Angay na ba Kong Mohunong sa Pagdrayb?

DUGAY na kaayo kang nagadrayb. Ganahan kaayo ka kay makaadto ka bisan asa nga dili ra mag-agad sa uban kay naa kay sakyanan. Pero karon, gusto sa imong pamilya ug mga higala nga hunahunaon nimo kon angay pa ba kang magdrayb. Nabalaka sila nimo, pero wala ka kasabot kon ngano.

Ingon ana ba ang imong kahimtang karon? Kon mao, unsay makatabang nimo sa pagdesisyon kon angay pa ba kang magdrayb?

Sa ubang nasod, ang mga drayber nga senior citizen kinahanglan unang mokuhag medical certificate gikan sa doktor aron ma-renew ang ilang lisensiya. Ang mga Kristohanon nga nagpuyo niini nga mga nasod angayng mosunod sa mga balaod nga gipatuman sa gobyerno. (Roma 13:1) Pero bisan asa pa ka nagpuyo, naay mga paagi aron masusi nimo kon OK pa ba ang imong drinayban.

SUSIHA ANG IMONG PAAGI SA PAGDRAYB

Base sa website nga National Institute on Aging (NIA) sa United States, puwede nimong pangutan-on ang imong kaugalingon:

Maglisod na ba kog basa sa mga karatula o road sign, o dili na ba kaayo ko makakita inigkagabii?
Dili na ba kaayo nako maliso ang akong ulo aron i-check ang side mirror, rearview mirror, ug blind spot?
Maglisod na ba kog lihok sa akong mga kamot ug tiil, sama anang pagtamak dayon sa brake?
Hinay na ba kaayo kong mopadagan, nga ako na hinuoy hinungdan sa trapik?
Kapila na ba kong hapit maaksidente, o naa bay lumping o garas ang akong sakyanan kay nakabangga kog poste o ubang butang diha sa karsada?
Gisita na ba kog polis tungod sa akong paagi sa pagdrayb?
Nakasulay ba ko nga nakatulog samtang nagdrayb?
Naa ba koy ginatomar nga tambal nga puwedeng makaapektar sa akong pagdrayb?
Nabalaka na ba ang akong pamilya o mga higala bahin sa akong pagdrayb?

Kon oo ang imong tubag sa usa o duha niini nga mga pangutana, basin kinahanglan kang mohimog mga kausaban. Pananglitan, puwede kang modesisyon nga menosan ang imong pagdrayb ilabina kon gabii. Regular nga susiha ang imong paagi sa pagdrayb. Puwede nimong pangutan-on ang imong pamilya o mga higala kon unsay ilang ikasulti bahin sa imong drinayban. Basin puwede pa gani kang mokuhag driving lesson aron mahimong mas luwas ang imong pagdrayb. Pero kon nakita nimo nga oo ang imong tubag sa daghang mga pangutana sa ibabaw, basin mas maayo nga mohunong na ka sa pagdrayb.a

MAGPAGIYA SA MGA PRINSIPYO SA BIBLIYA

Tingali para nimo, maayo gihapon ka nga drayber, ug dili tingali ka ganahang maghunahuna nga mohunong na ka sa pagdrayb. Busa unsang mga prinsipyo sa Bibliya ang makatabang nimo nga makabatog balanseng panghunahuna bahin sa imong situwasyon ug makahimog maalamong desisyon? Konsideraha ang duha ka prinsipyo.

Magmapainubsanon. (Prov. 11:2) Samtang magkaedaran ta, anam-anam nga mohanap ang atong panan-aw, dili na kaayo ta kadungog, magkaluya ang atong lawas, ug dili na kaayo ta abtik molihok. Pananglitan, kasagaran sa mga tawo mohunong na sa pagdulag sports kon magkaedaran na kay nahibalo sila nga dali na lang silang ma-injure. Ingon ana pod kon bahin sa pagdrayb. Moabot gyod ang panahon nga angayng dawaton sa usa nga kinahanglan na siyang mohunong sa pagdrayb para sa iyang kaayohan. (Prov. 22:3) Mapainubsanon pod siyang maminaw kon ang uban mosulti sa ilang mga kabalaka bahin sa iyang pagdrayb.—Itandi ang 2 Samuel 21:15-17.

