Mapainubsanong Dawata ang mga Butang nga Wala Nimo Mahibaloi

1. Unsang katakos ang gihatag ni Jehova kanato, ug ngano?

SI Jehova, ang atong Maglalalang, naghatag natog katakos sa panghunahuna aron makabaton tag kahibalo ug makapakitag pagsabot ug kaalam. Ngano? Kay gusto niya nga makahimo tag maalamong mga desisyon ug moalagad niya base sa tukmang kahibalo.—Prov. 2:1-5; Roma 12:1.

2. (a) Unsay atong mga limitasyon? (Job 37:23, 24) (Tan-awa sab ang hulagway.) (b) Sa unsang paagi ta makabenepisyo kon mapainubsanon natong dawaton ang atong mga limitasyon?

² Bisag naa tay katakos nga mokat-on, limitado ra ang atong nahibaloan karon. (Basaha ang Job 37:23, 24.) Konsideraha ang eksperyensiya ni Job. Si Jehova misukna niyag daghang pangutana aron makita ni Job nga daghan pa siyag wala mahibaloi. Tungod niana, naamgohan ni Job nga kinahanglan siyang magpaubos ug usbon ang iyang panghunahuna. (Job 42:3-6) Makabenepisyo pod ta kon mapainubsanon natong dawaton nga wala ta mahibalo sa tanan. Kon mapainubsanon ta, mosalig ta nga ihatag gyod ni Jehova ang atong gikinahanglan nga impormasyon aron makahimo tag maalamong mga desisyon.—Prov. 2:6.

3. Unsay atong hisgotan niini nga artikulo?

³ Niini nga artikulo, atong hisgotan ang pipila ka butang nga wala nato mahibaloi ug ang dili maayong mga resulta kon magpokus ta niini. Ato pong susihon kon nganong maayo nga wala ta mahibalo sa ubang butang. Ang paghisgot niini nga mga punto magpalig-on sa atong pagsalig nga si Jehova, ang “Usa nga hingpit sa kahibalo,” motagana gyod sa impormasyon nga atong gikinahanglan.—Job 37:16.

WALA TA MAHIBALO KON KANUS-A MOABOT ANG KATAPOSAN

4. Base sa Mateo 24:36, unsa ang usa ka butang nga wala nato mahibaloi?

⁴ Basaha ang Mateo 24:36. Wala ta mahibalo kon kanus-a moabot ang kataposan niini nga sistema sa mga butang. Gani, niadtong dinhi pa si Jesus sa yuta, wala pod siya mahibalo kon unsang “adlawa ug orasa” kana mahitabo.a Gisultihan ni Jesus ang iyang mga tinun-an nga si Jehova lang ang “may katungod [o, awtoridad] sa pagtakda” kon kanus-a ipahinabo ang pipila ka butang. (Buh. 1:6, 7) Nakadesisyon na si Jehova kon kanus-a niya taposon kini nga sistema, pero dili kinahanglang mahibaloan nato kon kanus-a gyod ni eksaktong mahitabo.

5. Tungod kay wala ta mahibalo kon kanus-a moabot ang kataposan, unsay posible natong bation o hunahunaon?

⁵ Base sa giingon ni Jesus, wala ta mahibalo kon unsa ka dugay pa tang maghulat ayha moabot ang kataposan. Tungod niana, basin maluya ta o kapoyon na sa paghulat, ilabina kon taudtaod na tang nagpaabot sa adlaw ni Jehova. O basin malisdan ta sa paglahutay sa mga pagbiaybiay gikan sa pamilya o sa uban. (2 Ped. 3:3, 4) Posible pod nga maghunahuna ta nga kon nahibalo pa lang unta ta kon kanus-a moabot ang kataposan, mas makapadayon ta sa pagpaabot ug mas makalahutay sa mga pagbiaybiay.

6. Nganong mas maayo nga wala ta mahibalo kon kanus-a moabot ang kataposan?

⁶ Sa tinuod lang, pinaagi sa dili pagpahibalo kanato kon kanus-a moabot ang kataposan, si Jehova naghatag natog kahigayonan nga ipakita nga nag-alagad ta niya kay gimahal nato siya ug misalig ta niya. Wala ta mag-alagad kang Jehova tungod lang kay naa tay deadline nga giapas, nga sama bag ang atong pagtuo kaniya naay expiration date. Imbes magsigeg hunahuna kon kanus-a moabot ang “adlaw ni Jehova,” mas maayong magpokus ta sa mga panalangin nga atong maeksperyensiyahan human niana. Kon ato ning himoon, mas molig-on ang atong relasyon sa Diyos ug ang atong determinasyon nga mapalipay siya.—2 Ped. 3:11, 12.

