Ayaw Paglangan sa Pagpabawtismo

1. Unsa ang pipila ka rason kon nganong magpabawtismo ta?

GIMAHAL ba nimo si Jehova nga Diyos, nga maoy naghatag nimo sa tanang maayong butang nga imong nabatonan, apil na sa imong kinabuhi? Gusto ba nimong ipakita ang imong gugma kaniya? Ang pinakamaayong paagi nga imo nang mahimo mao ang pagpahinungod sa imong kaugalingon kang Jehova ug pagpabawtismo. Pinaagi ana, mahimo kang bahin sa pamilya ni Jehova. Ug kay si Jehova na man ang Tag-iya nimo, mahimo siyang imong Amahan ug Higala nga maggiya ug mag-atiman nimo. (Sal. 73:24; Isa. 43:1, 2) Ang pagpahinungod ug pagpabawtismo maghatag pod nimog paglaom nga mabuhi hangtod sa hangtod.—1 Ped. 3:21.

2. Unsay atong hisgotan niini nga artikulo?

² Naa bay nakapugong nimo nga magpabawtismo? Kon oo, dili lang ikaw ang mibati niana. Daghan pod ang mibati niana kaniadto pero mihimo silag kausaban sa ilang binuhatan ug panghunahuna aron mahimong kuwalipikado sa bawtismo. Ug karon, sila malipayon ug madasigong nag-alagad kang Jehova. Unsay imong makat-onan sa uban nga nabawtismohan sa unang siglo? Atong hisgotan ang mga kalisdanan nga ilang giatubang ug kon unsay atong makat-onan sa ilang ehemplo.

ANG MGA SAMARIANHON NABAWTISMOHAN

3. Unsay angayng himoon sa mga Samarianhon aron mabawtismohan?

³ Ang mga Samarianhon sa panahon ni Jesus maoy sakop sa relihiyosong grupo nga nagpuyo sa karaang mga siyudad sa Sekem ug Samaria, nga naa sa amihanan sa Judea. Sa dili pa sila mabawtismohan, kinahanglan silang makabaton ug dugang kahibalo sa Pulong sa Diyos. Ngano? Tungod kay ang gidawat lang sa mga Samarianhon ingong Pulong sa Diyos mao ang unang lima ka basahon sa Bibliya—gikan sa Genesis hangtod Deuteronomio—ug basin ang basahon pod sa Josue. Pero nagtuo ang mga Samarianhon nga naay moabot nga Mesiyas, base sa saad sa Diyos diha sa Deuteronomio 18:18, 19. (Juan 4:25) Aron mabawtismohan, kinahanglan nilang dawaton nga si Jesus ang gisaad nga Mesiyas. Ug mao gyod nay gihimo sa “daghang Samarianhon.” (Juan 4:39) Kinahanglan pod nilang langkaton gikan sa ilang kasingkasing ang nakagamot na nga pagpihigpihig batok sa mga Hudiyo.—Luc. 9:52-54.

4. Base sa Buhat 8:5, 6, 14, unsay sanong sa daghang Samarianhon sa pagsangyaw ni Felipe?

⁴ Unsay nakatabang sa mga Samarianhon nga magpabawtismo? Sa dihang gisangyawan ni Felipe ang mga Samarianhon bahin sa Kristo, ubay-ubay kanila ang “midawat sa pulong sa Diyos.” (Basaha ang Buhat 8:5, 6, 14.) Naminaw sila kang Felipe bisag Hudiyo siya. Tingali nahinumdoman nila ang mga teksto gikan sa Pentateuko nga nag-ingon nga ang Diyos dili mapihigon. (Deut. 10:17-19) Gihatagan nilag pagtagad ang “gisulti ni Felipe” bahin sa Kristo, ug ilang gidawat ang klarong ebidensiya nga si Felipe gipadala sa Diyos. Si Felipe naghimo sab ug daghang ilhanan, sama sa pag-ayo sa mga masakiton ug pagpagawas sa mga demonyo.—Buh. 8:7.

