Gusto ni Jehova nga ang Tanan Maghinulsol

1. Unsay gipasabot sa paghinulsol?

KON makahimo tag sala, importante nga maghinulsol ta. Sa Bibliya, ang tawo nga naghinulsol mag-usab sa iyang hunahuna bahin sa iyang nahimo nga sala, mohunong sa paghimo niini, ug determinado nga dili na kini himoon pag-usab.—Tan-awa sa Glossary ang “Paghinulsol.”

2. Nganong kitang tanan kinahanglang makakat-on bahin sa paghinulsol? (Nehemias 8:​9-11)

² Ang tanang tawo kinahanglang makakat-on bahin sa paghinulsol. Ngano? Kay kitang tanan makasala kada adlaw. Ingong kaliwat ni Adan ug Eva, ang matag usa nato nakapanunod sa sala ug kamatayon. (Roma 3:23; 5:12) Walay usa nato ang nakalingkawas niana. Bisan ang mga alagad sa Diyos nga may talagsaong pagtuo, sama kang apostol Pablo, nakigbisog sa sala. (Roma 7:​21-24) Nagpasabot ba ni nga magsige na lang tag kaguol tungod sa atong mga sala? Wala. Si Jehova maluluy-on ug gusto niya nga magmalipayon ta. Konsideraha ang nahitabo sa mga Hudiyo sa panahon ni Nehemias. (Basaha ang Nehemias 8:​9-11.) Dili gusto ni Jehova nga magsige silag kaguol tungod sa ilang nangaging mga sala. Gusto niya nga magmalipayon sila sa pagsimba kaniya. Nahibalo si Jehova nga ang paghinulsol moresultag kalipay. Maong iya tang gitudloan bahin niini. Kon maghinulsol ta sa atong mga sala, makasalig ta nga ang atong maluluy-ong Amahan magpasaylo nato.

3. Unsay atong hisgotan niini nga artikulo?

³ Niini nga artikulo makakat-on tag dugang bahin sa paghinulsol. Konsiderahon nato ang tulo ka butang. Una, hisgotan nato kon unsay gitudlo ni Jehova sa Israel bahin sa paghinulsol. Ikaduha, susihon nato kon giunsa pagtabang ni Jehova ang mga makasasala sa paghinulsol. Ug ikatulo, hisgotan nato kon unsay nakat-onan sa mga sumusunod ni Jesus bahin sa paghinulsol.

KON UNSAY GITUDLO NI JEHOVA SA ISRAEL BAHIN SA PAGHINULSOL

4. Unsay gitudlo ni Jehova sa nasod sa Israel bahin sa paghinulsol?

⁴ Dihang giorganisar ni Jehova ang mga Israelinhon ingong nasod, mihimo siyag pakigsaad, o pormal nga kasabotan, uban nila. Kon sundon nila ang iyang mga balaod, iya silang proteksiyonan ug panalanginan. Bahin sa maong mga balaod, iya silang gipasaligan: “Kini nga sugo nga akong gihatag kaninyo karon dili lisod sabton ug dili sab lisod tumanon.” (Deut. 30:​11, footnote, 16) Sa laing bahin, kon mosupak sila kaniya—pananglitan kon mosimba silag laing mga diyos—dili niya sila panalanginan ug sila mag-antos. Pero wala na magpasabot nga wala na silay paglaom. Puwede gihapon nilang mabatonan pag-usab ang pag-uyon sa Diyos kon sila “mobalik kang Jehova nga [ilang] Diyos ug maminaw kaniya.” (Deut. 30:​1-3, 17-20) Sa ato pa, puwede silang maghinulsol. Kon ila nang himoon, si Jehova makigsuod nila ug mabatonan nila pag-usab ang iyang panalangin.

5. Giunsa pagpakita ni Jehova nga wala gyod siya mohunong sa pagtabang sa iyang katawhan? (2 Hari 17:​13, 14)

⁵ Ang piniling katawhan ni Jehova balikbalik nga mirebelde kaniya. Gawas pa sa pagsimbag mga diyosdiyos, mihimo silag daotan kaayong mga buhat. Tungod niana, sila nag-antos. Pero wala gyod mohunong si Jehova sa pagtabang sa iyang masinupakong katawhan. Balikbalik siyang nagpadalag mga propeta aron dasigon ang iyang katawhan nga maghinulsol ug mobalik kaniya.—Basaha ang 2 Hari 17:​13, 14.

6. Giunsa paggamit ni Jehova ang iyang mga propeta aron tudloan ang iyang katawhan sa kaimportante sa paghinulsol? (Tan-awa sab ang hulagway.)

