Ipakita ang Imong Pagtahod Ngadto sa Uban

1. Nganong malipay ta kon tahoron ta sa uban? (Proverbio 22:1)

MALIPAY ba ka kon tahoron ka sa uban? Siyempre. Normal lang nga gusto nato nga tahoron ta sa uban, kay mao na ang pagkalalang ni Jehova nato. Maong malipay gyod ta kon ato nang madawat. Gani ang Bibliya nag-ingon nga “ang pagtahod mas maayong mabatonan kay sa plata ug bulawan”!—Basaha ang Proverbio 22:1.

2-3. Nganong dili kanunayng sayon ang pagpakitag pagtahod sa uban, ug unsay atong hisgotan niini nga artikulo?

² Usahay malisdan tingali ta nga magpakitag pagtahod sa uban. Ngano? Kay dili malikayan nga makita nato ang ilang pagkadili-hingpit. Dugang pa, daghang tawo sa atong panahon karon ang walay pagtahod sa uban. Pero dili ta angayng mosundog nila. Ngano? Kay gusto ni Jehova nga atong pasidunggan, o tahoron, “ang tanang klase sa tawo.”—1 Ped. 2:17.

³ Niining artikuloha, atong hisgotan kon unsay buot ipasabot sa pagpakitag pagtahod ug kon sa unsang paagi mapakita nato ni ngadto sa (1) atong pamilya, (2) mga igsoon sa kongregasyon, ug (3) niadtong mga dili alagad ni Jehova. Hisgotan pod nato kon sa unsang paagi makapakita tag pagtahod bisan sa lisod nga mga kahimtang.

KON UNSAY BUOT IPASABOT SA PAGPAKITAG PAGTAHOD

4. Unsay kahulogan sa pagpakitag pagtahod?

⁴ Para nimo, unsa ang pagtahod? Sa ubang pinulongan, ang mga pulong “pagtahod” ug “pagpasidungog” maomao rag kahulogan. Pero ang tinuod, naa ni kalainan. Ang “pagtahod” nagtumong sa kon unsay atong panglantaw sa usa ka tawo. Kon gitahod nato ang uban, gilantaw nato sila ingong angayan sa atong atensiyon ug pagtagad, tingali tungod sa ilang mga hiyas, mga napalampos, o sa ilang taas nga posisyon. Pero ang “pagpasidungog” nagtumong sa kon unsay atong pagtratar sa usa ka tawo. Dihang pasidunggan nato ang uban, ato silang gitratar sa paagi nga mopabati nilang gipabilhan, giapresyar, ug gitahod. Siyempre, aron mahimong sinsero ang atong pagpakitag pasidungog, kinahanglang maggikan ni sa atong kasingkasing.—Mat. 15:8.

5. Unsay makatabang aron makapakita tag pagtahod sa uban?

⁵ Gusto ni Jehova nga tahoron nato ang uban, gani iya tang gisugo nga tahoron ang “labaw nga mga awtoridad.” (Roma 13:​1, 7) Pero naa tingali moingon, “Motahod man ko sa uban, basta angayan sila sa akong pagtahod.” Sakto ba na nga pangatarongan? Ingong mga alagad ni Jehova, nasabtan nato nga ang atong pagtahod sa mga tawo wala magdepende sa ilang binuhatan. Gitahod nato ang mga tawo tungod kay gimahal nato si Jehova ug gusto nato nga mapalipay siya.—Jos. 4:14; 1 Ped. 3:15.