Likayi nga mahimong sad-an sa dugo. (Deut. 22:8) Delikado kaayo kon ang usa dili mag-amping sa pagdrayb kay puwedeng mameligro ang iyang kinabuhi ug ang kinabuhi sa uban. Kon ang usa padayong magdrayb bisag dili na siya maayo nga drayber, posible siyang makadisgrasya. Ug kon naay mamatay niana nga aksidente, basin mahimo pa gyod siyang sad-an sa dugo.

Kon naglisod kag desisyon kon angay na ba kang mohunong sa pagdrayb, ayawg hunahunaa nga makapaubos ni sa imong dignidad o pagkatawo. Gimahal ka ni Jehova tungod sa imong nindot nga mga hiyas, apil na sa imong pagkamapainubsanon ug paghunahuna sa kaayohan sa uban. Ug siya nagsaad nga iya kang tabangan ug hupayon. (Isa. 46:4) Dili gyod ka niya biyaan. Maong hangyoa siya nga tabangan ka nga magamit ang imong kaalam sa praktikal nga paagi ug mapadapat ang mga prinsipyo sa Bibliya aron makadesisyon ka kon angay na ba kang mohunong sa pagdrayb.

Kon sa Unsang Paagi Makatabang ang Uban

Sagad, ang mga membro sa pamilya ang mas angayng makig-estorya sa mga edaran bahin sa ilang pagdrayb. Pero puwede pong makatabang ang mga higala. Kon kapamilya ka o higala sa usa ka edaran ug nadungog nimo gikan sa uban nga nabalaka sila sa iyang pagdrayb, ayawg balewalaa ang ilang giingon. Puwede pa gani kang mosakay sa iyang sakyanan kon magdrayb siya, aron maobserbahan nimo ang iyang paagi sa pagdrayb. Kon gikinahanglan, estoryaha siya bahin sa iyang drinayban. Pero kon makig-estorya ka, ibutang ang imong kaugalingon sa iyang kahimtang. Sulti sa buotan pero matinud-anon nga paagi. Ayawg kabalaka nga edaran na siya, kay ang imong tuyo mao nga estoryahon siya bahin sa iyang paagi sa pagdrayb. Piliag maayo ang mga pulong nga imong isulti. Pananglitan, imbes moingon nga “Delikado na ang imong drinayban,” puwede kang moingon “Nabalaka ko sa imong safety.” Ayaw pod siyag presyura. Hinuon, sultihi siya nga naa kay pagsalig nga andam siyang mosunod sa mga prinsipyo sa Bibliya nga gihisgotan niini nga artikulo.

Angay pod natong sabton ang gibati sa mga edaran nga mihunong na sa pagdrayb. Tingali mibati sila nga dili na nila kontrolado ang ilang kinabuhi kay dili na sila bastabasta makaadto sa mga lugar nga gusto nilang adtoan. Unsay imong mahimo para nila? Hatagi silag praktikal nga tabang. (Prov. 17:17) Ayawg hulata nga mohangyo sila nga magpahatod o magpakuha nimo, kay basig maghunahuna sila nga makapabug-at sila nimo. Maong mas maayo nga ikaw mismo ang moingon nga imo silang ihatod o ubanan sa importanteng mga kalihokan, sama sa pagtambong sa tigom, pagsangyaw, pagpamalit, ug sa ilang mga check-up sa doktor. Pasaligi sila nga nalipay ka sa paghimo niana ug nga gusto nimo silang makauban.—Roma 1:11, 12.

a Para sa dugang impormasyon, tan-awa ang artikulong “Mga Aksidente sa Sakyanan—Luwas Ka Ba?” sa Agosto 22, 2002 nga Pagmata!