Mga Balita Gikan sa Lainlaing Nasod

Mga Polis Mitabag Diskarga sa mga Haloblak

Sa Kutaisi, ang ikaduhang kinadak-ang siyudad sa Republic of Georgia, 13 ka tuig nang gihimo ang mga asembliya diha sa gubaon nga pabrikag champagne. Ila na lang kining giatop-atopan ug mga plastik aron dili maulanan ang manambong. Karon ang mga igsoon duna nay bag-ong expandable nga Kingdom Hall nga walay bungbong ug puwedeng magamit sa mga asembliya ug kombensiyon. Panahon sa pagtukod, 50 ka boluntaryo ang nagdiskargag haloblak gikan sa trak dihang mihapit ang mga polis aron motan-aw sa panghitabo. Nakadayeg sila sa kakugi ug kalipay sa mga boluntaryo mao nga sila mitabang usab pagdiskarga. Ilang giingnan ang mga igsoon nga tawgan sila kon dunay magsamoksamok kanila. Ang mga polis misaad nga motambong sa unang kombensiyon nga himoon sa bag-ong Assembly Hall.

Gibaligya Niya ang Iyang Bisikleta

Si Malachi maoy usa ka ansiyano sa Burundi. Pagpanguma ang iyang panginabuhi ug ideliber niya ang iyang mga abot gamit ang iyang bisikleta. Aron makatabang pagtukod sa ilang Kingdom Hall, nakadesisyon siya nga moboluntaryo kada adlaw. Pero nagkinahanglan siyag kuwarta nga magamit sa iyang pamilya sulod sa duha ka bulan nga konstruksiyon. Busa gibaligya niya ang bisikleta ug gihatag ngadto sa asawa ang badyet para sa ilang pamilya, ug ang nabiling kuwarta iyang gihulog sa kahon sa donasyon para sa konstruksiyon. Tungod sa iyang paningkamot nga makaboluntaryo, nabansay siyag maayo sa mga construction servant. Pagkahuman sa Kingdom Hall, dali ra siyang nakakitag trabaho sa konstruksiyon kay hanas na siya sa pagpanukod. Wala madugay, siya nakapalit ug bag-ong bisikleta!

Sila Napalihok sa Pagtabang

Lisod ang pagtukod ug Kingdom Hall sa hilit nga mga lugar sa Malawi. Sa miaging tuig sa pag-alagad, may gitukod nga Kingdom Hall sa dapit nga gubaon ang karsada. Gamit ang four-wheel drive, gihatod didto sa mga igsoon gikan sa Bethel ang mga materyales sa konstruksiyon. Ang mga igsoon didto nag-ingon nga nahinam sab sa proyekto ang mga tawo. Daghang di-Saksi ang mitabang hangtod sa gabii pagdiskargag balas, bato, semento, ug mga sin. Gani, mas daghan usahay sila kay sa mga Saksi! Kay nakadayeg sa paningkamot sa mga Saksi nga makatukod ug presentableng dapit sa pagsimba sa hilit nga mga lugar, ang mga tawo didto napalihok sa pagtabang.

Ang mga Bata Namaligyag Toffee

Sa Côte d’Ivoire, ang magtiayong espesyal payunir nag-Bible study sa magtiayong may napulo ka anak gamit ang lokal nga pinulongang Bete. Sa Mayo 2013, gieskedyul ang unang asembliya nianang pinulongana didto sa Daloa, ug silang tanan gustong motambong. Apan, 800 CFA ($1.60 U.S.) ang plete idabuwelta kada tawo, ug walay ikaplete ang amahan para sa dako niyang pamilya. Pero kay gusto gyong motambong, may nahunahunaan siyang paagi. Gihatagan niyag 300 CFA ($.60 U.S.) ang iyang kinamagulangang dalaga ug giingnan nga mamaligyag kendi nga toffee. Siya misugot ug nakaganansiya nga igo niyang ikaplete. Gihatagan sab sa amahan ug tag-300 CFA ang uban niyang anak aron mamaligya sab ug kendi hangtod nga silang tanan duna nay ikaplete. Sa ulahi, sila ug ang uban pa nanambong sa asembliya. Nalipay sila pag-ayo nga naminaw sa programa sa kaugalingon nilang pinulongan!