Himoa Ninyong Sumbanan ang mga Manalagna—Habacuc
1. Nganong makasabot ta sa gibati ni Habacuc?
1 Samtang nagkagrabe ang pagkadaotan sa kalibotan, gibati tingali nato ang gibati ni Habacuc, kinsa nangutana kang Jehova: “Nganong gipakita mo kanako ang makadaot, ug ikaw nagatan-aw lamang sa kasamok?” (Hab. 1:3; 2 Tim. 3:1, 13) Ang pagpamalandong sa mensahe ug pagkamatinumanon ni Habacuc makatabang sa paglahutay samtang nagpaabot ta sa adlaw ni Jehova sa paghukom.—2 Ped. 3:7.
2. Unsaon nato pagpakita nga kita nagkinabuhi nga matinumanon?
2 Pagkinabuhi nga Matinumanon: Imbes magsigeg hunahuna sa iyang makaguol nga kahimtang, si Habacuc nagpabiling alisto ug aktibo sa pag-alagad. (Hab. 2:1) Gipasaligan ni Jehova ang manalagna nga matuman gyod ang Iyang pulong sa gitakdang panahon ug “kon bahin sa matarong, siya magpadayong buhi tungod sa iyang pagkamatinumanon.” (Hab. 2:2-4) Unsay kahulogan niana para sa mga Kristohanon nga nagkinabuhi panahon sa kataposan? Mas importante nga kombinsido ta nga moabot gyod ang kataposan kay sa mahibalo kon kanus-a kana. Ang pagtuo makatabang nato nga magpabiling mabinantayon ug unahon ang ministeryo.—Heb. 10:38, 39.
3. Nganong kinahanglang magpabilin tang malipayon sa pag-alagad kang Jehova?
3 Pag-alagad nga Malipayon: Ang atong pagtuo masulayan dihang atakehon sa Gog sa Magog ang katawhan ni Jehova. (Ezeq. 38:2, 10-12) Ang gubat kanunay magpahinabog kalisdanan bisan sa modaog. Monihit ang pagkaon, mawala ang mga propidad, ug lisod ang kinabuhi. Unsay atong reaksiyon kon mahitabo kini? Nahibalo si Habacuc nga moabot ang kalisdanan, mao nga determinado siya nga magpabiling malipayon sa pag-alagad kang Jehova. (Hab. 3:16-19) Ang kalipay sa pag-alagad kang Jehova makatabang sab nato nga makalahutay sa umaabot nga mga pagsulay.—Neh. 8:10; Heb. 12:2.
4. Unsay makahatag natog kalipay karon ug sa umaabot?
4 Kadtong luwason ni Jehova sa adlaw sa paghukom padayong tudloan sa diyosnong paagi sa pagkinabuhi. (Hab. 2:14) Ang mga binanhaw tudloan sab bahin kang Jehova. Hinaot pahimuslan nato karon ang tanang kahigayonan sa pagsangyaw bahin kang Jehova ug sa iyang katingalahang mga buhat!—Sal. 34:1; 71:17.