6. Kaya ba natong magpakitag pagtahod niadtong wala magtahod nato? Ipatin-aw. (Tan-awa sab ang hulagway.)

⁶ Ang uban basin moingon, ‘Kaya ba gyod kaha nakong magpakitag pagtahod niadtong wala magtahod nako?’ Oo. Konsideraha ni nga mga pananglitan. Gipakaulawan ni Haring Saul ang iyang anak nga si Jonatan atubangan sa daghan. (1 Sam. 20:​30-34) Bisan pa ana, si Jonatan nagpakita gihapog pagtahod sa iyang amahan, ug padayon gihapon niyang gisuportahan ug gidepensahan ang iyang amahan hangtod sa ilang kamatayon. (Ex. 20:12; 2 Sam. 1:23) Ang hataas nga saserdote nga si Eli nag-akusar kang Ana pinaagi sa pag-ingon nga siya hubog. (1 Sam. 1:​12-14) Pero matinahoron gihapong nakig-estorya si Ana kang Eli, bisan pag ang tanan sa Israel nahibalo nga dili siya maayo nga amahan ug hataas nga saserdote. (1 Sam. 1:​15-18; 2:​22-24) Ug ang mga taga-Atenas nag-insulto kang apostol Pablo ug nagtawag niya nga “witwitan.” (Buh. 17:18) Pero si Pablo matinahorong nakig-estorya nila. (Buh. 17:22) Kini nga mga pananglitan nagpakita nga ang atong lawom nga gugma kang Jehova ug ang tinguha nga mapalipay siya maoy angay nga magpalihok nato nga tahoron ang uban, dili lang sa panahon nga sayon ning buhaton, kondili bisan sa lisod nga mga situwasyon. Karon, atong hisgotan kon kang kinsa ta angayng magpakitag pagtahod ug ngano.

IPAKITA ANG IMONG PAGTAHOD SA IMONG PAMILYA

7. Ngano tingaling malisdan ta sa pagpakitag pagtahod sa ubang membro sa atong pamilya?

⁷ Kon nganong lisod ning himoon. Kanunay natong makauban ang atong pamilya. Tungod ana, dali ra natong makita ang ilang maayong mga hiyas, apil na ang ilang mga kahuyangan. Ang uban tingali nila naay sakit o depresyon, ug lisod ang pag-atiman nila. Naa pod tingali mga membro sa pamilya nga sakit ug sinultihan, dili maayog tinagdan, ug walay pagtahod sa ilang mga minahal. Kini miresultag kagubot ug kasamok sa ilang panimalay. Sama sa artraytis nga makaapektar sa ubang bahin sa lawas, ang kawalay-pagtahod makaapektar sa panaghiusa sa pamilya. Pero dili sama sa artraytis nga dili nato bug-os matambalan, kaya natong magpakitag pagtahod aron dili madaot ang atong relasyon sa atong pamilya.

8. Nganong importante nga magpakita tag pagtahod sa atong pamilya? (1 Timoteo 5:​4, 8)

⁸ Kon nganong angay tang magpakitag pagtahod. (Basaha ang 1 Timoteo 5:​4, 8.) Sa iyang unang sulat kang Timoteo, gihisgotan ni Pablo nga angayng atimanon sa mga membro sa pamilya ang panginahanglan sa usag usa. Obligasyon nato ni, ug ang paghimo niini nagpakita nga gitahod nato ang matag usa. Pero si Pablo miingon nga ang pangunang rason nga ato ning himoon maoy dili lang tungod sa obligasyon, kondili tungod sa atong “debosyon sa Diyos.” Kini nagpakita nga gimahal nato si Jehova ug bahin ni sa atong pagsimba. Si Jehova ang Tagmugna sa kahikayan sa pamilya. (Efe. 3:​14, 15) Maong kon tahoron nato ang mga membro sa atong pamilya, nagpakita tag pagtahod kang Jehova. (Tan-awa ang mga study note sa 1 Timoteo 5:4.) Importante gyod ni nga rason kon nganong angay tang magpakitag pagtahod sa atong pamilya.

