Pangutana

◼ Unsang mga prinsipyo sa Bibliya ang mapadapat bahin sa paggamit ug cell phone sa dihang anaa sa Kristohanong mga tigom ug sa ministeryo?

“Adunay Tinudlong Panahon Alang sa Tanang Butang.” (Eccl. 3:1): Tungod sa cell phone, ang mga tawo makateks o makaestorya sa uban sa halos bisan unsang oras. Apan, may panahon nga ang mga Kristohanon dili angayng magpabalda sa ilang cell phone. Pananglitan, ang atong mga tigom maoy panahon sa pagsimba kang Jehova, pagdawat ug espirituwal nga instruksiyon, ug sa pagdinasigay. (Deut. 31:12; Sal. 22:22; Roma 1:11, 12) Puwede ba natong patyon ang cell phone inig-abot nato sa tigom ug unya ra kini tan-awon inigpauli nato? Kon gikinahanglan nga dili patyon ang atong cell phone kay basig dunay emerhensiya, ibutang kini sa setting nga di makadisturbo sa uban.

‘Himoa ang Tanang Butang Tungod sa Maayong Balita.’ (1 Cor. 9:23): Usahay, puwedeng gamiton ang cell phone diha sa ministeryo. Pananglitan, ang brader nga nanguna tingali makagamit niini aron susihon kadtong nagsangyaw sa ubang bahin sa teritoryo. Ang magmamantala usahay makagamit sa ilang cell phone aron tawgan ang interesado o Bible study sa dili pa moduaw, ilabina kon layo ang iyang gipuy-an. Kon duna tay cell phone, dili nato tugotang makabalda kini samtang makigsulti ta sa tagbalay. (2 Cor. 6:3) Samtang maghulat sa uban, inay nga motawag o magteks sa usa ka higala, dili ba maayong isentro ang atong pagtagad diha sa atong ministeryo ug sa atong kauban?

Magmahunahunaon sa Uban. (1 Cor. 10:24; Filip. 2:4): Dili nato batasanon nga ma-late sa mga tigom alang sa pagsangyaw nga magsalig nga kanunay ra tang makatawag ug makateks sa uban aron sutaon kon asa ang teritoryo. Kon ma-late ta, sagad organisahon na usab ang grupo. Siyempre, may panahon nga di kapugngan nga kita usahay ma-late. Apan, kon pirme tang moabot sa untop nga oras, kita nagtahod sa kahikayan ni Jehova ug nagpakitag konsiderasyon sa brader nga nanguna ug sa atong isigkamagmamantala.