⁶ Si Jehova kanunayng migamit sa iyang mga propeta aron pasidan-an ug tul-iron ang iyang katawhan. Pananglitan, ang Diyos miingon pinaagi kang Jeremias: “Balik, Oh masukihong Israel . . . Dili ko motan-aw kaninyo nga may kasuko, kay ako maunongon . . . Dili ko magpabiling nasuko hangtod sa hangtod. Ilha lang nga kamo sad-an, kay mirebelde mo kang Jehova.” (Jer. 3:​12, 13) Pinaagi kang Joel, si Jehova miingon: “Balik mo kanako sa bug-os ninyong kasingkasing.” (Joel 2:​12, 13) Gisugo sab ni Jehova si Isaias sa pag-ingon: “Hinloi ang inyong kaugalingon; kuhaa ang inyong daotang binuhatan gikan sa akong panan-aw; hunong na sa pagbuhat ug daotan.” (Isa. 1:​16-19) Ug pinaagi kang Ezequiel, si Jehova miingon: “Malipay ba ko sa kamatayon sa tawong daotan? . . . Dili ba mas gusto nakong motalikod siya sa iyang mga dalan ug magpabiling buhi? Dili ko malipay sa kamatayon ni bisan kinsa, . . . busa balik mo ug mabuhi.” (Ezeq. 18:​23, 32) Malipay gyod si Jehova kon maghinulsol ang mga tawo kay gusto niya nga sila magpabiling buhi hangtod sa hangtod. Busa dili hulaton ni Jehova nga magbag-o una ang mga nakasala ayha pa siya motabang nila. Atong hisgotan ang pipila ka pananglitan niana.

7. Pinaagi sa kasinatian ni propetang Oseas ug sa iyang asawa, unsay gitudlo ni Jehova sa iyang katawhan?

⁷ Matikdi kon unsay gitudlo ni Jehova sa iyang katawhan pinaagi sa tinuod nga kasinatian ni Gomer, nga asawa ni propetang Oseas. Nanapaw siya uban sa laing mga lalaki ug gibiyaan si Oseas. Wala na ba siyay paglaom nga magbag-o? Si Jehova, kinsa makabasag kasingkasing, miingon kang Oseas: “Lakaw, higugmaa pag-usab ang babaye nga gihigugma sa laing lalaki ug nanapaw, sama nga gihigugma ni Jehova ang mga Israelinhon bisan pag sila misimba sa ubang diyos.” (Os. 3:1; Prov. 16:2) Matikdi nga ang asawa ni Oseas padayon pang nagabuhat ug seryosong sala. Pero giingnan ni Jehova si Oseas nga adtoon ang iyang asawa, pasayloon siya, ug makig-uli niya.a Pinaagi niini nga kasinatian, gustong tudloan ni Jehova ang iyang katawhan kon unsay iyang gibati kanila. Bisag naghimo silag grabeng mga sala, gimahal gihapon niya sila ug padayon niya silang gitabangan nga maghinulsol ug magbag-o. Unsay gipakita niini bahin kang Jehova, “ang tigsusi sa mga kasingkasing”? Nagpasabot ba ni nga tabangan niya kadtong padayon pang nagahimog seryosong sala aron mapalihok sila sa paghinulsol? (Prov. 17:3) Atong tan-awon.

KON GIUNSA PAGTABANG NI JEHOVA ANG MGA MAKASASALA NGA MAGHINULSOL

8. Unsay gihimo ni Jehova aron tabangan si Cain nga maghinulsol? (Genesis 4:​3-7) (Tan-awa sab ang hulagway.)

⁸ Si Cain mao ang unang anak ni Adan ug Eva. Napanunod niya gikan sa iyang mga ginikanan ang tendensiya sa paghimog daotan. Dugang pa, ang Bibliya nag-ingon bahin kaniya: “Ang iyang mga buhat daotan.” (1 Juan 3:12) Tingali mao nay hinungdan kon nganong si Jehova “wala . . . makauyon kang Cain ug sa iyang halad.” Imbes magbag-o, “nasuko pag-ayo si Cain ug nagmug-ot.” Unsay sunod nga gihimo ni Jehova? Giestorya niya si Cain. (Basaha ang Genesis 4:​3-7.) Matikdi nga si Jehova buotang nakig-estorya kang Cain ug giingnan siya nga iya siyang panalanginan kon mobuhat siyag maayo. Gipasidan-an sab ni Jehova si Cain nga kon dili niya pugngan ang iyang kasuko, posibleng makahimo siyag dili maayo. Makapaguol kay wala maminaw si Cain. Wala niya dawata ang tabang ni Jehova ug wala siya maghinulsol. Human niana nga hitabo, mihunong na ba si Jehova sa pagtabang sa uban sa paghinulsol? Wala gayod!