5. Unsang mga leksiyon ang imong makat-onan sa mga Samarianhon?

⁵ Ang pagpihigpihig ug kakulang sa kahibalo puwede untang makapugong sa maong mga Samarianhon nga mouswag, pero wala na nila tugoti nga mahitabo. Sa dihang nakombinsir sila nga ang gitudlo ni Felipe mao ang kamatuoran, wala na sila maglangan sa pagpabawtismo. Ang Bibliya nag-ingon: “Dihang mituo sila kang Felipe, kinsa nagpahayag sa maayong balita sa Gingharian sa Diyos ug sa ngalan ni Jesu-Kristo, ang mga lalaki ug babaye nagpabawtismo.” (Buh. 8:12) Kombinsido ba ka nga ang Pulong sa Diyos mao ang kamatuoran? Kombinsido pod ba ka nga ang mga Saksi ni Jehova walay pagpihigpihig ug naningkamot sa pagpakitag tinuod nga gugma—ang ilhanan sa tinuod nga mga Kristohanon? (Juan 13:35) Kon mao, ayaw na paglangan sa pagpabawtismo, ug makasalig ka nga panalanginan ka ni Jehova.

6. Unsay imong makat-onan sa kasinatian ni Ruben?

⁶ Si Ruben, nga taga-Germany, nagdako sa pamilya nga Saksi. Pero sa batan-on pa siya, nagduhaduha siya kon naglungtad ba gyod si Jehova. Unsay nakatabang niya? Midesisyon siya nga mokat-on ug dugang kay naamgohan niya nga kulang pa ang iyang kahibalo. Siya miingon: “Sa akong personal nga pagtuon, kinahanglan nakong susihon kon unsa gyoy tinuod aron mawala ang akong mga pagduhaduha. Maong kadaghan nakong gitun-an ang bahin sa ebolusyon.” Iyang gibasa ang librong Is There a Creator Who Cares About You? Kini nga publikasyon dako gyod ug epekto kang Ruben. Nakaingon siya: ‘Tinuod gyod diay si Jehova!’ Ug sa dihang mibisita siya sa world headquarters, mas milalom pa gyod ang apresasyon ni Ruben sa panaghiusa sa katawhan sa Diyos. Pagbalik ni Ruben sa Germany, nagpabawtismo siya sa edad nga 17. Sama kang Ruben, kon naa pod kay mga pagduhaduha bahin sa imong mga nakat-onan, pag-research bahin niana sa atong mga publikasyon. Mawala ang imong mga pagduhaduha kon naa kay “tukmang kahibalo.” (Efe. 4:13, 14) Ug kon makadungog kag mga eksperyensiya bahin sa gugma ug panaghiusa sa atong mga igsoon sa ubang mga nasod ug makita ni nimo mismo sa inyong kongregasyon, mas molalom ang imong apresasyon sa atong tibuok kalibotang panag-igsoonay.

SI SAULO NGA TAGA-TARSO NABAWTISMOHAN

7. Unsang sayop nga panglantaw ang kinahanglang bag-ohon ni Saulo?

⁷ Tagda ang pananglitan ni Saulo nga taga-Tarso. Usa siya ka Hudiyo nga prominenteg kagikan, ug natudloan siya pag-ayo sa Judaismo. (Gal. 1:13, 14; Filip. 3:5) Niadtong panahona, giisip sa daghang Hudiyo ang mga Kristohanon ingong mga apostata, maong gilutos sila pag-ayo ni Saulo. Abi niya nga mao to ang gusto sa Diyos nga iyang himoon. (Buh. 8:3; 9:1, 2; 26:9-11) Busa kon gusto niyang dawaton si Jesus ug mabawtismohan ingong Kristohanon, kinahanglang andam si Saulo nga makasinatig paglutos.

8. (a) Unsay nakatabang kang Saulo nga magpabawtismo? (b) Base sa Buhat 22:12-16, giunsa pagtabang ni Ananias si Saulo? (Tan-awa sab ang hulagway.)

