Pangutana
◼ Unsay angayng makat-onan sa mga bata aron mohamtong sa espirituwal?
Ang Kristohanong mga ginikanan daghag ginahimo sa pagmatuto sa ilang mga anak “sa disiplina ug sa pagdumala-sa-kaisipan ni Jehova.” (Efe. 6:4) Pananglitan, nakita sa mga ginikanan nga makatabang ang paghisgot sa inadlawng teksto uban sa ilang mga anak matag buntag. Panahon sa pamilyahanong pagsimba ug sa ubang okasyon, ang mga pamilya tingali magtan-awg video ug maghisgot niini, maghisgot bahin sa espesipikong mga topiko gikan sa Mga Batan-on Nangutana, magdrama-drama sa usa ka asoy sa Bibliya, o magpraktis-sesyon. Apan ang mga bata kinahanglan usab nga tudloan sa lawom nga mga kamatuoran sa Bibliya aron ‘mouswag sa pagkahamtong.’—Heb. 6:1.
Hunahunaa kon unsay atong ginatudlo sa mga tawo sa atong teritoryo. Sa unang pagduaw o dihang mobalikduaw, sagad atong sugdan ang pagtuon sa Bibliya gamit ang Unsay Tinuod nga Gitudlo sa Bibliya? Human niana, atong gamiton ang “Magpabilin Kamo sa Gugma sa Diyos.” Ngano? Sa librong Gitudlo sa Bibliya, ang estudyante makakat-on sa paninugdang kahibalo sa Bibliya. Sa librong “Gugma sa Diyos,” makakat-on siya sa pagpadapat sa mga prinsipyo sa Bibliya diha sa adlaw-adlawng kinabuhi. Ang pagtuon niining duha ka libro makatabang aron ang mga bag-ohan ‘makagamot’ diha kang Kristo ug ‘molig-on sa pagtuo.’ (Col. 2:6, 7) Dili ba makatabang usab kining mga libroha sa atong mga bata? Sila kinahanglang tudloan usab bahin sa lukat, Gingharian, ug sa kahimtang sa mga patay. Ang mga bata kinahanglang mahibalo kon nganong gitugotan sa Diyos ang pag-antos ug kon unsay ilhanan sa kataposang mga adlaw niini nga sistema sa mga butang. Kinahanglang kombinsido sila nga ang mga Saksi ni Jehova maoy nagtudlo sa kamatuoran. Ang mga bata kinahanglang makasabot sa mga prinsipyo sa Bibliya ug makakat-on sa pagbansay “sa ilang mga gahom sa pagsabot.” (Heb. 5:14) Tinuod, angayng tagdon sa ginikanan ang edad ug lebel sa pagsabot sa ilang mga anak. Apan daghang bata ang makasabot sa lawom nga mga kamatuoran sa Bibliya bisag bata pa.—Luc. 2:42, 46, 47.
Sa pagtabang sa mga ginikanan, dunay itagana nga mga giya sa pagtuon base sa librong Gitudlo sa Bibliya diha sa jw.org/ceb. Tan-awa kini diha sa MGA DOKTRINA SA BIBLIYA > MGA TIN-EDYER. Sa umaabot, dunay dugang nga mga giya sa pagtuon nga binase sa librong “Gugma sa Diyos.” Siyempre, mahimo usab gamiton ang mga libro mismo. Ang ginikanan maoy mag-igo kon kini nga materyal lakbitan paghisgot diha sa Pamilyahanong Pagsimba, o kaha gamiton sa pagdumalag pagtuon sa Bibliya sa ilang anak o sa pagbansay sa ilang anak sa personal nga pagtuon.