9. Sa unsang paagi ang bana ug asawa makapakitag pagtahod sa usag usa? (Tan-awa sab ang mga hulagway.)

⁹ Kon unsaon pagpakitag pagtahod. Ang bana angayng magpasidungog sa iyang asawa, naa man silay kauban o dihang silasila ra. Iya nang mahimo pinaagi sa pagpabati sa iyang asawa nga iya siyang gimahal. (Prov. 31:28; 1 Ped. 3:7) Dili gyod niya dagmalan o pakaulawan ang iyang asawa. Dili pod niya ipabati sa iyang asawa nga wala siyay pulos. Si Ariel,a nga nagpuyo sa Argentina, miingon: “Tungod sa sakit sa akong asawa, usahay naa siyay masulti nga makapasakit nako. Kon mahitabo na, akong pahinumdoman ang akong kaugalingon nga dili niya tuyo nga pasakitan ko. Dayon akong hinumdoman ang 1 Corinto 13:​5, ug nakatabang ni nako nga makig-estorya niya sa matinahorong paagi imbes nga masuko.” (Prov. 19:11) Sa laing bahin, sa unsang paagi mapakita sa asawa ang iyang pagtahod sa iyang bana? Pinaagi sa pagsultig positibo bahin niya. (Efe. 5:33) Likayan niya ang pagpanginsulto, pagpanaway, ug pagsultig dili maayo nga mga komedya bahin sa iyang bana, kay nahibalo siya nga sama nig taya nga makapahuyang sa ilang kaminyoon. (Prov. 14:1) Ang usa ka sister sa Italy nga naay bana nga grabe ka mabalak-on miingon: “Usahay, mobati ko nga nasobrahan ra ang akong bana. Maong sa una, maklaro kaayo sa akong ginasulti ug ekspresyon sa nawong nga kulang kog pagtahod niya. Pero dihang kanunay kong nakig-uban sa mga tawo nga naay pagtahod sa uban, mas napalihok ko nga magpakitag pagtahod sa akong bana.”

10. Sa unsang paagi mapakita sa mga anak nga ilang gitahod ang ilang mga ginikanan?

¹⁰ Mga anak, sunda ang mga balaod nga gihatag sa inyong mga ginikanan. (Efe. 6:​1-3) Ipakita ang pagtahod dihang makig-estorya mo nila. (Ex. 21:17) Samtang mas magkaedaran ang inyong mga ginikanan, mas nagkinahanglan sila sa inyong panahon. Himoa ang inyong maarangan sa pag-atiman nila. Konsideraha ang pananglitan ni María, nga ang amahan dili Saksi ni Jehova. Si María ang nag-atiman sa iyang amahan dihang nasakit ni. Pero nalisdan si María kay dili maayog tinagdan niya ang iyang amahan. Siya miingon: “Akong giampo nga dili mawala ang akong pagtahod kang Papa ug nga tabangan ko nga mapakita nako ni. Nakapamalandong ko nga kay gusto ni Jehova nga tahoron nako ang akong mga ginikanan, segurado nga hatagan ko niyag kusog sa paghimo niana. Sa ngadtongadto, akong naamgohan nga dili nako kinahanglang hulaton nga magbag-o una si Papa ayha nako siya pakitaag pagtahod.” Kon atong tahoron ang atong pamilya bisan pa sa ilang mga kahuyangan, atong gipakita nga gitahod nato ang kahikayan ni Jehova.

IPAKITA ANG IMONG PAGTAHOD SA MGA IGSOON

11. Nganong malisdan ta usahay sa pagpakitag pagtahod sa mga igsoon?

¹¹ Kon nganong lisod ning himoon. Bisag ang mga igsoon nagkinabuhi sumala sa mga sukdanan sa Bibliya, usahay basin masaypan ta nilag sabot, o kaha naa silay mahimo nga makapasakit o makapalagot nato. Tungod niana, basin malisdan ta sa pagpakitag pagtahod nila. (Col. 3:13) Unsay makatabang nato?