7. Unsay atong nahibaloan?

⁷ Mas maayong magpokus ta sa atong nahibaloan—nga ang kataposang mga adlaw nagsugod niadtong 1914. Sa Bibliya, si Jehova naghatag ug mga tagna nga nagpamatuod nga ang kataposang mga adlaw nagsugod niadtong 1914. Naghatag pod nig mga detalye kon unsay kahimtang sa yuta sugod niadtong tuiga. Tungod niana, kombinsido gyod ta nga “ang dakong adlaw ni Jehova duol na.” (Sof. 1:14) Nahibalo pod ta sa buluhaton nga gustong ipabuhat ni Jehova nato, ang pagsangyaw sa “maayong balita sa Gingharian” ngadto sa mas daghang tawo kutob sa mahimo. (Mat. 24:14) Kini nga mensahe gisangyaw na diha sa mga 240 ka nasod ug kayutaan sa kapig 1,000 ka pinulongan. Dili kinahanglan nga mahibalo ta kon unsang “adlawa ug orasa” mahitabo ang kataposan aron lang mahimo tang aktibo niining importante nga buluhaton.

WALA TA MAHIBALO KON UNSA GYOY PAGAHIMOON NI JEHOVA

8. Unsay gipasabot sa “mga buhat sa matuod nga Diyos”? (Ecclesiastes 11:5)

⁸ Dili nato bug-os masabtan ang “mga buhat sa matuod nga Diyos.” (Basaha ang Ecclesiastes 11:5.) Kini nga mga buhat nagtumong sa mga butang nga ipahinabo ni Jehova o tugotan niyang mahitabo aron matuman ang iyang kabubut-on. Wala ta mahibalo kon ngano tingaling tugotan ni Jehova nga mahitabo ang usa ka butang o kon unsa gyoy iyang buhaton sa pagtabang nato. (Sal. 37:5) Sama nga dili nato bug-os masabtan kon sa unsang paagi maporma ang bata diha sa tagoangkan sa iyang inahan, nga bisan ang mga scientist wala pod bug-os makasabot, dili pod nato bug-os masabtan ang “mga buhat sa matuod nga Diyos.”

9. Kay wala ta mahibalo kon unsa gyoy pagahimoon ni Jehova, unsay posible natong bation ug hunahunaon?

⁹ Kay wala ta mahibalo kon unsa gyoy buhaton ni Jehova sa pagtabang nato, basin magduhaduha ta sa paghimog mga desisyon. Basin dili ta ganahang mohimog mga sakripisyo aron mapalapad ang atong ministeryo, sama sa pagpasimple sa atong kinabuhi o pagbalhin sa lugar diin mas nagkinahanglan ug dugang nga mga magsasangyaw. O basin maghunahuna ta nga wala na ta uyoni sa Diyos kay wala nato makab-ot ang atong mga tumong, wala tay makita nga talagsaong mga resulta sa atong paningkamot diha sa ministeryo, o daghag kalisdanan ang proyekto nga atong giboluntaryohan.

10. Unsang importanteng mga hiyas ang puwede natong maugmad tungod kay wala ta mahibalo kon unsa gyoy pagahimoon ni Jehova?

¹⁰ Kay wala ta mahibalo kon unsa gyoy himoon ni Jehova, mas makaugmad tag importanteng mga hiyas sama sa pagkamapainubsanon ug pagkamakasaranganon. Makatabang ni nato nga masabtan nga mas labaw gyod ang panghunahuna ug pamaagi ni Jehova kon itandi sa atoa. (Isa. 55:8, 9) Makatabang pod ni nato nga mas bug-os pang mosalig kang Jehova aron molampos ta. Kon maayog resulta ang atong ministeryo o pagboluntaryo, haom lang nga ihatag nato ang kadayeganan kang Jehova. (Sal. 127:1; 1 Cor. 3:7) Bisag dili mahitabo ang tanan natong gidahom, angay natong hinumdoman nga kontrolado gihapon ni Jehova ang tanan. (Isa. 26:12) Himoon lang nato ang atong maarangan, ug si Jehova nay bahala nato. Bisag dili ta makadahom nga giyahan ta ni Jehova sa milagrosong paagi sama sa iyang gihimo sa iyang mga alagad kaniadto, makasalig ta nga iya gyong itagana ang direksiyon nga atong gikinahanglan.—Buh. 16:6-10.