9. Giunsa pagtabang ni Jehova si David nga maghinulsol?

⁹ Gimahal pag-ayo ni Jehova si Haring David. Gani, gitawag niya si David ingong “tawo nga gikahimut-an sa akong kasingkasing.” (Buh. 13:22) Pero si David nakahimog seryoso kaayong mga sala, sama sa pagpanapaw ug pagpatay. Sumala sa Moisesnong Balaod, si David angayng patyon. (Lev. 20:10; Num. 35:31) Pero tungod sa gugma ni Jehova, milihok siya aron tabangan si David.b Iyang gisugo si propetang Natan nga adtoon ang hari, bisan tuod niadtong panahona wala pa magpakita si David ug bisan unsang ilhanan sa paghinulsol. Migamit si Natan ug ilustrasyon aron matandog ang kasingkasing ni David. Tungod ana, si David naghinulsol. (2 Sam. 12:​1-14) Nagsulat siyag makapatandog nga salmo nga nagpakita sa iyang pagkamahinulsolon. (Sal. 51, superskripsiyon) Kini nga salmo nakahupay sa daghan ug nagpalihok nila nga maghinulsol sa ilang mga sala. Mapasalamaton gyod ta nga mahigugmaong gitabangan ni Jehova ang iyang minahal nga alagad nga si David sa paghinulsol.

10. Unsay imong gibati sa pailob ug pagpasaylo ni Jehova sa makasasalang mga tawo?

¹⁰ Gidumtan ni Jehova ang tanang klase sa sala, ug dili gyod niya ni konsentihon. (Sal. 5:​4, 5) Pero nahibalo siya nga kitang tanan makasasala, ug tungod sa iyang gugma kanato, gitabangan ta niya nga masuklan ang sala. Kanunay siyang naningkamot nga tabangan ang mga tawo, bisan kadtong nagahimog grabe kaayong mga sala, nga maghinulsol ug masuod kaniya. Makapahupay kaayo na! Kon atong pamalandongon ang pailob ug pagpasaylo ni Jehova, matabangan ta nga magpabiling matinumanon kaniya ug maghinulsol dayon dihang makahimo tag sala. Karon, konsiderahon nato kon unsay nakat-onan sa mga sumusunod ni Jesus bahin sa paghinulsol.

KON UNSAY NAKAT-ONAN SA MGA SUMUSUNOD NI JESUS BAHIN SA PAGHINULSOL

11-12. Giunsa pagtabang ni Jesus ang iyang mga mamiminaw nga masabtan kon unsa ka mapinasayloon ang iyang Amahan? (Tan-awa ang hulagway.)

¹¹ Ang Mesiyas miabot niadtong unang siglo C.E. Sama sa gihisgotan sa miaging artikulo, gigamit ni Jehova si Juan nga Tigbawtismo ug si Jesu-Kristo aron tudloan ang mga tawo kon unsa ka importante ang paghinulsol.—Mat. 3:​1, 2; 4:17.

¹² Sa tibuok ministeryo ni Jesus, gitudloan niya ang iyang mga mamiminaw kon unsa ka mapinasayloon ang iyang Amahan. Ang usa ka paagi nga iya nang gihimo mao ang paghatag ug makapatandog nga ilustrasyon bahin sa milayas nga anak. Ang batan-ong lalaki mibiya sa ilang balay aron magpatuyang sa daotang pagkinabuhi. Pero sa ulahi dihang “nakaamgo na siya,” mipauli siya sa ilaha. Unsay reaksiyon sa iyang amahan? Si Jesus miingon nga “samtang layo pa siya sa balay, nalantawan siya sa iyang amahan ug naluoy pag-ayo kaniya. Ang amahan midagan ug migakos sa iyang anak ug mapinanggaong mihalok kaniya.” Ang anak nagplano nga magpakiluoy sa iyang amahan nga himoon siyang ulipon. Pero ang iyang amahan nagtawag kaniya nga “akong anak” ug gidawat siya pag-usab ingong bahin sa pamilya. Ang amahan miingon: “Siya nawala ug nakaplagan.” (Luc. 15:​11-32) Sa wala pa si Jesus mianhi sa yuta, seguradong kadaghan niyang nakita ang dakong kaluoy sa iyang Amahan ngadto sa mahinulsolong mga makasasala. Ang makapatandog nga ilustrasyon ni Jesus nagpakita kon unsa ka maluluy-on ang atong Amahan, si Jehova.

