Pagtudlo sa Yanong Paagi
1. Unsa ang usa ka hinungdanong paagi sa tin-aw ug epektibong pagpanudlo?
1 Ang kayano maoy hinungdanong paagi sa epektibong pagpanudlo. Ang pagtagad sa paagi sa pagpanudlo ni Jesus, ang Dakong Magtutudlo, makatabang sa pagpauswag sa atong “arte sa pagpanudlo.”—2 Tim. 4:2; Juan 13:13.
2. Unsay nalangkit sa yanong pagpanudlo, ug kana mosangpot sa unsa?
2 Sulti nga Yano: Ang Wali sa Bukid naundan sa pipila sa labing hinungdanong kamatuoran nga gipamulong sukad, ug kanang tanan gisaysay sa yanong paagi. (Mat., kap. 5-7) Ang mga tawo nga naminaw kang Jesus “nahingangha sa iyang paagi sa pagpanudlo.” Bisan ang mga polis nga nagdakop kaniya nakaingon: “Wala pa gayoy laing tawo nga nakasulti ug sama niini.” (Mat. 7:28, 29; Juan 7:46) Kita dili kinahanglang mogamit ug mapagawalon ug komplikado nga mga pulong, o detalyado kaayo nga mga ilustrasyon aron makombinsir gayod ang uban. Ang kamatuoran tin-awng ikapahayag pinaagi sa mga pulong nga daling masabtan.
3. Nganong ang pipila matental sa pagpaulan ug daghang impormasyon ngadto sa ilang mamiminaw, ug sa unsang paagi kini malikayan?
3 Tagda Kon Unsa ka Daghang Impormasyon: Si Jesus nagtagad sa kahimtang sa iyang mamiminaw sa pagtino kon unsa ka daghang impormasyon ang iyang itudlo kanila. (Juan 16:12) Kita kinahanglang magmapaniiron ug magmapailin-ilinon niining bahina, ilabina sa dihang kita mosangyaw sa mga paryente, bag-ong mga interesado, o mga bata. Dili nato sila angayng paulanan ug daghang impormasyon bisan pag morag atentibo silang naminaw kanato. Ang mga tawong matinud-anog kasingkasing padayong mokuhag kahibalo sa matuod nga Diyos, si Jehova.—Juan 17:3; 1 Cor. 3:6.
4. Nganong maayong ipasiugda ang pangunang mga punto imbes ang daghang detalye?
4 Ipasiugda ang Pangunang mga Punto: Wala himoang komplikado ni Jesus ang iyang pagpanudlo pinaagi sa pagdugang ug hilabihan ka daghang detalye. Sa dihang siya miingon, “Ang tanan nga anaa sa handomanang mga lubnganan . . . manggula,” gibati niya nga dili pa panahon nga mohatag siyag daghang impormasyon bahin sa duha ka dulnganan niadtong mga pagabanhawon. (Juan 5:28, 29) Sa dihang magdumalag mga pagtuon sa Bibliya, angay natong ipasiugda ang pangunang mga punto ug likayan ang paghisgot sa wala kinahanglanang materyal.
5. Unsang panalangin ang atong matagamtam kon kita manudlo sa yanong paagi?
5 Kita mapasalamaton gayod nga si Jehova nagtudlo kanato sa yanong paagi sa tanang butang nga kinahanglan natong mahibaloan! (Mat. 11:25) Hinaot nga kita manudlo sa yanong paagi ug tagamtamon ang kalipay sa atong mabungahong ministeryo.