1925—Usa ka Gatos ka Tuig Kanhi

MGA GIDAHOM NGA WALA MAHITABO

Niadtong 1925, daghang Estudyante sa Bibliya ang nagdahom nga mapasig-uli na ang Paraisong yuta. Ngano? Si Brader Albert Schroeder, nga sa ulahi nag-alagad ingong membro sa Nagamandong Lawas, miingon: “Ang mga Kristohanon nagtuo nga niadtong tuiga, ang mga nahibilin sa dinihogang mga sumusunod sa Kristo moadto na sa langit ug mahimong bahin sa Gingharian ug nga ang matinumanong mga alagad kaniadto sama kang Abraham, David, ug uban pa, banhawon ingong mga prinsipe aron mopuli sa gobyerno dinhi sa yuta ingong bahin sa gingharian sa Diyos.” Samtang milabay ang daghang bulan ug wala gihapon mahitabo ang ilang gidahom, siyempre ang uban nila naguol.—Prov. 13:12.

Pero bisag wala mahitabo ang ilang mga gidahom, kadaghanan sa mga Estudyante sa Bibliya padayong nagkugi sa buluhatong pagsangyaw, ug anam-anam nilang nasabtan nga responsibilidad nila ang pagsangyaw bahin kang Jehova. Pananglitan, konsideraha kon unsay ilang gihimo aron makaabot ang kamatuoran sa lagyong mga lugar.

DUGANG NGA MGA ESTASYON SA RADYO

Daghang tawo ang naminaw sa WBBR nga estasyon sa radyo sa miaging tuig. Tungod ana, pagka-1925, ang mga Estudyante sa Bibliya nagtukod ug lain pang estasyon duol sa Chicago, Illinois. Kining bag-o nga estasyon gitawag nga WORD. Si Ralph Leffler, usa ka radio engineer nga mitabang sa pagtukod sa estasyon, miingon, “Ang WORD nakaabot bisan sa lagyong mga lugar, ug daghang tawo ang naminaw niini ilabina panahon sa tugnaw nga kagabhion.” Pananglitan, usa ka pamilya nga nagpuyo sa Pilot Station sa Alaska, nga kapig 5,000 ka kilometro (3,000 ka milya) ang gilay-on gikan sa Chicago, ang nakadungog sa usa sa mga programa niini sa bag-o pa ni nagsugod. Ilang gisulatan ang mga nagtrabaho sa estasyon aron pasalamatan sila tungod sa makapalig-on nga espirituwal nga programa.

Bahin sa kalayo sa maabot niini nga estasyon, ang Disyembre 1, 1925 nga The Watch Tower miingon: “Ang WORD ang usa sa mga estasyon sa United States nga layo kaayog abot, nga nagsibya sa gikusgon nga 5,000 watts. Klaro ning madungog sa mga tawo nga nagpuyo sa tibuok United States, sa Cuba, ug sa pinakatumoy nga bahin sa norte sa Alaska. Pinaagi niini nga estasyon, daghang tawo ang nakadungog sa kamatuoran sa unang higayon ug nahimong interesado.”

Niadto pong panahona, ang mga Estudyante sa Bibliya naningkamot nga mas masangyaw pa ang maayong balita didto sa Canada pinaagig radyo. Niadtong 1924, ilang gitukod ang CHUC sa Saskatoon, Saskatchewan. Usa ni sa unang mga estasyon sa Canada nga nagsibya ug relihiyosong mga programa. Pagka-1925, ang ilang gamay nga studio kinahanglang ibalhin ngadto sa mas dako nga lugar. Maong gihatag sa mga igsoon ngadto sa Watch Tower Society ang pagpanag-iya niini ug gibalhin ang studio niini ngadto sa Regent Building, usa ka karaang teatro sa Saskatoon nga ilang gipalit ug gi-renovate para niini.