11. Unsay atong nahibaloan?

¹¹ Nahibalo ta nga si Jehova mahigugmaon kaayo, kanunayng mobuhat kon unsay husto, ug maalamon. Nahibalo pod ta nga gipabilhan niya pag-ayo ang tanan natong ginahimo para niya ug sa mga igsoon. Ug nasayod ta nga gantihan gyod ni Jehova kadtong maunongon kaniya.—Heb. 11:6.

WALA TA MAHIBALO KON UNSAY MAHITABO SA SUNOD NGA MGA ADLAW

12. Base sa Santiago 4:13, 14, unsay wala nato mahibaloi?

¹² Basaha ang Santiago 4:13, 14. Sa tinuod lang, wala gyod ta mahibalo kon unsay mahitabo nato ugma o sa sunod nga mga adlaw. Niini nga sistema, “ang panahon ug ang wala damhang panghitabo” puwedeng modangat kanato. (Eccl. 9:11) Tungod ana, dili ta makaseguro kon molampos ba ang atong mga plano, o kaha kon buhi pa ba ta aron maimplementar ang atong mga plano ug makita ang kalamposan niini.

13. Tungod kay wala ta mahibalo kon unsay mahitabo sa sunod nga mga adlaw, unsay posible natong bation?

¹³ Kay wala ta mahibalo kon unsay mahitabo nato sa sunod nga mga adlaw, basin malisdan ta sa paglahutay. Ngano? Mabalaka tingali ta sa kon unsay posibleng mahitabo, ug makawala na sa atong kalipay. Maguol ug masakitan ta pag-ayo tungod sa kalit nga mga trahedya ug wala damhang panghitabo. Masakitan ug maluya pod ta kon ang atong mga gidahom dili matuman.—Prov. 13:12.

14. Unsay angay natong buhaton aron magmalipayon ta hangtod sa hangtod? (Tan-awa sab ang mga hulagway.)

¹⁴ Kon molahutay ta bisan sa mga kalisdanan, mapamatud-an nato nga bisag unsa pa may mahitabo, kita nag-alagad sa atong langitnong Amahan tungod sa gugma, dili tungod sa hakog nga motibo. Gipakita sa mga rekord sa Bibliya nga dili ta angayng magdahom nga proteksiyonan ta ni Jehova sa tanang kalisdanan, ug wala pod niya gitakda daan ang mga panghitabo sa atong kinabuhi. Nahibalo siya nga puwede tang magmalipayon bisag wala ta mahibalo sa tanang mahitabo kanato sa umaabot. Ang atong kalipay nagdepende sa atong pagpangayog giya kang Jehova ug pagsunod niya. (Jer. 10:23) Kon magpagiya ta niya dihang mohimog mga desisyon, sama rag miingon ta: “Kon kabubut-on ni Jehova, padayon ming mabuhi ug himoon namo kini o kana.”—Sant. 4:15.

15. Unsay atong nahibaloan bahin sa umaabot?

¹⁵ Wala ta mahibalo kon unsa gyoy mahitabo nato sa matag adlaw nga molabay, pero nahibalo ta nga si Jehova nagsaad nato ug kinabuhing walay kataposan—didto man sa langit o dinhi sa yuta. Nahibalo pod ta nga dili siya mamakak, ug walay makapugong niya sa pagtuman sa tanan niyang saad. (Tito 1:2) Siya lang ang puwedeng moingon: “Gitagna na nako ang mahitabo, ug sa dugay nang panahon gitagna na nako ang mga butang nga wala pa mahimo.” Daghan sa iyang mga tagna natuman na kaniadto, ug ang nahibilin pang mga tagna seguradong matuman sa umaabot. (Isa. 46:10) Nahibalo pod ta nga wala gyoy makapugong kang Jehova sa paghigugma kanato. (Roma 8:35-39) Iyang ihatag ang kaalam, paghupay, ug kusog nga atong gikinahanglan aron malahutay nato ang mga problema. Seguradong tabangan ug panalanginan gyod ta ni Jehova.—Jer. 17:7, 8.

