Pahimusli ang Imong mga Kahigayonan sa Pagsangyaw!
1. Unsay atong makat-onan sa ehemplo ni David?
1 Wala tugoti ni Haring David nga mababagan siya sa iyang kahimtang. Pananglitan, gusto niyang magtukod ug balay para kang Jehova. Dihang wala tugti, gipasibo ni David ang iyang tumong ug giandam ang mga kinahanglanon ni Solomon sa pagtukod sa templo. (1 Hari 8:17-19; 1 Cron. 29:3-9) Imbes magsigeg hunahuna sa dili mahimo, siya nagpokus sa puwede niyang himoon. Unsaon nato pagsundog si David sa pagpangitag kahigayonan sa pagsangyaw sa Gingharian?
2. Unsang pagsusi sa kaugalingon ang atong mahimo?
2 Buhata ang Imong Maarangan: Daghan ang nagpasimple sa ilang kinabuhi aron makaoksilyare o regular payunir. (Mat. 6:22) Mahimo ba sab nimo kana? Kon susihon nimo ang imong kahimtang uban ang pag-ampo, imong makita nga abri para nimo ang “dakong pultahan nga nagatultol ngadto sa kalihokan.” Pahimusli kana nga kahigayonan!—1 Cor. 16:8, 9.
3. Kon dili makapayunir, unsang mga kahigayonan sa pagsangyaw ang puwede natong pahimuslan?
3 Pero komosta kon dili itugot sa imong kahimtang ang pagpayunir? Ayawg palabya ang ubang kahigayonan. Pananglitan, kon pirme kang makaestoryag dili Saksi diha sa trabahoan, gipahimuslan ba nimo ang kahigayonan nga makasangyaw? O kon nagapatambal ka, gipahimuslan ba nimo ang kahigayonan nga makasangyaw sa mga doktor o nars? Hinumdomi nga para niadtong limitado na kaayog mahimo tungod sa katigulangon o grabeng sakit, may probisyon nga makareport silag 15 minutos. Sa imong report, ayawg kalimot nga iapil ang oras sa di-pormal nga pagsangyaw ug ang natanyag nga mga literatura, apil ang mga tract ug imbitasyon sa Memoryal ug kombensiyon. Mahingangha gyod ka sa total nga oras sa daw ginagmayng mga kahigayonan!
4. Unsay imong determinasyon?
4 Bisag unsa pay atong kahimtang, pahimuslan nato ang kahigayonan sa pagsangyaw. Pinaagi niana, matagamtam nato ang katagbawan sa pagkahibalong ginabuhat nato ang atong maarangan para sa Gingharian.—Mar. 14:8; Luc. 21:2-4.