“Bug-os Magpamatuod”—Pinaagig Pagsangyaw Diha sa mga Apartment
1. Unsay nalangkit sa ‘bug-os nga pagpamatuod sa maayong balita’?
1 Sama kang apostol Pablo, kita nagtinguha nga “bug-os magpamatuod sa maayong balita.” (Buh. 20:24) Sa daghang siyudad ug lungsod sa Pilipinas karon, kini naglakip sa pagpamatuod niadtong nagpuyo diha sa mga apartment. Usahay, lisod ang pagsangyaw nianang mga pasilidara.
2. Nganong hinungdanon ang kaalam ug maayong panghukom sa pagsangyaw sa mga apartment?
2 Tungod sa hulga sa krimen ug kapintasan, daghang apartment ang sirado ug adunay mga guwardiya o mga surveillance camera. (2 Tim. 3:1, 2) Ang tagdumala niana lagmit nagbaod nga dili pasudlon ang mga tawong wala dapita. Basin papahawaon kita sa nagadumala o manedyer sa apartment, ilabina kon moreklamo ang usa sa mga nagpuyo niini. Busa, hinungdanon nga magmaalamon ug magpakitag maayong panghukom.
3. Kanus-a mas maayong sangyawan ang mga apartment, ug ngano?
3 Kon Kanus-a Sangyawan: Sama sa ubang teritoryo, mas maayong mosangyaw sa mga apartment sa panahon nga ang mga residente sagad anaa sa ilang pinuy-anan. Daghang magmamantala ang milampos sa pagkaplag sa mga tawo sa apartment sa sayong kagabhion maingon man sa Sabado ug Dominggo sa hapon. Kon sayo ra kaayo kitang mosangyaw, ilabina sa mga hinapos sa semana, basin moreklamo ang mga namuyo sa tagdumala.
4, 5. Sa unsang paagi kita makasangyaw diha sa pipila ka apartment nga sirado?
4 Aron Makasangyaw: Dili angayng kontakon sa mga magmamantala ang tagdumala o si bisan kinsang nagtrabaho sa apartment una pa mosangyaw. Kon ang bilding adunay intercom sa gawas, mahimo nato kining gamiton sa pagpangitag tawo nga mouyon sa pagpakig-estorya kanato. Depende sa apartment, mahimo tingali kitang manuktok sa ubang mga pultahan human nato maestorya ang tawo nga nagpasulod kanato. Apan, sa laing kahimtang, mas maalamon nga mogawas sa bilding ug gamiton pag-usab ang intercom aron kontakon ang sunod nga residente. Kinahanglang gamiton nato ang maayong panghukom sa pagdesisyon kon pila ka tawo ang atong kontakon niining paagiha sa samang higayon.
5 Mas gusto tingali sa ubang residente nga sa intercom na lang nimo isulti ang imong tuyo sa pagduaw. Kon mao, ipaila ang imong kaugalingon sa mahigalaong paagi. Gamita ang ngalan sa tagbalay kon makita kini diha sa direktoryo. Isulti dayon ang imong tema. Ang uban nagmalamposon pinaagi sa direktang pagbasa sa usa ka introduksiyon gikan sa librong Nangatarongan.
6. Unsay atong himoon kon mosangyaw sa mga bilding nga adunay guwardiya?
6 Kon ang bilding adunay guwardiya nga dili motugot kanato sa pagsulod sa apartment, kita maningkamot sa pagsangyaw kaniya. Daghang guwardiya ang gustong mobasa sa atong mga literatura. Makahimo pa gani kita sa pagsugod ug pagtuon sa Bibliya diha sa lawak-hulatanan. Kon tugotan kita sa guwardiya nga mobisita sa usa ka espesipikong tawo sa apartment nga nagpakitag interes, sagad mas maayo nga dili na manuktok sa ubang pultahan sa maong bilding.
7. Unsay angay natong hinumdoman maylabot sa atong bag pangsangyaw?
7 Pamostura ug Pamatasan: Dali kaayo kitang mamatikdan sa mga tawo kon magbitbit kitag dagkong bag. Busa, mas maayo tingali nga mogamit kita ug gamay nga bag o dili na lang gayod magdalag bag. Ang ubang mga magmamantala naggamit ug nipis nga polder aron butangan sa literatura nga buot nilang itanyag ug nagbitbit sa ilang Bibliya o kaha nagbutang niana diha sa ilang bulsa.
8. Unsaon pag-organisar ang grupo sa pagsangyaw diha sa mga apartment?
8 Labing maayo nga dili magtapok sa dinagkong mga grupo, ilabina diha sa mga hulatanan o sa mga parkinganan, sanglit magkuha kinig atensiyon sa mga tawo. Kinahanglang mag-amping sa dihang mosangyaw sa mga apartment sa mga dapit nga kaylap ang krimen. (Prov. 22:3) Pananglitan, mahimong duha o tulo ka paris sa mga magmamantala ang mosangyaw sa usa ka andana nga dili maglagyo sa usag usa, tingali magpulihanay ug panuktok sa pultahan samtang ang lain maghulat.
9. Unsaon nato pagpakitag maayong pamatasan, ug nganong hinungdanon kini?
9 Sa dihang mosulod sa usa ka apartment, ipahid una ang imong sapatos ug paneguroa nga masirad-an ang pultahan. Sa paghimo niana, atong mamenosan ang mga rason sa pagreklamo sa mga namuyo diha niana. Kon nakasulod ka na, diretso dayon sa elevator o sa andana nga inyong sangyawan imbes maglangaylangay diha sa pultahan. Makatabang kini aron dili kita dudahan sa uban.