⁸ Unsay nakatabang kang Saulo nga magpabawtismo? Sa dihang ang hinimayang Ginoong Jesus nagpakita niya, si Saulo nabuta. (Buh. 9:3-9) Nagpuasa siya sulod sa tulo ka adlaw, ug seguradong iyang gipamalandong ang pagpakita ni Jesus kaniya. Tungod ana, nakombinsir si Saulo nga si Jesus ang Mesiyas, ug nga ang mga sumusunod ni Jesus maoy nagsubay sa tinuod nga pagsimba. Seguradong nagbasol gyod siya pag-ayo tungod sa iyang pag-uyon sa pagpatay kang Esteban! (Buh. 22:20) Sa hapit nang matapos ang ikatulong adlaw, ang tinun-ang si Ananias miadto kang Saulo, giayo siya sa iyang pagkabuta, ug gidasig siya nga dili maglangan sa pagpabawtismo. (Basaha ang Buhat 22:12-16.) Si Saulo nagpaubos, namati kang Ananias, ug nagpabawtismo.—Buh. 9:17, 18.

9. Unsang mga leksiyon ang atong makat-onan kang Saulo?

⁹ Daghan tag makat-onan kang Saulo. Ang garbo ug kahadlok sa tawo puwede untang makapugong niya nga magpabawtismo. Pero wala na niya tugoti nga mahitabo. Si Saulo nagpaubos ug mihimog mga kausaban sa iyang kinabuhi aron mahimong sumusunod sa Kristo. (Buh. 26:14, 19) Andam siyang mahimong Kristohanon bisag nahibalo siya nga makasinati siyag mga paglutos. (Buh. 9:15, 16; 20:22, 23) Human sa iyang bawtismo, padayon siyang misalig sa tabang ni Jehova aron malahutay ang mga pagsulay. (2 Cor. 4:7-10) Kon magpabawtismo ka ingong Saksi ni Jehova, basin makasinati pod kag mga kalisdanan o pagsulay sa imong pagtuo. Pero makasalig ka nga kanunay kang tabangan sa Diyos ug sa Kristo.—Filip. 4:13.

10. Unsay imong makat-onan sa kasinatian ni Anna?

¹⁰ Konsideraha ang kasinatian ni Anna, nga taga-Eastern Europe, kinsa Kurdish ug kagikan. Human mabawtismohan ang iyang mama, nagpa-Bible study pod si Anna sa edad nga 9 uban sa pagtugot sa iyang papa. Pero wala malipay ang iyang mga paryente kinsa nagpuyo uban nila. Giisip sa iyang mga paryente nga dakong kaulawan ang pagbiya sa relihiyon sa ilang katigulangan. Sa 12 anyos na si Anna, nananghid siya sa iyang papa nga magpabawtismo siya. Gipangutana siya sa iyang papa kon iya ba ning personal nga desisyon o gipresyur lang siya sa uban. Siya mitubag, “Gimahal nako si Jehova.” Tungod ana, misugot ang iyang papa nga magpabawtismo siya. Human sa iyang bawtismo, si Anna nakasinatig mga pagbiaybiay ug dili maayong pagtratar. Gani usa sa iyang mga paryente miingon, “Mas maayo pa kon mohimo kag daotan o maadik sa sigarilyo kay sa mahimong Saksi ni Jehova.” Unsay nakatabang kang Anna nga makapadayon? Siya miingon, “Gipalig-on ko ni Jehova ug gisuportahan gyod ko ni Mama ug Papa sa akong desisyon.” Gisulat pod ni Anna ang espesipikong mga higayon nga gibati niya ang tabang ni Jehova. Usahay, iya ning balikan ug tan-aw aron dili ni niya malimtan. Kon mahadlok ka nga supakon o lutoson, hinumdomi nga tabangan pod ka ni Jehova.—Heb. 13:6.

SI CORNELIO NABAWTISMOHAN

11. Unsa untay puwedeng makapugong kang Cornelio nga mabawtismohan?

¹¹ Ang Bibliya naghisgot pod sa ehemplo ni Cornelio. Siya “usa ka senturyon,” nga nagdumalag mga 100 ka Romanong sundalo. (Buh. 10:1, footnote) Tungod sa iyang posisyon, lagmit tinahod siya sa mga tawo ug sa mga sundalo. “Naghatag siyag daghang gasa sa kaluoy ngadto sa katawhan.” (Buh. 10:2) Gipadala ni Jehova si apostol Pedro ngadto kaniya aron sangyawan siya sa maayong balita. Ang taas ba nga posisyon ni Cornelio nakapugong niya nga magpabawtismo dayon?