DILI NATO BUG-OS MASABTAN KON UNSA KA LALOM ANG PAGKAILA NI JEHOVA KANATO

16. Base sa Salmo 139:1-6, unsay nahibaloan ni Jehova nga dili gyod nato bug-os masabtan?

¹⁶ Basaha ang Salmo 139:1-6. Ang atong Maglalalang nahibalo pag-ayo sa atong pagkaumol ug kon unsay mga nakaimpluwensiya sa atong panghunahuna ug pagbati. Interesado kaayo siya nato. Nahibalo siya kon unsay atong gisulti ug kon unsay atong buot ipasabot, kon unsay atong gihimo ug kon nganong ato nang gihimo. Sama sa giingon ni Haring David, si Jehova kanunayng nagtan-aw ug nag-atiman nato, ug andam siyang motabang nato. Dili ba ka matandog nga ang Soberanong Ginoo sa uniberso, ang Maglalalang sa langit ug yuta, ingon ana ka interesado nimo? Gani, si David miingon: “Ang maong kahibalo makapahingangha kaayo kanako. Dili nako kini matugkad.”—Sal. 139:6, footnote.

17. Nganong malisdan tingali ta sa pagdawat nga si Jehova nakaila pag-ayo nato?

¹⁷ Tingali tungod sa atong gidak-an nga pamilya, kultura, o tinuohan kaniadto, basin malisdan ta sa pagdawat nga si Jehova mahigugmaon kaayo nga Amahan ug interesado siya kanato. O sama kang David, basin mobati ta usahay nga imposibleng makigsuod si Jehova kanato tungod sa seryosong mga sala nga atong nahimo kaniadto. (Sal. 38:18, 21) Posible pod nga ang usa nga sinserong naningkamot nga magbag-o ug mosunod sa matarong nga mga sukdanan sa Diyos makapangutana, ‘Kon nakasabot gyod ang Diyos nako, nganong magdahom man siya nga magbag-o ko nga ingon ani na man gyod ko?’

18. Sa unsang paagi ta makabenepisyo kon atong dawaton nga mas labaw ang pagkaila ni Jehova kanato kay sa atong pagkaila sa atong kaugalingon? (Tan-awa sab ang mga hulagway.)

¹⁸ Angay natong dawaton nga mas nakaila si Jehova kanato, ug nga nakita niya ang atong maayong mga hiyas nga wala tingali nato makita sa atong kaugalingon. Nakita pod niya ang atong mga kahuyangan ug kasaypanan, apil na ang mga hinungdan kon nganong ato nang nahimo. Nahibalo siya nga puwede tang magbag-o, ug mahigugmaon siyang nagtabang nato. (Roma 7:15) Kon atong hinumdoman nga si Jehova kanunayng nagtan-aw sa atong maayong mga hiyas ug potensiyal, mas mapalihok ta nga magmatinumanon ug magmalipayon sa atong pag-alagad kaniya.

19. Unsay atong nahibaloan pag-ayo bahin kang Jehova?

¹⁹ Nahibalo ta nga si Jehova mahigugmaon, ug segurado gyod ta ana. (1 Juan 4:8) Nahibalo ta nga ang iyang matarong nga mga sukdanan nagpakita sa iyang gugma nato, ug kanunay siyang naghunahuna sa atong kaayohan. Gusto ni Jehova nga mabuhi ta hangtod sa hangtod. Iyang gihatag ang lukat aron maposible kana. Ang lukat nagpasalig nato nga bisag dili ta hingpit, puwede natong mapalipay si Jehova. (Roma 7:24, 25) Ug nahibalo ta nga “ang Diyos mas labaw sa atong kasingkasing ug nahibalo sa tanang butang.” (1 Juan 3:19, 20) Nakaila gyod pag-ayo si Jehova nato, ug naa siyay pagsalig nga mahimo nato ang iyang kabubut-on.

20. Unsay makatabang aron dili ta sobrang mabalaka?

²⁰ Si Jehova naghatag nato sa tanang impormasyon nga atong gikinahanglan. Busa imbes sobrang mabalaka sa mga butang nga wala nato mahibaloi, mas maayong magpokus ta sa kon unsa gyoy importante. Pinaagi ana, atong gipakita ang atong bug-os nga pagsalig sa “Usa nga hingpit sa kahibalo,” si Jehova. (Job 36:4) Bisag naay mga butang nga wala nato mahibaloi karon, nasayod ta nga sa umaabot nga bag-ong kalibotan, padayon tang tudloan ni Jehova. Maong eksayted kaayo ta nianang panahona, kay kada adlaw naa gyod tay bag-ong makat-onan bahin sa atong Dakong Diyos, si Jehova.—Eccl. 3:11.