Sugdan Pagtuon ang Pakigsuod Kang Jehova sa Semana sa Enero 6
1. Sugod sa semana sa Enero 6, sa unsang paagi kita matabangan nga masuod kang Jehova?
1 Gusto ni Jehova nga makigsuod ta kaniya. (Sant. 4:8) Aron matabangan kita nga masuod kaniya, sugod sa semana sa Enero 6, atong tun-an ang Pakigsuod Kang Jehova diha sa Pagtuon sa Kongregasyon sa Bibliya. Bahin sa katuyoan sa libro, ang pasiunang panid nag-ingon: “Ang pagpalandong sa paagi sa pagpadayag ni Jehova sa matag usa sa iyang mga hiyas, pagkakita kon sa unsang paagi hingpit kining gipabanaag ni Jesu-Kristo, ug ang pagsabot kon sa unsang paagi maugmad usab nato kini sila makapasuod kanato sa Diyos.” Sa tuig 2004 ug 2005, kini gitun-an na sa mga kongregasyon. Pero, kadaghanan sa mga duha ka milyong nakadangat sa kamatuoran sukad niadto, kini ang unang higayon nga detalyadong matun-an ang makapadaning mga hiyas ni Jehova. Para sa mga nakatuon na niini, ang pagtuon pag-usab makatabang nila nga mas maapresyar pa ang mga hiyas ni Jehova.—Sal. 119:14.
2. Unsaon pagtuon ang librong Pakigsuod Kang Jehova?
2 Kon Unsaon Kini Pagtuon: Sugdan kini sa konduktor pinaagig mubong introduksiyon, lagmit usa o duha ka tudling pulong. Kay walay mga teksto nga gisugyot nga basahon, ang konduktor maoy mopili sa mga pangunang teksto nga basahon. Pagkahuman sa matag leksiyon, siya mahimong mopatunghag usa o duha ka pangutana agig repaso. Kon dunay kahon nga “Mga Pangutana nga Palandongon,” kini ang gamiton ingong repaso. Kon may oras pa, mahimong ipabasa sa konduktor ang pipila ka teksto sa kahon ug magpatunghag mga pangutana aron komentohan sa mamiminaw.
3. Samtang tun-an ang libro, unsay angay natong buhaton ug ngano?
3 Pahimusli Kini Pag-ayo: Pangandam bisag nakatuon ka na niini kaniadto. Pakigbahin sa komento, kay madayeg niini si Jehova, matabangan ka nga mahinumdoman ang impormasyon, ug madasig nimo ang uban. (Sal. 35:18; Heb. 10:24, 25) Samtang palandongon nimo ang dili-hitupngang mga hiyas ni Jehova, ikaw mas masuod kaniya. (Sal. 77:11-13) Ingong resulta, mas determinado kang motuman sa iyang kasugoan ug mas matukmod nga mosulti sa uban bahin kaniya.—Sal. 150:1-6.