Nakab-ot ni Hulda ang Iyang Tumong

KON nakaadto na ka sa gamayng isla sa Sangir Besar sa Indonesia pipila ka tuig kaniadto, tingali nakakita kag tulo ka sister daplin sa dagat. Nailhan sila sa isla tungod sa ilang pagministeryo—nga nagatabang sa mga tawo nga masabtan ang Bibliya. Pero nianang higayona, lahi ang ilang ginahimo.

Una, moadto sila sa dagat ug mangitag bato. Ang uban niana parehas ka dako sa bola sa soccer. Sunod, ang mga babaye manglingkod sa gagmayng bangko nga kahoy ug mogamit ug martilyo aron buakon ang mga bato hangtod nga mahimo ning mas gamay pa sa itlog sa manok. Human niana, ilang ibutang ang gagmayng mga bato sa plastik nga balde ug dad-on kini pasaka sa lugar diin sila nagpuyo. Dayon, ibalhin nila ang mga bato diha sa mga sako aron ikarga sa mga trak ug gamiton sa paghimog mga dalan.

Usa sa mga sister mao si Hulda. Kompara sa uban, mas daghan siyag panahon sa paghimo niini nga trabaho. Kasagaran, gamiton niya ang iyang kita para sa adlaw-adlawng panginahanglan sa iyang pamilya. Pero karon, naa siyay dugang tumong. Gusto niyang mopalit ug tablet aron maka-access sa JW Library^® app. Nahibalo si Hulda nga ang mga video ug ang ubang publikasyon sa app makapauswag sa iyang ministeryo ug pagsabot sa Bibliya.

Si Hulda nagtrabahog dugang duha ka oras kada buntag sulod sa usa ka bulan ug tunga. Ang mga bato nga iyang gibuak igo-igo nga nakapuno sa gamay nga trak. Sa ulahi, nakatigom siyag igong kuwarta nga ipalit ug tablet.

“Bisag gikapoy ko ug gipamaolan sa pagbuak ug mga bato,” si Hulda miingon, “nalimtan ra dayon nako ang kahago dihang nagamit na nako ang bag-ong tablet. Nakatabang ni nga mahimo kong mas epektibo sa ministeryo, ug mas sayon na para nako ang pagpangandam sa mga tigom.” Miingon sab siya nga ang tablet nakatabang niya pagsugod sa pandemic, kay ang mga kalihokan sa kongregasyon gihimo pinaagig virtual. Nalipay ta nga nakab-ot ni Hulda ang iyang tumong.