“Magpabilin Kamo sa Gugma sa Diyos”

1. Unsay katuyoan sa pagpatik sa librong “Magpabilin Kamo sa Gugma sa Diyos”?

¹ Mahinamon gayod kitang nagpaabot sa pagtuon sa bag-ong libro nga “Magpabilin Kamo sa Gugma sa Diyos” diha sa Pagtuon sa Kongregasyon sa Bibliya nga magsugod sa semana sa Pebrero 23! Ang hinapos nga bahin sa sulat gikan sa Nagamandong Lawas ngadto sa tanang nahigugma kang Jehova nag-ingon: “Gilaoman gayod namo nga kining libroha makatabang aron ipadayon nimo ang pagpadapat sa kamatuoran diha sa imong kinabuhi ug niana makapabilin ka ‘sa gugma sa Diyos . . . nga nagapanglantaw sa kinabuhing walay kataposan.’​—Judas 21.”

2. Sa unsang mga bahin sa atong kinabuhi makatabang kining bag-ong libro?

² Kon Unsay Pagatun-an: Sa unsang paagi ikapadapat ang mga prinsipyo sa Bibliya diha sa pagpilig mga higala, kalingawan, pagtahod sa awtoridad, personal nga mga batasan, kaminyoon, sinultihan, ug mga kostumbre? Ang atong tanlag magiyahan sa hataas nga mga sukdanan sa pagkamatarong nga gibutyag diha sa Pulong sa Diyos. (Sal. 19:7, 8) Samtang mouswag ang atong pagsabot sa mga sukdanan ni Jehova, mas molig-on ang atong tinguha nga sundon ug pahimut-an siya sa tanang bahin sa atong kinabuhi.​—Prov. 27:11; 1 Juan 5:3.

3. Nganong angay natong himoon ang atong maarangan aron makapakigbahin sa pagtuon matag semana?

³ Paningkamot sa Pagpakigbahin: Sa dihang mangandam, himoang tumong ang pagdayeg sa Diyos taliwala sa nagkatigom niyang katawhan. (Heb. 13:15) Kining bag-ong publikasyon pagatun-an diha sa kongregasyon. Ang gipamubong materyal nga pagakobrehan matag semana makatabang aron makapangandam kitag maayo ug mas epektibo natong mapaambit ang atong nakat-onan. Ang atong maayong pagkaandam, mubo, ug direkta-sa-puntong mga komento makapadasig sa uban sa paghigugma ug sa pagbuhat ug maayo. Makatabang usab kini aron mahimong madasigon ug matulon-anon ang panaghisgot. (Heb. 10:24) Dugang pa, dako gayod ang atong kalipay samtang ginapahayag nato ang atong pagtuo.

4. Nganong hinungdanon ang pagsunod sa mga sugo ni Jehova?

⁴ Sa kataposang gabii sa kinabuhi ni Jesus sa yuta, iyang gipasiugda ang kahinungdanon sa pagsunod sa mga sugo ni Jehova aron kita makapabilin diha sa gugma sa Diyos. (Juan 15:10) Sa tabang sa librong “Gugma sa Diyos,” molig-on gayod ang atong tinguha nga ipadapat ang mga prinsipyo sa Bibliya sa atong adlaw-adlawng pagkinabuhi aron ‘kita makapabilin sa gugma sa Diyos.’​—Judas 21.