Tungod niini nga estasyon, daghang mga tawo nga namuyo sa mga lungsod ug baryo sa Saskatchewan ang nakadungog sa maayong balita sa unang higayon. Ang usa nila mao si Mrs. Graham nga nagpuyo sa layo kaayong lungsod. Human siya makadungog sa programa, siya misulat ug mihangyo nga padad-an siyag mga literatura sa Bibliya. Si Brader George Naish nahinumdom nga morag dinalian kaayo ang hangyo sa maong babaye, mao nga gipadad-an nila siya ug kompletong volume sa Studies in the Scriptures. Wala madugay, si Mrs. Graham nagsangyaw na sa mensahe sa Gingharian bisan ngadto sa layo kaayong mga lugar.

GIPATIN-AW ANG USA KA IMPORTANTENG KAMATUORAN

Ang Marso 1, 1925 nga The Watch Tower dunay importante kaayo nga artikulo nga nag-ulohang “Birth of the Nation.” Taudtaod nang nasabtan sa mga Estudyante sa Bibliya nga si Satanas dunay organisasyon nga gilangkoban sa mga demonyo didto sa langit ug sa relihiyoso, komersiyal, ug politikal nga mga sistema dinhi sa yuta. Pero pinaagi niini nga artikulo, “ang matinumanon ug maalamong ulipon” nagtabang sa mga igsoon nga masabtan nga si Jehova naa poy organisasyon. (Mat. 24:45) Kini nga organisasyon gilangkoban sa mga alagad ni Jehova sa langit ug sa yuta nga nagkahiusa sa pagbuhat sa iyang kabubut-on, ug dili gyod ni bahin sa kalibotan ni Satanas. Gipatin-aw pod sa matinumanong ulipon nga ang Gingharian sa Diyos natukod niadtong 1914 ug nga nianang tuiga, naay ‘gubat nga miulbo sa langit.’ Tungod ana, si Satanas ug iyang mga demonyo gitambog gikan sa langit ug naa na karon sa yuta.—Pin. 12:​7-9.

Ang uban nalisdan sa pagdawat niini nga katin-awan. Bahin niini, ang artikulo miingon: “Kon naay mga magbabasa sa Watch Tower nga dili uyon sa giingon dinhi, mas maayo nga maghulat sila nga mapailobon sa Ginoo ug padayong mag-alagad kaniya nga matinumanon.”

Pero si Tom Eyre, usa ka colporteur (nga nailhan karon ingong payunir) gikan sa Britain, misulti kon unsay gibati sa kadaghanang Estudyante sa Bibliya bahin niana nga artikulo. Siya miingon: “Nalipay kaayo ang mga igsoon niini nga eksplinasyon bahin sa Pinadayag 12. Dihang nasabtan namo nga ang Gingharian natukod na sa langit, eksayted kaayo mi nga isangyaw kini nga maayong balita ngadto sa uban. Nakapadasig to namo nga mas magkugi pa sa pagsangyaw ug nakatabang namo nga makita kon unsa pang talagsaong mga butang ang himoon ni Jehova sa umaabot.”

PAGPAMATUOD BAHIN KANG JEHOVA

Karon, ang mga Saksi ni Jehova pamilyar na kaayo sa mga pulong sa Isaias 43:10: “‘Kamo ang akong mga saksi,’ miingon si Jehova, ‘Oo, ang akong alagad nga akong gipili.’” Pero kaniadto, kini nga teksto talagsa rang mahisgotan sa atong mga publikasyon. Nausab na niadtong 1925, kay nianang tuiga, 11 ka isyu sa The Watch Tower ang naghisgot bahin sa Isaias 43:10 ug 12.

Sa kataposang bahin sa Agosto 1925, ang mga Estudyante sa Bibliya nagpahigayon ug kombensiyon sa Indianapolis, Indiana. Si Brader Joseph F. Rutherford naay mensahe para sa mga delegado, nga giimprenta diha sa program sa kombensiyon. Kini nag-ingon: “Motambong ta niini nga kombensiyon aron . . . mapalig-on sa Ginoo ug mamauli nga madasigon kaayo ingong iyang mga saksi.” Sa tibuok walo ka adlaw nga kombensiyon, ang mga nanambong gidasig nga magpamatuod bahin kang Jehova sa matag kahigayonan.