12. Unsay nakatabang kang Cornelio nga magpabawtismo?

¹² Unsay nakatabang kang Cornelio nga magpabawtismo? Mabasa nato sa Bibliya nga si Cornelio “may kahadlok sa Diyos uban sa tibuok niyang panimalay,” ug siya padayong nangamuyo sa Diyos. (Buh. 10:2) Sa dihang gisangyawan siya ni Pedro sa maayong balita, siya ug ang iyang pamilya mituo sa Kristo ug nagpabawtismo dayon. (Buh. 10:47, 48) Andam gyod siyang mohimog bisan unsang kausaban nga gikinahanglan aron makasimba siya kang Jehova uban sa iyang pamilya.—Jos. 24:15; Buh. 10:24, 33.

13. Unsang mga leksiyon ang imong makat-onan kang Cornelio?

¹³ Sama kang Saulo, ang taas nga posisyon puwede pod untang makapugong kang Cornelio nga mahimong Kristohanon. Pero wala na niya tugoti nga mahitabo. Naa bay dagkong kausaban nga kinahanglan nimong himoon sa imong kinabuhi aron mahimong kuwalipikado sa bawtismo? Kon mao, tabangan ka ni Jehova. Panalanginan ka niya sa imong determinasyon nga alagaron siya ug ipadapat ang mga prinsipyo sa Bibliya.

14. Unsay imong makat-onan sa kasinatian ni Tsuyoshi?

¹⁴ Si Tsuyoshi, nga taga-Japan, kinahanglang mohimog kausaban sa iyang trabaho aron mahimong kuwalipikado sa bawtismo. Assistant siya sa direktor o headmaster sa Ikenobo school of flower arrangement. Kon ang headmaster dili makatambong sa mga lubong, si Tsuyoshi ang sagad nga morepresentar niya sa Buddhist nga mga rituwal. Pero sa dihang nahibaloan niya ang kamatuoran bahin sa kamatayon, naamgohan niya nga dili siya puwedeng magpadayon sa maong mga buhat. Maong midesisyon siya nga dili na makigbahin sa maong mga rituwal aron mahimo siyang kuwalipikado sa bawtismo. (2 Cor. 6:15, 16) Nakig-estorya si Tsuyoshi sa headmaster bahin niini. Unsay resulta? Si Tsuyoshi nakapabilin sa iyang trabaho pero wala na siya obligaha nga moapil sa mga rituwal. Nabawtismohan siya mga usa ka tuig sukad sa iyang pagtuon sa Bibliya.a Busa kon kinahanglan pod kang mohimog kausaban sa trabaho aron mapalipay ang Diyos, makalaom ka nga ihatag niya ang imong panginahanglan ug sa imong pamilya.—Sal. 127:2; Mat. 6:33.

ANG MGA TAGA-CORINTO NABAWTISMOHAN

15. Unsa untay nakapugong sa mga taga-Corinto nga magpabawtismo?

¹⁵ Daghang tawo nga nagpuyo sa karaang Corinto ang materyalistiko ug imoral. Nagkinabuhi sila nga daotan ug nagbuhat sa mga butang nga wala uyoni sa Diyos. Maong dili gyod sayon para nila ang paghimog mga kausaban aron makaalagad kang Jehova. Pero sa dihang miadto didto si apostol Pablo aron isangyaw ang maayong balita bahin sa Kristo, “daghan sa mga taga-Corinto nga nakadungog ang mituo ug nagpabawtismo.” (Buh. 18:7-11) Dayon ang Ginoong Jesu-Kristo nagpakita kang Pablo pinaagig panan-awon ug miingon: “Daghang tawo niining siyudara ang akoa.” Busa si Pablo padayong nagsangyaw didto sulod sa usa ka tuig ug unom ka bulan.

