Mga Pangutana Gikan sa mga Magbabasa
Ang magsusulat sa Proverbio 30:18, 19 nag-ingon nga “ang dalan sa lalaki dihang kauban niya ang dalaga” “katingalahan kaayo.” Unsay iyang gipasabot?
Daghan ang naglibog niining mga pulonga, apil na ang ubang mga eskolar. Ang kompletong teksto niini sa Bag-ong Kalibotang Hubad nag-ingon: “Naay tulo ka butang nga katingalahan kaayo para nako, ug upat nga dili nako masabtan: ang dalan sa agila diha sa kalangitan, ang dalan sa bitin diha sa bato, ang dalan sa barko diha sa lawod, ug ang dalan sa lalaki dihang kauban niya ang dalaga.”—Prov. 30:18, 19.
Kaniadto, nagtuo ta nga ang mga pulong nga “ang dalan sa lalaki dihang kauban niya ang dalaga” negatibo ug kahulogan. Ngano? Tungod kay ang konteksto naghisgot ug negatibong mga butang nga dili gyod moingon ug “igo na.” (Prov. 30:15, 16) Ug ang bersikulo 20 naghisgot bahin sa “babayeng mananapaw” nga miingon nga wala siyay nahimong daotan. Busa atong gisabot nga sama sa naglupad nga agila, bitin diha sa bato, o karaang barko diha sa lawod, ang lalaki basin sekretong mohimog usa ka butang ug walay mahibalo niana. Base niana nga pagsabot, nagtuo ta nga ang mga pulong nga “ang dalan sa lalaki dihang kauban niya ang dalaga” nagtumong sa daotang buhat—nga mao, basin tentalon sa daotang lalaki ang inosente ug dali rang motuo nga dalaga sa pagpakigsekso niya.
Pero naay maayong mga rason nga makaingon ta nga posibleng positibo ang gipasabot niini. Ang magsusulat igo lang nagsulti sa mga butang nga nakapahingangha niya.
Gisuportahan sa orihinal nga Hebreohanong mga manuskrito kini nga ideya. Sumala sa Theological Lexicon of the Old Testament, ang Hebreohanong pulong nga gihubad ug “katingalahan kaayo” sa Proverbio 30:18 “nagpakita nga ang usa . . . nahingangha, dili makatuo, ug mibilib pa gani pag-ayo sa iyang nakita.”
Si Crawford H. Toy, usa ka propesor sa Harvard University sa United States, miuyon pod nga dili negatibo ang gipasabot niini nga bersikulo. Siya miingon: “Ang punto niini mao nga makapahingangha kaayo ang mga butang nga nahisgotan.”
Busa makaingon ta nga ang Proverbio 30:18, 19 naghisgot ug mga butang nga nindot ug katingalahan pa gani kaayo. Sama sa gibati sa magsusulat niini nga teksto, mahingangha kaayo ta sa agila nga kayang molupad ug taas kaayo, sa bitin nga paspas makakamang sa mga bato bisag walay tiil, sa bug-at nga barko nga kayang makabiyahe sa dagat, ug sa batan-ong lalaki ug babaye nga magkagustohay ug sa ngadtongadto mag-uban na nga malipayon.