10. Unsay atong himoon aron dili kita makatugaw sa mga residente?
10 Kasagaran sa mga apartment, ang kabanha molanog diha sa pasilyo. Busa ayaw kaayog kusga ang imong tingog, ug sulti nga igo lang madungog sa tagbalay. Kon makig-estorya sa mga igsoon, hinaya lang ang inyong tingog, ug sulti sa kalmado ug lumo nga paagi aron dili kamo dudahan. Aron dili makatugaw sa mga residente, sugdan sa pipila ka magmamantala ang pagkobre sa masigkatumoy sa pasilyo hangtod nga matapos ang tibuok andana, imbes ganiron kana pagkobre. Dugang pa, ang kusog ug inisog nga pagtuktok makapahadlok sa tagbalay.
11. Unsang mga sugyot ang makatabang sa dihang manuktok kita sa pultahan nga adunay lilianan?
11 Kon ang pultahan adunay peephole o lilianan, barog lang sa atubangan niana aron ang tagbalay makakita kanimo ug sa imong kauban. Tan-aw sa lilianan, ug kon imong mamatikdan nga adunay molili, pangayog katahoran ug sangyawi dayon siya. Kon mangutana siya, ‘Kinsa mo?’ mas maayo nga isulti ang imong ngalan ug ang ngalan sa imong kauban. Basin ablihan kamo sa tagbalay. Apan kon dili, ipadayon lang gihapon ang imong presentasyon bisag diha lang sa pultahan.
12. Unsay atong himoon aron malikayan ang problema sa dihang magbilin ug mga literatura sa walay-tawo nga mga apartment?
12 Kon Wala ang Tagbalay: Ang mga literatura nga gibilin diha sa gawas sa pultahan dali rang mahulog sa salog ug mahimong magkalamukat. Busa, bisan unsang literatura nga ibilin diha sa walay tawo nga apartment kinahanglang ibutang sa dapit nga dili gayod makita sa mangagi.
13. Unsay atong himoon kon makahibalag kitag nasuko nga tagbalay?
13 Nasuko nga mga Tagbalay: Kon makahibalag kitag tagbalay nga nasuko ug nagplanong mosumbong sa tagdumala, mas maayo nga mobiya na lang sa maong andana ug mobalik sa sunod higayon. Sa ubang mga kahimtang, mas maalamon nga mobiya sa bilding aron malikayan ang posibleng komprontasyon uban sa tagdumala. Bisan pag dili moingon ang tagbalay nga dili na siya magpaduaw, mas maayo nga maghimo kag nota nga dili-sangyawan ang maong numero sa apartment ug ibutang kini uban sa kard sa teritoryo. Sama sa ubang adres nga gimarkahag dili-sangyawan, kinahanglang duawon kini sa popanahon aron mahibaloan ang hunahuna sa tagbalay.
14, 15. Kon papahawaon kita sa usa ka hawas sa apartment, unsay angay natong himoon?
14 Kon Papahawaon Ka: Kon papahawaon ka sa tagdumala, sa guwardiya, o ni bisan kinsang hawas sa bilding samtang nagsangyaw, maalamon nga motuman dayon sa ilang hangyo. Kutob sa maarangan, buot natong likayan ang panaglalis nga lagmit mosangpot sa pagkiha o pagsumbong ngadto sa mga polis. Kasagaran, ang mga empleyado sa apartment dili mapihigon sa mga Saksi ni Jehova kondili igo rang nagtuman sa ilang trabaho.
15 Kon papahawaon ka sa usa ka hawas sa bilding, mahimo tingali nimong isaysay kaniya sa maluloton ug mataktikanhong paagi ang tuyo sa imong pagduaw. (1 Ped. 3:15) Atong ilhon ang iyang katungdanan nga pahimut-an ang mga residente ug imentinar ang seguridad sa bilding. Basin iya kang tugotan nga magpabilin sa bilding. Apan kon dili, biya nga matinahoron. Kon itugot sa kahimtang, hangyoa nga magbilin ka ug mga literatura matag karon ug unya diha sa hulatanan. (Col. 4:6) Kini nga mga kahimtang kinahanglang ipahibalo kanunay ngadto sa magtatan-aw sa pag-alagad.
16. Unsay atong himoon kon magpadayon gihapon ang problema sa atong pagpaningkamot nga mosangyaw diha sa usa ka apartment?
16 Paglabay sa igoigong panahon, tingali mahimong sulayan sa mga magmamantala nga kobrehan ang maong bilding sa maalamong paagi. Kon dili gayod itugot ang pagsangyaw diha sa mga apartment, ang mga magmamantala maningkamot nga makontak ang mga residente niana sa ubang mga paagi, sama sa pagsangyaw pinaagig telepono o pinaagig mga sulat. Ang ubang magmamantala mosangyaw diha sa kadalanan sa atubangan o palibot sa maong apartment. Himoon nila kini sa buntag samtang mopadulong pa sa trabaho ang mga residente, ug sa gabii sa dihang ang kadaghanan kanila mopauli na.
17. Nganong hinungdanon ang pagsangyaw diha sa mga apartment?
17 Ang kataposan niining daotang sistema haduol na. Kadto lamang nagatawag sa ngalan ni Jehova ang maluwas. “Apan, unsaon nila pagtawag kaniya kinsa wala sila magbutang ug pagtuo? Unsaon, sa baylo, pagbutang nila ug pagtuo kaniya kinsa wala nila madunggi?” (Roma 10:13, 14) Daghan niadtong “hustong nakiling alang sa kinabuhing walay kataposan” ang nagpuyo sa mga apartment. (Buh. 13:48) Pinaagi sa pagkamaalamon ug pagpakitag maayong panghukom, ato silang masangyawan sa maayong balita.