12. Nganong importante nga magpakita tag pagtahod sa atong mga igsoon? (2 Pedro 2:​9-12)

¹² Kon nganong angay tang magpakitag pagtahod. (Basaha ang 2 Pedro 2:​9-12.) Sa iyang ikaduhang sulat, si Pedro miingon nga ang uban diha sa unang siglong kongregasyon nagsulti nga dili matinahoron sa “mga gipasidunggan sa Diyos,” nga mao ang mga ansiyano. Unsay reaksiyon sa matinumanong mga anghel nga nakakita niana? “Tungod sa ilang pagtahod kang Jehova,” wala silay gisulti nga bisan usa lang ka mapasipalahong pulong batok sa maong mga indibiduwal. Hunahunaa ra: Bisag hingpit ang mga anghel, wala sila mosultig dili maayo o manghukom sa maong dili matinahoron nga mga tawo. Hinuon, misalig ang mga anghel nga si Jehova ang mohukom ug modisiplina nila. (Roma 14:​10-12; itandi ang Judas 9.) Naa tay makat-onan sa mga anghel. Kon gipakitaan natog pagtahod ang mga naglutos nato, labaw na gyod nga angay natong pakitaag pagtahod ang atong mga igsoon. Angay nga “manguna” ta sa pagpasidungog kanila. (Roma 12:10) Ang paghimo niana nagpakita nga gitahod nato si Jehova.

13-14. Sa unsang paagi makapakita tag pagtahod sa mga igsoon? Paghatag ug mga pananglitan. (Tan-awa sab ang mga hulagway.)

¹³ Kon unsaon pagpakitag pagtahod. Mga ansiyano, paningkamoti nga ipakita ang gugma dihang makiglabot mo sa mga igsoon. (Filem. 8, 9) Kon kinahanglan ninyong tambagan ang usa ka igsoon, himoa kini sa mahigugmaong paagi ug dili sa panahon nga nasuko mo. Mga sister, dako pod mog matabang aron mamentinar ang pagtahod sulod sa kongregasyon. Mahimo ninyo ni pinaagi sa paglikay sa dili maayo nga mga tabi o pagbutangbutang. (Tito 2:​3-5) Kitang tanan makapakitag pagtahod sa mga ansiyano pinaagi sa pagpasakop sa ilang mga kahikayan ug pagpasalamat nila tungod sa ilang mga paghago, sama sa pagdumala sa mga tigom, pagpanguna sa buluhatong pagsangyaw, ug sa pagtabang niadtong nakahimog “sayop nga lakang.”—Gal. 6:1; 1 Tim. 5:17.

¹⁴ Ang sister nga si Rocío nalisdan sa pagtahod sa ansiyano nga naghatag niyag tambag. Siya miingon: “Gibati nako nga estrikto ra kaayo siya. Sa balay, magsulti kog dili maayo bahin niya. Wala ra ko magpahalata, pero sa tinuod lang nagduda ko sa iyang motibo sa paghatag nakog tambag, maong wala nako ni ipadapat.” Unsay nakatabang kang Rocío? Siya miingon: “Sa akong eskedyul sa pagbasa sa Bibliya, nabasahan nako ang 1 Tesalonica 5:​12, 13. Dihang naamgohan nako nga wala ko magpakitag pagtahod sa maong ansiyano, nakonsensiya ko. Nag-ampo ko kang Jehova ug nag-research sa atong mga publikasyon aron makakita kog impormasyon nga makatabang nako nga mabag-o ang akong tinamdan. Sa ngadtongadto, nakita nako nga dili ang brader ang problema, kondili ang akong garbo. Nasabtan na nako karon nga importante ang pagkamapainubsanon aron makapakita kog pagtahod sa uban. Naningkamot pa gihapon ko nga mouswag niining bahina, pero nahibalo ko nga nalipay si Jehova sa akong mga paningkamot.”

IPAKITA ANG IMONG PAGTAHOD SA MGA DILI ALAGAD NI JEHOVA

15. Ngano tingaling malisdan ta sa pagpakitag pagtahod niadtong mga dili alagad ni Jehova?

¹⁵ Kon nganong lisod ning himoon. Daghan sa mga tawo nga atong maestorya diha sa ministeryo ang dili interesadong maminaw bahin sa Diyos o sa Bibliya. (Efe. 4:18) Ang uban dili ganahang maminaw tungod kay lahi ang gitudlo sa ilaha sukad sa pagkabata. Kinahanglan pod tingali tang magpailob sa atong mga amo o magtutudlo nga estrikto kaayo ug sa mga katrabaho o schoolmate nga lisod ikasabot. Sa ngadtongadto, basin anam-anam na nga mawala ang atong pagtahod nila ug dili na ta maayog tinagdan nila.

