ilang Ministeryo.” Kadtong gustong magpabawtismo sa nagsingabot nga sirkito o espesyal nga asembliya kinahanglang moduol sa ilang nagadumalang magtatan-aw sa labing sayong maarangan. Usa sa mga hinungdanong bahin sa atong mga asembliya ug kombensiyon mao ang pagsumaryo sa Bantayanang Torre. Dal-a ang inyong kopyang tun-anan sa semana sa espesyal nga asembliya.
Sa atong pagtuman sa atong ministeryo, kita kinahanglang maningkamot nga dili gayod matibhangan sa ubang kalihokan ang atong panahon alang sa buluhaton nga gisalig ni Jehova kanato. Ang Kasulatanhong pagdasig nga gitagana pinaagi niining programa sa espesyal nga asembliya magtabang gayod kanatong tanan nga masabtan kon unsay angay natong buhaton aron mahuptan ang hustong panglantaw ug mapalandong kon sa unsang paagi bug-os natong matuman ang atong ministeryo.