Pagka-Sabado, Agosto 29, si Brader Rutherford naghatag ug pakigpulong nga nag-ulohang “A Call to Action,” diin iyang gipasiugda kon unsa ka importante ang pagsangyaw. Siya miingon: “Gisultihan ni Jehova ang iyang katawhan . . . : ‘Kamo ang akong mga saksi . . . ug ako ang Diyos.’ Dayon si Jehova naghatag nilag klarong sugo: ‘Pagpatindog ug ilhanan alang sa mga katawhan.’ Walay lain dinhi sa yuta nga makapatindog ug ilhanan alang sa mga tawo gawas [sa iyang katawhan], kinsa nakabaton sa espiritu sa Ginoo kay sila iyang mga saksi.”—Isa. 43:12; 62:10.

Human sa pakigpulong ni Brader Rutherford, ang tanang nanambong miuyon sa resolusyon nga nag-ulohang “Message of Hope,” nga nagpasiugda nga ang Gingharian sa Diyos lang ang tinuod nga makahatag natog “mga panalangin sa kalinaw, maayong kinabuhi, maayong panglawas, kagawasan, ug kalipay hangtod sa hangtod.” Sa ulahi, kini nga resolusyon gihubad ngadto sa daghang pinulongan ug giimprenta ingong tract. Mga 40 ka milyong kopya niini ang napanagtag.

Sa misunod nga pipila ka tuig, wala pa dayon gamita sa mga Estudyante sa Bibliya ang ngalang Saksi ni Jehova. Pero mas nasabtan na nila ang ilang responsibilidad nga magsangyaw bahin kang Jehova.

PAGBALIKDUAW SA MGA INTERESADO

Samtang nagkadaghan ang mga Estudyante sa Bibliya sa tibuok kalibotan, mas gidasig sila nga balikan kadtong mga nagpakitag interes sa maayong balita. Human sa kampanya sa pagpanagtag sa tract nga Message of Hope, ang Bulletina miingon: “Baliki ang mga balay nga nabinlan ug kopya sa Message of Hope, bisag wala sila mabinli ug ubang literatura.”

Ang Enero 1925 nga isyu sa Bulletin naay report gikan sa usa ka Estudyante sa Bibliya sa Plano, Texas. Kini nag-ingon: “Nasorpresa mi nga daghan gihapog interesado sa mga teritoryo nga kapila na namo nasangyawan kon itandi sa bag-ong mga teritoryo. Naay gamayng lungsod sa among teritoryo nga kalima na namo naadtoan sulod sa 10 ka tuig. . . . Pero dili pa dugay, mibalik didto si Sister Hendrix ug ang akong inahan, ug mas daghang libro ang ilang napanagtag kay sukad masukad.”

Ug sa nasod sa Panama, usa ka colporteur misulat: “Daghan niadtong wala modawat sa mensahe sa una nakong pagbisita ang naminaw na dihang mibalik ko sa ikaduha o ikatulong higayon. Niining tuiga, mas nagpokus ko sa pagbalikduaw niadtong akong mga nasangyawan sa miagi, ug naa koy pipila ka makapalipay nga mga eksperyensiya sa pagbalikduaw nila.”

EKSAYTED SA MGA MAHITABO SA MOSUNOD NGA TUIG

Sa iyang tinuig nga sulat para sa tanang colporteur, gisumaryo ni Brader Rutherford ang mga napalampos nianang tuiga ug gihisgotan ang mga buluhaton sa mosunod nga tuig. Siya miingon: “Niining tuiga, nakapribilehiyo mo sa paghupay niadtong mga masulub-on, ug kini nakahatag ninyog kalipay . . . Ang mosunod nga tuig maghatag ninyog daghang kahigayonan sa pagpamatuod bahin sa Diyos ug sa iyang gingharian ug sa pagpatindog ug ilhanan alang sa mga tawo. . . . Hinaot padayon natong ipatugbaw ang atong tingog ug mag-awit ug mga pagdayeg sa atong Diyos ug Hari.”

Sa hinapos sa tuig 1925, ang mga brader nagsugod nag plano sa pagtukod ug dugang nga mga pasilidad sa Brooklyn. Ang sunod tuig, ang 1926, mao ang sinugdanan sa usa sa pinakadako nga proyekto sa pagpanukod nga gihimo sa atong organisasyon.