16. Nganong importante nga magpakita tag pagtahod sa mga wala pa mag-alagad kang Jehova? (1 Pedro 2:12; 3:15)

¹⁶ Kon nganong angay tang magpakitag pagtahod. Hinumdomi nga si Jehova nagaobserbar kon unsay atong pagtratar sa mga dili magtutuo. Si apostol Pedro nagpahinumdom sa mga Kristohanon nga ang ilang maayong mga buhat posibleng makapalihok sa uban nga “himayaon ang Diyos.” Tungod ana, iya silang gidasig nga depensahan ang ilang pagtuo nga “may kalumo ug lawom nga pagtahod.” (Basaha ang 1 Pedro 2:12; 3:15.) Dihang depensahan nato ang atong pagtuo, diha man sa korte o panahon sa pagsangyaw, angay natong pakitaag pagtahod ang uban nga sama bag naa ta atubangan sa Diyos. Hinumdoman nato nga si Jehova nagatan-aw sa atong ginahimo ug nagapaminaw sa atong ginasulti sa uban. Busa angay lang gyod nga pakitaan natog pagtahod ang mga dili alagad ni Jehova.

17. Sa unsang paagi makapakita tag pagtahod sa mga dili alagad ni Jehova?

¹⁷ Kon unsaon pagpakitag pagtahod. Dihang magsangyaw ta, dili nato gusto nga ipabati sa mga tawo nga ato silang gipakaubos tungod kay gamay ra silag nahibaloan o wala silay nahibaloan sa Bibliya. Hinuon, gusto natong isipon nga bililhon sila sa Diyos ug nga mas labaw sila kay kanato. (Hag. 2:7; Filip. 2:3) Kon naay manginsulto nimo tungod sa imong tinuohan, pugngi ang imong kaugalingon nga mobalos, sama sa paggamit ug mga pulong nga morag lingaw rang paminawon pero sakit diay. (1 Ped. 2:23) Kon naa kay nasulti nga dili maayo, pangayo dayog pasaylo. Sa unsang paagi pod ka makapakitag pagtahod diha sa imong trabahoan? Paningkamoti nga mahimong kugihan nga trabahante ug magpakitag kaayo sa imong mga kauban sa trabaho ug sa imong amo. (Tito 2:​9, 10) Kon matinud-anon ka ug kugihan, basin mapalipay nimo ang uban. Pero kon ugaling dili man sila malipay, usa ka butang ang segurado—mapalipay nimo ang Diyos.—Col. 3:​22, 23.

18. Nganong dili gyod ta magmahay kon maningkamot ta sa pagpakitag pagtahod sa uban?

¹⁸ Daghan gyod tag rason kon nganong angay tang maningkamot sa pagpakitag pagtahod sa uban. Atong nakat-onan nga dihang magpakita tag pagtahod sa atong pamilya, gitahod nato ang atong Ulo sa pamilya, si Jehova. Sa samang paagi, kon tahoron nato ang atong mga igsoon, gitahod pod nato ang atong langitnong Amahan. Ug kon tahoron nato ang mga dili alagad ni Jehova, naghatag ta nilag kahigayonan nga himayaon, o pasidunggan, ang atong dakong Diyos. Ug bisan pag dili nila baslag pagtahod ang pagtahod nga atong gipakita nila, dili gihapon ta magmahay nga ato nang gihimo. Ngano? Kay panalanginan ta ni Jehova. Siya nagsaad: “Kadtong nagpasidungog kanako akong pasidunggan.”—1 Sam. 2:30.