13-14. Unsay nakat-onan ni apostol Pedro bahin sa paghinulsol, ug sa unsang paagi gitudloan niya ang uban bahin niini? (Tan-awa sab ang hulagway.)

¹³ Daghag nakat-onan si apostol Pedro kang Jesus bahin sa paghinulsol ug pagpasaylo. Kadaghan nakahimog sayop si Pedro, pero kanunay siyang gipasaylo ni Jesus. Pananglitan, human ilimod ni Pedro ang iyang Ginoo sa tulo ka higayon, nakonsensiya siya pag-ayo sa iyang gihimo. (Mat. 26:​34, 35, 69-75) Pero human mabanhaw si Jesus, nagpakita siya kang Pedro—nga posibleng silasila ra. (Luc. 24:​33, 34; 1 Cor. 15:​3-5) Segurado nga niadtong higayona, mahigugmaong gipasaylo ug gipasaligan ni Jesus ang iyang mahinulsolong apostol.—Tan-awa ang Marcos 16:7 ug ang study note nga “and Peter.”

¹⁴ Kay nakabenepisyo pag-ayo si Pedro sa iyang paghinulsol ug sa pagpasaylo ni Jesus kaniya, mas makatudlo na siya sa uban bahin niini. Wala madugay human sa pista sa Pentekostes, si Pedro naghatag ug pakigpulong ngadto sa dili magtutuong mga Hudiyo ug giingnan sila nga ilang gipatay ang Mesiyas. Pero mahigugmaon niya silang giingnan: “Busa paghinulsol mo, ug balik mo aron mapapas ang inyong mga sala, aron ang mga panahon sa kahayahay moabot gikan mismo kang Jehova.” (Buh. 3:​14, 15, 17, 19) Busa gipakita ni Pedro nga ang paghinulsol mopalihok sa nakasala sa ‘pagbalik’—sa ato pa, talikdan niya ang iyang sayop nga panghunahuna ug binuhatan—ug sa paghimo na sa mga butang nga makapalipay sa Diyos. Gipasiugda pod ni Pedro nga papason ni Jehova ang ilang mga sala, nga samag wala nila ni mahimo. Ug daghang tuig sa ulahi, gipasaligan ni Pedro ang mga Kristohanon: “Si Jehova [nagpailob] ninyo kay dili niya gusto nga naay malaglag kondili gusto niya nga ang tanan maghinulsol.” (2 Ped. 3:9) Nindot kaayo ni nga pasalig para sa mga Kristohanon dihang makahimo silag sala—bisag unsa pa ni ka seryoso!

15-16. (a) Sa unsang paagi nakakat-on si apostol Pablo bahin sa pagpasaylo? (1 Timoteo 1:​12-15) (b) Unsay atong konsiderahon sa sunod nga artikulo?

¹⁵ Si Saulo nga taga-Tarso daghag nahimong daotan. Bangis siya nga maglulutos sa mga sumusunod sa Kristo. Tingali para sa daghang Kristohanon, wala na siyay paglaom nga maghinulsol. Pero dili ingon ana ang panglantaw sa nabanhawng si Jesus. Nakita niya ug sa iyang Amahan ang maayong mga hiyas ni Saulo. Si Jesus miingon: “Kining tawhana maoy usa ka piniling sudlanan alang kanako.” (Buh. 9:15) Migamit pa gani si Jesus ug milagro aron tabangan si Saulo nga maghinulsol. (Buh. 7:58–8:3; 9:​1-9, 17-20) Human mahimong Kristohanon, si Saulo—nga sa ulahi nailhang apostol Pablo—kanunayng nagpahayag sa iyang apresasyon sa kaayo ug kaluoy nga gipakita kaniya. (Basaha ang 1 Timoteo 1:​12-15.) Ang mapasalamatong apostol miingon: “Tungod sa pagkamaayo sa Diyos gusto niyang tabangan ka nga maghinulsol.”—Roma 2:4.

¹⁶ Dihay higayon nga nahibaloan ni Pablo ang usa ka makauulawng problema bahin sa imoralidad diha sa kongregasyon sa Corinto. Unsay iyang gihimo bahin niini? Sa gihimo ni Pablo, daghan tag makat-onan bahin sa mahigugmaong disiplina ni Jehova ug sa kaimportante sa pagpakitag kaluoy. Hisgotan nato nag dugang sa sunod nga artikulo.