Panggawi nga Maghimaya sa Diyos
1. Nganong ang mga Saksi ni Jehova mailhan dayon dihang motambong ug kombensiyon?
1 Mailhan dayon kita sa mga tawo nga kita motambong sa distritong kombensiyon. Magtaod tag badge card ug grupogrupong mobiyahe kada adlaw. Adunay pipila ka pahinumdom nga makatabang nato sa paghimaya sa Diyos pinaagi sa atong maayong panggawi samtang naa sa lugar sa kombensiyon.—1 Ped. 2:12.
2. Sa unsang paagi makahimaya kita sa Diyos pinaagi sa atong kasarangang sinina samtang naa sa lugar sa kombensiyon?
2 Kasarangang Sinina: Ang mga nagtan-aw sagad makadayeg sa atong kasarangang sinina dihang nagtambong kita sa kombensiyon. Pero ang atong binestihan dihang kita mangaon sa restawran o mag-shopping mas dakog epekto sa mga tawo sa palibot. Nianang mga higayona, angay nga kasarangan ug dili sobra ka kaswal ang atong isul-ob. Maayong makita sa mga tawo nga kita lahi sa mga dili magtutuo. (Roma 12:2) Isul-ob usab nato ang atong badge card, kay kini magpahibalo sa uban sa atong kombensiyon, magbukas ug kahigayonan nga makasangyaw, ug mailhan kita sa ubang delegado.
3. Sa unsang paagi kita makapakitag pagkamapailobon ug pagkamatinahoron?
3 Mapailobon ug Matinahoron: Sa kalibotan diin kaugalingon ray gihunahuna sa daghan, ang atong pagkamapailobon ug pagkamatinahoron makapahimuot sa mga makaobserbar! (2 Tim. 3:1-5) Dihang magreserbag lingkoranan o maglinya aron mokuhag bag-ong basahon, dili kita mangita sa kaugalingong kaayohan apan nianang sa uban. (1 Cor. 10:23, 24) Human sa iyang unang pagtambong sa kombensiyon, usa ka interesado miingon, “Di ko makahinumdom sa mga pakigpulong niadtong adlawa, pero napatik sa akong hunahuna ang panggawi sa mga Saksi.”
4. Nganong angay tang moboluntaryo sa kombensiyon kon itugot sa atong kahimtang?
4 Andam Moboluntaryo: Ang pagkaandam moboluntaryo maoy usa ka ilhanan sa matuod nga Kristohanon. (Sal. 110:3) Sa usa ka kombensiyon, mga 600 ka igsoon ang miboluntaryo sa pagpanghinlo una pa ang adlaw sa kombensiyon. Ang mga kawani sa pasilidad mikomento: “Nahingangha kaayo mi sa among nakita! Dili kami makatuo nga boluntaryo ang tanan.” Naghinamhinam na kita sa 2013 nga distritong kombensiyon ug sa kahigayonan nga mahimaya ang Diyos pinaagi sa atong panggawi.
[Kahon sa panid 3]
Mga Pahinumdom sa 2013 Distritong Kombensiyon
◼ Oras sa Programa: Sa tulo ka adlaw, ang programa magsugod sa 8:20 s.b. Nianang orasa, ang tanan kinahanglang manglingkod na aron ang programa makasugod nga hapsay. Sa Biyernes ug Sabado, ang paniklop nga awit ug pag-ampo maoy sa alas 3:50 s.h. ug alas 2:35 s.h. sa Dominggo.
◼ Pagreserbag Lingkoranan: Ang mga lingkoranan ireserba lang para sa mga kauban sa balay, sakyanan, o sa imong mga Bible study.—1 Cor. 13:5.
◼ Paniudto: Palihog pagbalon ug paniudto imbes mobiya aron mopalit ug pagkaon human sa sesyon. Mahimong magdalag gamayng cooler nga ikabutang sa ilalom sa lingkoranan. Ayaw pagdalag dagkong cooler ug bildong mga sudlanan diha sa kombensiyon.
◼ Donasyon: Atong ikapakita ang pagpabili sa mga kahikayan sa kombensiyon pinaagi sa atong pag-amot para sa tibuok-kalibotang buluhaton panahon sa kombensiyon. Ang mga tseke nga idonar kinahanglang payable to “Watch Tower.”
◼ Aksidente ug Emerhensiya: Kon may emerhensiya diha sa kombensiyon, palihog duola ang usa ka atendant, kinsa magpahibalo dayon niini sa First Aid aron ilang masusi ang kahimtang ug matabangan siya. Kon gikinahanglan, sila motawag sa kinadul-ang ospital.
◼ Tambal: Kon nagtomar kag gireseta nga tambal, palihog paneguroa nga magdalag igong suplay kay walay mabatonan diha sa kombensiyon.
◼ Please Follow Up (S-43) nga Porma: Palihog isulat diha sa Please Follow Up nga porma ang impormasyon bahin sa mga tawong nagpakitag interes nga imong nasangyawan sa di-pormal nga paagi panahon sa kombensiyon. Ang napil-apan nga mga porma mahimong ihatag sa Book Room o sa sekretaryo sa inyong kongregasyon inig-uli ninyo.
◼ Restawran: Pasidunggi ang ngalan ni Jehova pinaagi sa inyong maayong panggawi diha sa mga restawran. Pagsul-ob ug sinina nga haom ingong Kristohanong ministro. Paghatag ug tip kon mao kini ang naandan sa inyong dapit.
◼ Pagboluntaryo: Ang tanang gustong moboluntaryo angayng moadto sa Volunteer Service Department sa kombensiyon. Ang mga bata nga wala pay 16 anyos makaboluntaryo usab kon ubanan sa ginikanan o sa laing hamtong ubos sa pagtugot sa ginikanan.