16. Unsay nakatabang sa ubang taga-Corinto nga magpabawtismo? (2 Corinto 10:4, 5)

¹⁶ Unsay nakatabang sa mga taga-Corinto nga magpabawtismo? (Basaha ang 2 Corinto 10:4, 5.) Ang Pulong sa Diyos ug ang iyang gamhanang balaang espiritu nakatabang nila sa paghimog dagkong kausaban sa ilang kinabuhi. (Heb. 4:12) Kadtong mga taga-Corinto nga midawat sa maayong balita bahin sa Kristo milampos sa pagbiya sa daotang mga binuhatan sama sa paghuboghubog, pagpangawat, ug homoseksuwalidad.—1 Cor. 6:9-11.b

17. Unsay imong makat-onan sa mga taga-Corinto?

¹⁷ Matikdi nga ang ubang taga-Corinto naay nakagamot na pag-ayo nga mga bisyo, pero wala sila maghunahuna nga dili na gyod sila makabiya niana ug mahimong Kristohanon. Hinuon naningkamot sila nga makasubay sa sigpit nga dalan padulong sa kinabuhing walay kataposan. (Mat. 7:13, 14) Nakigbisog pod ba ka sa usa ka daotang buhat o bisyo aron mabawtismohan? Ayawg surender! Hangyoa si Jehova nga hatagan ka sa iyang balaang espiritu aron masuklan nimo ang tinguha sa paghimog daotan.

18. Unsay imong makat-onan sa kasinatian ni Monika?

¹⁸ Si Monika, nga taga-Georgia, naningkamot pag-ayo nga mahunong ang bastos ug dili maayong sinultihan, apil na ang iyang hilig sa law-ay nga mga musika ug kalingawan, aron mokuwalipikar sa bawtismo. Siya miingon: “Sa tin-edyer pa ko, nakatabang gyod nako ang pag-ampo. Nahibalo si Jehova nga gusto nakong himoon kon unsay husto, ug iya gyod kong gitabangan ug gigiyahan.” Nabawtismohan si Monika sa edad nga 16. Naa bay mga buhat nga kinahanglan nimong biyaan aron makaalagad kang Jehova? Padayong hangyoa si Jehova nga tabangan ka sa paghimog mga kausaban. Hatagan gyod ka niya sa iyang balaang espiritu.—Juan 3:34.

WALAY IMPOSIBLE KON DUNAY PAGTUO

19. Unsay makatabang nimo nga makaya ang bisan unsang babag nga posibleng nakapugong nimo sa pagpabawtismo? (Tan-awa sab ang hulagway.)

¹⁹ Bisag unsa pang babag ang imong giatubang karon nga basin maoy nakapugong nimo sa pagpabawtismo, makasalig ka nga gimahal gyod ka ni Jehova ug gusto niya nga mahimo kang bahin sa iyang pamilya. Giingnan ni Jesus ang iyang mga tinun-an sa unang siglo: “Kon ang inyong pagtuo samag gidak-on sa liso sa mustasa, sultihan ninyo kining bukira, ‘Balhin didto,’ ug kini mobalhin, ug walay imposible alang kaninyo.” (Mat. 17:20) Kini nga mga tinun-an ni Jesus pipila ka tuig pa lang nga nakig-uban niya, maong kinahanglan pa nilang palig-onon ang ilang pagtuo. Pero gipasaligan sila ni Jesus nga kon ugmaron nila ang dakong pagtuo, tabangan sila ni Jehova nga makaya ang samag bukid nga mga babag. Ug tabangan pod ka ni Jehova sa paghimo niana!

20. Sa unsang paagi ka napalig-on sa maayong ehemplo nga gipakita sa mga Kristohanon sa unang siglo ug sa atong panahon?

²⁰ Kon nakita nimo nga naay nakapugong nimo sa pagpabawtismo, himoa dayon ang gikinahanglang mga kausaban. Mahupay ug madasig gyod ka sa ehemplo sa mga Kristohanon sa unang siglo ug sa atong panahon. Hinaot nga ang ilang ehemplo makadasig ug magpalihok nimo nga ipahinungod ang imong kaugalingon kang Jehova ug magpabawtismo. Kana ang pinakamaayong desisyon nga imong mahimo!