Ang Pagpamalandong Gikinahanglan sa Masibotong mga Ministro
1. Unsay nakatabang kang Jesus sa pagsentro sa iyang hunahuna sa panguna niyang buluhaton?
1 Gigugol ni Jesus ang tibuok gabii sa pag-ayo sa mga masakiton ug pagpagulag mga demonyo. Sa dihang nakaplagan siya sa iyang mga tinun-an pagkasunod adlaw, sila miingon: “Ang tanan nangita kanimo,” nga nag-agda kaniya sa pagpadayon sa paghimog milagro. Apan si Jesus wala magpabalda sa iyang pangunang buluhaton nga mao ang pagsangyaw sa maayong balita. Siya mitubag: “Mangadto kita sa laing dapit, sa kasikbit nga mga lungsod, aron makawali usab ako didto, kay alang niini nga katuyoan nga ako mianhi.” Unsay nakatabang kang Jesus sa pagsentro sa iyang hunahuna sa panguna niyang buluhaton? Siya mobangon ug sayo aron sa pag-ampo ug pagpamalandong. (Mar. 1:32-39) Sa unsang paagi ang pagpamalandong makatabang kanato nga magmasiboton sa ministeryo?
2. Unsay mahimo natong palandongon aron makapadayon kitang masiboton sa ministeryo?
2 Kon Unsay Pamalandongon: Nakita ni Jesus nga ang mga tawo “pinanitan ug nagkatibuagsa sama sa mga karnero nga walay magbalantay.” (Mat. 9:36) Busa mahimo usab natong palandongon nga ang mga tawo nagkinahanglan gayod sa atong mensahe ug hamubo na ang panahong nahibilin. (1 Cor. 7:29) Makapamalandong kita sa mga buhat ug hiyas ni Jehova, sa atong pribilehiyo ingong iyang mga Saksi, ug sa bililhong kamatuoran nga atong nakat-onan gikan sa iyang pulong nga wala pa makat-oni sa mga tawo sa atong teritoryo.—Sal. 77:11-13; Isa. 43:10-12; Mat. 13:52.
3. Sa unsang mga higayon kita makapamalandong?
3 Kon Kanus-a Mamalandong: Sama ni Jesus, ang pipila mobangon ug sayo samtang hilom pa ang palibot. Ang uban mamalandong sa dili pa matulog. (Gen. 24:63) Angay kitang maggahig panahon sa pagpamalandong bisan unsa pa kita ka puliki. Ang uban namalandong samtang nagbiyahe. Gipahimuslan sa uban ang pipila ka yugto sa tingpaniudto aron makapamalandong nga walay disturbo. Ang pagpamalandong ug kadiyot sa dili pa mosangyaw nakatabang sa daghan nga magmasiboton ug magmaisogon sa ministeryo.
4. Nganong angay kitang mamalandong?
4 Ang pagpamalandong makapalig-on sa atong tinguha sa pag-alagad kang Jehova ug sa pagsentro sa atong hunahuna sa atong buluhaton. Sama kang Jesus, ang Pangunang Ministro ni Jehova, dakog ikatabang kanato ang pagpamalandong.