Pagkat-on Gikan sa Eksperyensiyadong mga Magmamantala

Gipabilhan gyod nato ang eksperyensiyadong mga magmamantala sa kongregasyon. Ang pipila dugay nang nag-alagad kang Jehova, samtang ang uban tingali di pa kaayo dugay pero hanas na sa ministeryo. Ilang nakita kon giunsa paggiya ni Jesus ang Kristohanong kongregasyon niining kataposang mga adlaw pinaagi sa pagpakaylap sa buluhatong pagsangyaw ug paghimog tinun-an. (Mat. 28:19, 20) Tungod sa ilang pagpakigbahin sa ministeryo, sila nakabaton ug “gahom nga labaw sa kasarangan” sa pag-atubang ug mga problema ug pagsulay. (2 Cor. 4:7) Daghan tag makat-onan sa eksperyensiyadong mga igsoon. Kon dunay kahigayonan, malipay sila nga itudlo sa uban ang ilang nakat-onan. (Sal. 71:18) Busa, kinahanglang mangita tag kahigayonan nga makakat-on kanila. Sa unsang paagi?

Diha sa Ministeryo. Ang mga bag-ohan o dili eksperyensiyadong mga magmamantala nagkinahanglag pagbansay aron mahimong hanas diha sa ministeryo. Daghan tag makat-onan kon atong panid-an ang paagi sa hamtong nga mga magmamantala. (Tan-awa ang artikulong “Hupti ang Imong Kasibot sa Ministeryo,” sa Pebrero 15, 2015 nga Bantayanang Torre, sa ikatulong parapo ubos sa sub-ulohang “Tabangi ang mga Bag-ohan.”) Unsay imong nakat-onan sa pagpakig-uban nila diha sa ministeryo?

Basin puwede kang magpakuyog sa eksperyensiyadong magmamantala diha sa ministeryo. Kon luya na siya, basin puwede nga sa iyang balay mo magtuon sa imong Bible study. Human sa study, pangutan-a ang magmamantala kon unsay imong pauswagon ug kon unsay iyang ikatambag.

Paggahin ug Panahon sa Pagpakig-uban Nila: Pakig-uban sa eksperyensiyadong mga magmamantala aron mas mailhan nimo sila. Dapita ang usa kanila sa inyong pamilyahanong pagsimba ug interbiyoha siya. Kon luya na siya, basin puwede nga sa ilang balay himoon ang pamilyahanong pagsimba. Pangutan-a siya kon sa unsang paagi siya nakadangat sa kamatuoran. Unsang mga panalangin ang iyang nadawat? Unsang pag-uswag ang iyang nakita sa lokal nga kongregasyon? Nganong malipayon siya sa pag-alagad kang Jehova?

Magmasinabtanon ug magmabalanse sa imong pagdahom. Sama nato, ang eksperyensiyadong mga magmamantala lainlaig katakos sa ministeryo. (Roma 12:6-8) Ang uban edaran na, ug tungod niini limitado silag panahon sa pagpakig-uban nato. Pero, daghan tag makat-onan nila tungod sa ilang kasinatian sa pag-alagad nga matinumanon kang Jehova.